ಚಾಮರಾಜನಗರ: ವರದಕ್ಷಿಣಿ ಹಿಂಸೆ ಹಾಗೂ ಶೀಲ ಶಂಕಿಸುತ್ತಿದ್ದ ಪತಿಯ ಕಿರುಕುಳಕ್ಕೆ ಬೇಸತ್ತು ಗೃಹಿಣಿಯೋರ್ವಳು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಕೊಳ್ಳೇಗಾಲದ ಬಸ್ತೀಪುರದಲ್ಲಿ ನಡೆದಿದೆ. ಹನೂರು ಗ್ರಾ.ಪಂ.ನಲ್ಲಿ ಪಿಡಿಒ ಆಗಿರುವ ಆನಂದ್ ಕಾಂಬ್ಳೆ ಪತ್ನಿ ವಿದ್ಯಾಶ್ರೀ ಆತ್ಮಹತ್ಯೆಗೆ ಶರಣಾಗಿರುವ ಗೃಹಿಣಿ.
ವಿದ್ಯಾಶ್ರೀ ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲೂಕಿನವಳಾಗಿದ್ದು ಮೂರು ವರ್ಷದ ಹಿಂದೆ ಅದೇ ಜಿಲ್ಲೆಯ ಪಿಡಿಒ ಆನಂದ್ ಕಾಂಬ್ಳೆ ಅವರನ್ನು ವಿವಾಹವಾಗಿದ್ದರು. ಆನಂದ್ ಕಾಂಬ್ಳೆ ಹನೂರು ತಾಲೂಕಿನ ಶಾಗ್ಯ ಗ್ರಾಮ ಪಂಚಾಯತ್ ಪಿಡಿಒ ಆಗಿ ಕೆಲಸ ನಿರ್ವಹಿಸುತ್ತಿದ್ದಾರೆ.
ಈ ದಂಪತಿ ಕೊಳ್ಳೇಗಾಲ ಸಮೀಪದ ಬಸ್ತೀಪುರದ ಬಾಡಿಗೆ ಮನೆಯೊಂದರಲ್ಲಿ ವಾಸವಿದ್ದು, ನಿನ್ನೆ ವಿದ್ಯಾಶ್ರೀ ಮನೆಯ ಕೊಠಡಿಯಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.
ಈ ಬಗ್ಗೆ ವಿದ್ಯಾಶ್ರೀ ತಂದೆ ಚಿದಾನಂದ ಕಾಂಬ್ಳೆ ಮಾತನಾಡಿ, ನನ್ನ ಅಳಿಯ ಆನಂದ್ ಕಾಂಬ್ಳೆ ನನ್ನ ಮಗಳಿಗೆ ವರದಕ್ಷಿಣೆ ಹಿಂಸೆ ಹಾಗೂ ಶೀಲ ಶಂಕಿಸಿ ಕಿರುಕುಳ ನೀಡುತ್ತಿದ್ದ. ಗಂಡನ ಹಿಂಸೆ ತಾಳದೆ ಮಗಳು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಆರೋಪಿಸಿದ್ದಾರೆ.
ಸ್ಥಳಕ್ಕೆ ಡಿವೈಎಸ್ಪಿ ನಾಗರಾಜು ಹಾಗೂ ಸಕ೯ಲ್ ಇನ್ಸ್ ಪೆಕ್ಟರ್ ಮುಧೋಳ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಮೃತಳ ತಂದೆ ಚಿದಾನಂದ ಕಾಂಬ್ಳೆ ನೀಡಿದ ದೂರಿನನ್ವಯ ಪಿ.ಡಿ.ಓ ಆನಂದ್ ಕಾಂಬ್ಳೆ ಹಾಗೂ ಅತನ ತಂದೆ ಶ್ಯಾಮ್ ಅವರನ್ನು ಪೊಲೀಸರು ಬಂಧಿಸಿದ್ದಾರೆ.
ಇದನ್ನೂ ಓದಿ: ಯುವಕನಿಂದ ಮೋಸಕ್ಕೊಳಗಾಗಿ ಮಗುವಿಗೆ ತಾಯಿಯಾದ 11 ವರ್ಷದ ಬಾಲಕಿ
