ಬೆಂಗಳೂರು: ಎಂ.ಬಿ.ಪಾಟೀಲ್ ಒಬ್ಬ ಶತಮೂರ್ಖ ಗೃಹ ಸಚಿವ. ಇಂತಹ ಗೃಹ ಸಚಿವರು ಈ ರಾಜ್ಯದಲ್ಲಿರೋದು ದುರದೃಷ್ಟಕರ ಎಂದು ಸಂಸದೆ ಶೋಭಾ ಕರಂದ್ಲಾಜೆ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
ಮೌರ್ಯ ವೃತ್ತದಲ್ಲಿ ನಡೆಯುತ್ತಿರುವ ಬಿಜೆಪಿ ಅಹೋರಾತ್ರಿ ಧರಣಿಯಲ್ಲಿ ಪಾಲ್ಗೊಂಡ ಅವರು, ಐಎಂಎ ಜ್ಯುವೆಲ್ಲರ್ಸ್ನಿಂದ ವಂಚ‌ನೆಗೊಳಗಾದ ಮಹಿಳೆಯರೊಂದಿಗೆ ಮಾತುಕತೆ ನಡೆಸಿದರು. ಈ ವೇಳೆ ಹಣ ಹೂಡಿಕೆ ಮಾಡಿದ್ದ ಮಹಿಳೆಯರು ಕಂಪನಿ ನೀಡಿರುವ ದಾಖಲೆಗಳನ್ನು ನೀಡಿ ನ್ಯಾಯ ಕೊಡಿಸುವಂತೆ ಮನವಿ ಮಾಡಿಕೊಂಡರು.
ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಶೋಭಾ ಕರಂದ್ಲಾಜೆ, ಐಎಂಎ ಹಗರದಲ್ಲಿ ಸಚಿವ ಜಮೀರ್ ಖಾನ್ ಪಾಲುದಾರ. ಹೀಗಾಗಿ ಸಿಎಂ ಕುಮಾರಸ್ವಾಮಿ ಸಂಪುಟದಿಂದ ಜಮೀರ್ ಖಾನ್ರನ್ನ ಕೈ ಬಿಡಬೇಕು. ರೋಷನ್ ಬೇಗ್ ಅವರ ಮೇಲೂ ಆರೋಪವಿದೆ. ನಾನು ದೆಹಲಿಗೆ ಹೋದ ಬಳಿಕ ಪ್ರಕರಣವನ್ನ ಸಿಬಿಐಗೆ ವಹಿಸುವಂತೆ ಮನವಿ ಮಾಡುತ್ತೇನೆ ಎಂದರು.
ಜಿಂದಾಲ್ಗೆ ಭೂಮಿ ಮಾರಾಟ ಮಾಡುವ ತೀರ್ಮಾನ ಯಡಿಯೂರಪ್ಪ ಅವಧಿಯಲ್ಲಾಗಿತ್ತು ಎಂಬ ಗೃಹ ಸಚಿವ ಎಂ.ಬಿ.ಪಾಟೀಲ್ ಹೇಳಿಕೆಗೆ ಕಿಡಿಕಾರಿದ ಸಂಸದೆ ಶೋಭಾ ಕರಂದ್ಲಾಜೆ, ಅವರೊಬ್ಬ ಶತಮೂರ್ಖ ಗೃಹ ಸಚಿವ. ಇಂತಹ ಶತಮೂರ್ಖ ಗೃಹ ಸಚಿವ ಈ ರಾಜ್ಯದಲ್ಲಿರೋದು ದುರದೃಷ್ಟಕರ. ಕೈಗಾರಿಕೆಗಳಿಗೆ ಭೂಮಿ ಕೊಡುವಾಗ ಲೀಸ್ ಕಂ ಸೇಲ್ ಒಪ್ಪಂದ ಮಾಡ್ಕೋತಾರೆ. ಇಂತಹ ಕನಿಷ್ಠ ವಿಚಾರವೂ ಗೊತ್ತಿಲ್ಲದ ಎಂ.ಬಿ.ಪಾಟೀಲ್ ಒಬ್ಬ ಮೂರ್ಖ ಮಂತ್ರಿ ಎಂದು ವಾಗ್ದಾಳಿ ನಡೆಸಿದರು.
ಅಂದು ಭೂಮಿ ಕೊಡುವಾಗ ಸಿಎಂ ಆಗಿದ್ದ ಕುಮಾರಸ್ವಾಮಿ ಅವರೇ ಈಗ ನಿಮ್ಮ ಜೊತೆ ಇದ್ದಾರೆ. ಜಿಂದಾಲ್ಗೆ ಯಾಕೆ ಭೂಮಿ ಕೊಟ್ರಿ ಅಂತ ಅವರನ್ನೇ ಕೇಳಿ. ಜಿಂದಾಲ್ ಒಪ್ಪಂದದ ಫೈಲ್ ವಿಧಾನಸೌಧದಲ್ಲಿ ಇದೆ. ಅದನ್ನ ಯಡಿಯೂರಪ್ಪ ಮನೆಗೆ ತಂದಿಟ್ಕೊಂಡಿಲ್ಲ. ಆ ಫೈಲ್ ತೆರೆದು ಒಮ್ಮೆ ಓದಿ ಎಂದು ಟಾಂಗ್ ನೀಡಿದರು.
ಇನ್ನು ಪ್ರತ್ಯೇಕ ಲಿಂಗಾಯತ ಧರ್ಮ ಮಾಡಲು ಹೋಗಿ ಕೈ ಸುಟ್ಕೊಂಡ್ರಿ. ಈಗ ಮತ್ತೊಮ್ಮೆ ಅಂತಹ ಪರಿಸ್ಥಿತಿ ತಂದ್ಕೋ ಬೇಡಿ ಎಂದು ಗೃಹ ಸಚಿವ ಎಂ.ಬಿ.ಪಾಟೀಲ್ಗೆ ಶೋಭಾ ತಿರುಗೇಟು ನೀಡಿದ್ರು.
