ಚಾಮರಾಜನಗರ: ತಮಿಳುನಾಡಿನ ತಾಳವಾಡಿ ಸಮೀಪದ ಗುಮಟಾಪುರದಲ್ಲಿ ಸಗಣಿ ಎರೆಚಾಟ (ಗೊರೆ ಹಬ್ಬ) ಸಂಭ್ರಮದ ನಡುವೆ ನಟ ಪುನೀತ್ ರಾಜ್ಕುಮಾರ್ ಅವರ ಅಗಲಿಕೆಯನ್ನು ನೆನೆದು ಜನರು ಕಣ್ಣೀರಾದ ಘಟನೆ ನಡೆದಿದೆ.
ಪ್ರತಿವರ್ಷ ದೀಪಾವಳಿ ಮಾರನೇ ದಿನ ಗೊರೆಹಬ್ಬ ಆಚರಿಸುವ ಈ ಗ್ರಾಮದಲ್ಲಿ ಬಹುಪಾಲು ಮಂದಿ ಕನ್ನಡಿಗರೇ ಇದ್ದಾರೆ. ಸಗಣಿ ಎರೆಚಾಟದ ಸಂಭ್ರಮದ ನಡುವೆ ಅಭಿಮಾನಿಯೊಬ್ಬರು ಪುನೀತ್ ರಾಜ್ಕುಮಾರ್ ಅವರ ಶ್ರದ್ಧಾಂಜಲಿ ಫೋಟೋ ಹಿಡಿದು ಹಾರ ಹಾಕಿ ಕಂಬನಿ ಮಿಡಿದಿದ್ದಾರೆ.
ಸಂಭ್ರಮದ ನಡುವೆ ಪುನೀತ್ ಅಗಲಿಕೆಗೆ ಅಭಿಮಾನಿಗಳ ಕಣ್ಣೀರು
ದಿಢೀರನೇ ನಡೆದ ಈ ಘಟನೆಯಿಂದಾಗಿ ಸಂಭ್ರಮದಲ್ಲಿದ್ದವರೆಲ್ಲರೂ ಸ್ವಲ್ಪ ಕಾಲ ಅವಾಕ್ಕಾದರು. ಬಳಿಕ ನೆಚ್ಚಿನ ನಟನನ್ನು ಕಳೆದುಕೊಂಡದ್ದನ್ನು ನೆನೆದು ಕಣ್ಣೀರಾದರು.
ಪುನೀತ್ ಅಗಲಿ ಒಂದು ವಾರ ಕಳೆದರೂ ಅಭಿಮಾನಿಗಳು ಆಘಾತದಿಂದ ಇನ್ನೂ ಹೊರಬಂದಿಲ್ಲ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
