ಗಡಿ ಜಿಲ್ಲೆಯಲ್ಲಿ ರಾಯರ ಸ್ಮರಣೆ, ಶ್ರಾವಣ ಸಂಭ್ರಮ,ಭಕ್ತಿಯಲ್ಲಿ ಮಿಂದೆದ್ದ ಜನತೆ

ಕಲಿಯುಗದ ಕಾಮಧೇನು ಎಂದೇ ಹೆಸರಾದ ಗುರುರಾಯರ ಪುಣ್ಯಾರಾಧನೆ ನಗರದಲ್ಲಿ ಭಕ್ತಿ-ಭಾವದಿಂದ ನೆರವೇರಿತು.

ಚಾಮರಾಜನಗರ: ಕಲಿಯುಗದ ಕಾಮಧೇನು ಎಂದೇ ಹೆಸರಾದ ಗುರುರಾಯರ ಪುಣ್ಯಾರಾಧನೆ ನಗರದಲ್ಲಿ ಭಕ್ತಿ-ಭಾವದಿಂದ ನಡೆಯಿತು.

ನಗರದ ರಾಯರ ಮೃತ್ತಿಕಾ ಮಠದಲ್ಲಿ ಕಳೆದ ಎರಡು ದಿನಗಳಿಂದ ನಡೆಯುತ್ತಿರುವ ಪೂರ್ವಾರಾಧನೆಗೆ ಭಕ್ತಸಾಗರವೇ ಹರಿದುಬಂದಿತ್ತು. ಮಠದ ಅರ್ಚಕ ಪವನ್ ಮಾತನಾಡಿ, ಅಂದಾಜು 8 ಸಾವಿರ ಮಂದಿಗೆ ಪ್ರಸಾದದ ವ್ಯವಸ್ಥೆ ಕಲ್ಪಿಸಲಾಗಿದ್ದು, ಭಾನುವಾರ ನಗರದ ಪ್ರಮುಖ ಬೀದಿಗಳಲ್ಲಿ ರಾಯರ ಮೆರವಣಿಗೆ ನಡೆಯಲಿದೆ ಎಂದರು.

ಮೂರನೇ ಶ್ರಾವಣ ಮಾಸವಾದ್ದರಿಂದ ಹಲವು ದೇಗುಲಗಳಲ್ಲಿ ಅನ್ನ ಸಂತರ್ಪಣೆ ನಡೆಯಿತು. ಉಳಿದಂತೆ, ಹರಳುಕೋಟೆ ಆಂಜನೇಯ ಸ್ವಾಮಿ, ಹಿಮವದ್ ಗೋಪಾಲಸ್ವಾಮಿ ಬೆಟ್ಟ, ಬಿಳಿಗಿರಿರಂಗನಾಥನ ಬೆಟ್ಟದಲ್ಲಿ ವಿಶೇಷ ಪೂಜೆ ಜರುಗಿದವು. ಬೆಳಗ್ಗೆಯಷ್ಟೇ ಜಿಲ್ಲೆಯ ಹಲವೆಡೆ ತುಂತುರು ಮಳೆಯಾಗಿದ್ದನ್ನು ಬಿಟ್ಟರೇ ಭಕ್ತಾದಿಗಳು ದೇಗುಲಕ್ಕೆ ಭೇಟಿ ನೀಡಲು ವರುಣ ಬಿಡುವು ಕೊಟ್ಟಿದ್ದು ಅನುಕೂಲವಾಯಿತು.