ಮೈಸೂರು/ಚಾ.ನಗರ : ರಾಜ್ಯ ಸರ್ಕಾರ ನಿರ್ಧಾರ ಹಾಗೂ ಹೈಕೋರ್ಟ್ ನೀಡಿರುವ ಹಿಜಾಬ್ ತೀರ್ಪಿಗೆ ಮುಸ್ಲಿಂ ಧರ್ಮಿಯರು ಅಸಮಾಧಾನ ವ್ಯಕ್ತಪಡಿಸಿ ಅಂಗಡಿಗಳನ್ನು ಬಂದ್ ಮಾಡಿ ಬಂದ್ಗೆ ಸಂಪೂರ್ಣ ಬೆಂಬಲ ಸೂಚಿಸಿದ್ದಾರೆ. ಹಾಗೆ ಚಾಮರಾಜನಗರದಲ್ಲಿ ಇದೇ ದೃಶ್ಯ ಕಂಡುಬಂತು.
ಫೆಡರೇಷನ್ ಆಫ್ ಮುಸ್ಲಿಂ ಆರ್ಗನೈಜೇಷನ್ ವತಿಯಿಂದ ರಾಜ್ಯಾದ್ಯಂತ ನೀಡಿರುವ ಬಂದ್ಗೆ ಮೈಸೂರಿನಲ್ಲಿರುವ ಸಾಡೇ ರಸ್ತೆ, ಮಂಡಿ ಮೊಹಲ್ಲಾ ಕಬೀರ್ ರಸ್ತೆ, ಉದಯಗಿರಿ ರಸ್ತೆ, ಕಲ್ಯಾಣಿ ಗಿರಿ ಸೇರಿದಂತೆ ವಿವಿಧೆಡೆ ಇರುವ ಮುಸ್ಲಿಂ ವ್ಯಾಪಾರ ಕೇಂದ್ರಗಳು ಹಾಗೂ ಅಂಗಡಿಗಳನ್ನು ಮುಚ್ಚಿ ಬಂದ್ಗೆ ಬೆಂಬಲ ಸೂಚಿಸಿದರು.
ಇದನ್ನೂ ಓದಿ: ನೂರಾರು ಅಪರಾಧ ಪ್ರಕರಣ ಭೇದಿಸಿದ್ದ 10 ವರ್ಷದ ಶ್ವಾನ ಸಾವು.. 'ರೇವಾ'ಗೆ ಪೊಲೀಸ್ ಗೌರವ
ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ಪೊಲೀಸರು ಅಂಗಡಿಗಳು ಬಂದ್ ಆಗಿರುವ ಕಡೆ ಗಸ್ತು ತಿರುಗಿದರು. ಅಲ್ಲದೇ, ಅಂಗಡಿ ಬಾಗಿಲಿಗೆ ಈ 'ವ್ಯಾಪಾರಿ ಹಿಜಾಬ್ ಪರ' ಎಂದು ಸ್ಟಿಕರ್ ಅಂಟಿಸಿದ್ದು ಕಂಡುಬಂತು.
ವ್ಯಾಪಾರಸ್ಥರಿಂದ ವಾಣಿಜ್ಯ ಚಟುವಟಿಕೆ ಸ್ಥಗಿತ: ಚಾಮರಾಜನಗರ ಜಿಲ್ಲೆಯಲ್ಲಿ ಮುಸ್ಲಿಂ ಸಮುದಾಯದಿಂದ ಬಂದ್ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಚಾಮರಾಜನಗರ ಜಿಲ್ಲಾಕೇಂದ್ರ, ಗುಂಡ್ಲುಪೇಟೆ, ಹನೂರು, ಕೌದಳ್ಳಿ ಸೇರಿದಂತೆ ಜಿಲ್ಲೆಯಾದ್ಯಂತ ಮುಸ್ಲಿಂ ವರ್ತಕರು, ಆಟೋ ಚಾಲಕರು ತಮ್ಮ ವಾಣಿಜ್ಯ ಚಟುವಟಿಕೆ ಬಂದ್ ಮಾಡಿ ಹಿಜಾಬ್ ಧರಿಸಲು ಅವಕಾಶ ಕೊಡಬೇಕೆಂದು ಒತ್ತಾಯಿಸಿದ್ದಾರೆ.
ತಾಲೂಕು, ಜಿಲ್ಲಾ ಮತ್ತು ಇನ್ನಿತರೆ ಮುಸ್ಲಿಂ ಕಮಿಟಿಗಳು, ಎಸ್ಡಿಪಿಐ ಸಂಘಟನೆಗಳು ಬಂದ್ಗೆ ಬೆಂಬಲ ವ್ಯಕ್ತಪಡಿಸಿವೆ. ಈರುಳ್ಳಿ ಸೇರಿದಂತೆ ವಾಣಿಜ್ಯ ಬೆಳೆ ವರ್ತಕರು, ಮಾಂಸದಂಗಡಿಗಳು, ಕೆಲವೊಂದು ಹೋಟೆಲ್ಗಳು, ದಿನಸಿ ಅಂಗಡಿಗಳನ್ನು ಮುಸ್ಲಿಂ ಧರ್ಮಿಯರು ಸ್ವಯಂಪ್ರೇರಿತರಾಗಿ ಬಂದ್ ಮಾಡಿದ್ದಾರೆ.
