ಹ್ಯಾಟ್ರಿಕ್ ಗೆಲುವಿನ ನಿರೀಕ್ಷೆಯಲ್ಲಿ ಸೋಲಿಲ್ಲದ ಸರದಾರರು!
ಇಂದು ಪ್ರಕಟಗೊಳ್ಳುವ ಲೋಕಸಭಾ ಚುನಾವಣೆ ರಾಜ್ಯ-ರಾಜಕೀಯದ ಮೇಲೆ ಮಹತ್ವದ ಪರಿಣಾಮ ಬೀರಲಿದೆ ಎಂಬ ಮಾತು ಈಗಾಗಲೇ ಕೇಳಿ ಬರ್ತಿವೆ. ಆಡಳಿತ ನಡೆಸ್ತಿರುವ ಮೈತ್ರಿ ಸರಕಾರದ ಅಳಿವು-ಉಳಿವಿನ ಪ್ರಶ್ನೆ ಎನ್ನಲಾಗ್ತಿದ್ದು, ಇದರ ಮಧ್ಯೆ ಕೆಲ ನಾಯಕರು ಲೋಕಫೈಟ್ ಗೆದ್ದು ಹೊಸ ದಾಖಲೆ ಬರೆಯಲು ಸಜ್ಜಾಗಿದ್ದಾರೆ.
8ನೇ ಬಾರಿ ಗೆದ್ದು ಐತಿಹಾಸ ಸೃಷ್ಟಿ ಮಾಡ್ತಾರಾ ಕೆ.ಹೆಚ್ ಮುನಿಯಪ್ಪ?
ಕೋಲಾರ ಲೋಕಸಭಾ ಕ್ಷೇತ್ರದಿಂದ 1991ರಿಂದ ಸತತವಾಗಿ ಗೆಲುವು ದಾಖಲು ಮಾಡಿರುವ ಕೆಹೆಚ್ ಮುನಿಯಪ್ಪ ಸೋಲಿಲ್ಲದ ಸರದಾರ ಎಂಬ ಹಣೆ ಪಟ್ಟ ಕಟ್ಟಿಕೊಂಡಿದ್ದಾರೆ. ಈಗಾಗಲೇ ಏಳು ಸಲ ಚುನಾವಣೆ ಗೆದ್ದಿರುವ ಇವರು, ಈ ಸಲ ಗೆದ್ದು ಇತಿಹಾಸ ರಚನೆಗೆ ಮುಂದಾಗಿದ್ದಾರೆ.
ಮಾಜಿ ಪ್ರಧಾನಿ ಹೆಚ್ಡಿಡಿ ಕೈ ಹಿಡಿಯುತ್ತಾ ಕಲ್ಪತರು ನಾಡು!
ಹಾಸನ,ಕನಕಪುರ,ಮಂಡ್ಯದಿಂದ ಸತತವಾಗಿ ಗೆಲುವು ದಾಖಲು ಮಾಡಿರುವ ಮಾಜಿ ಪ್ರಧಾನಿ ಈಸಲ ತುಮಕೂರಿನಿಂದ ಅದೃಷ್ಟ ಪರೀಕ್ಷೆಗೆ ಮುಂದಾಗಿದ್ದು, ಈ ಸಲ ಗೆಲುವು ದಾಖಲು ಮಾಡಿದರೆ ಏಳನೇ ಬಾರಿ ಗೆಲುವಿನ ನಗೆ ಬೀರಿದಂತಾಗುತ್ತದೆ. ಈ ಹಿಂದಿನ ಲೋಕಸಭೆಯಲ್ಲಿ ಹಾಸನದಿಂದ ಸ್ಪರ್ಧಿಸಿದ್ದ ಹೆಚ್ಡಿಡಿ ಈ ಸಲ ತಮ್ಮ ಕ್ಷೇತ್ರವನ್ನ ಮೊಮ್ಮಗ ಪ್ರಜ್ವಲ್ಗೆ ಬಿಟ್ಟುಕೊಂಡು, ಕಾಂಗ್ರೆಸ್ ಭದ್ರಕೋಟೆ ತುಮಕೂರಿನಿಂದ ಕಣಕ್ಕಿಳಿದಿದ್ದಾರೆ. ಇವರಿಗೆ ಬಿಜೆಪಿ ಅಭ್ಯರ್ಥಿ ಜಿ.ಎಸ್. ಬಸವರಾಜು ತೀವ್ರ ಪೈಪೋಟಿ ನೀಡಲಿದ್ದಾರೆ.
ಕರ್ನಾಟಕ ಬಿಜೆಪಿ ಫೈರ್ ಬ್ರಾಂಡ್ ಕಮಾಲ್ ಮಾಡಲು ರೆಡಿ?
ಮಾತಿನ ಮಲ್ಲ ಎಂಬ ಪಟ್ಟ ಕಟ್ಟಿಕೊಂಡಿರುವ ಉತ್ತರ ಕನ್ನಡದ ಬಿಜೆಪಿ ಅಭ್ಯರ್ಥಿ ಅನಂತ್ ಕುಮಾರ್ ಹೆಗಡೆ ದಾಖಲೆ ನಿರ್ಮಿಸಲು ಸಜ್ಜಾಗಿದ್ದಾರೆ. ಈ ಹಿಂದಿನ ಮೂರು ಲೋಕಸಭಾ ಎಲೆಕ್ಷನ್ ಗೆದ್ದಿರುವ ಕೇಂದ್ರ ಸಚಿವ ಈ ಸಲ ಗೆದ್ದರೆ ಐದನೇ ಸಲ ಗೆಲುವು ದಾಖಲು ಮಾಡಿದಂತಾಗ್ತದೆ.ಇವರ ಎದುರಾಳಿಯಾಗಿ ಜೆಡಿಎಸ್-ಕಾಂಗ್ರೆಸ್ ಮೈತ್ರಿ ಅಭ್ಯರ್ಥಿ ಆನಂದ್ ಅಸ್ನೋಟಿಕರ್ ಸ್ಪರ್ಧೆ ಮಾಡಿದ್ದು, ಟಪ್ ಫೈಟ್ ನೀಡಲಿದ್ದಾರೆ.
ಗೆಲುವಿನ ಸಿಕ್ಸರ್ ಭಾರಿಸಲು ಸಿದ್ಧರಾದ ರಮೇಶ್ ಜಿಗಜಿಣಗಿ!
ಆದಿಲ್ ಶಾಹಿ ಸುಲ್ತಾನರ ರಾಜಧಾನಿಯಾಗಿದ್ದ ಬಿಜಾಪುರದಲ್ಲಿ ಬಿಜೆಪಿ ಅಭ್ಯರ್ಥಿ ರಮೇಶ್ ಜಿಗಜಿಣಗಿ ಎದುರಾಳಿ ಮೈತ್ರಿ ಅಭ್ಯರ್ಥಿ ಸುನಿತಾ ಚವಾಣ್. ಈ ಹಿಂದೆ 1998ರಲ್ಲಿ ಲೋಕಶಕ್ತಿ,1999ರಲ್ಲಿ ಸಂಯುಕ್ತ ಜನತಾದಳ ತದನಂತರ 2004,2009 ಹಾಗೂ 2014ರಲ್ಲಿ ಬಿಜೆಯಿಂದ ಸತತ ಗೆಲುವು ಸಾಧಿಸಿರುವ ಜಿಗಜಿಣಗಿ, ರಾಜಕೀಯ ಚಾಣಾಕ್ಷ್ಯ. ಈ ಸಲದ ಎಲೆಕ್ಷನ್ನಲ್ಲಿ ಅನನುಭವಿ ಎದುರಾಳಿ ಸುನಿತಾ ವಿರುದ್ಧ ಸುಲಭ ಗೆಲುವು ದಾಖಲು ಮಾಡುವ ಉತ್ಸಾಹದಲ್ಲಿದ್ದಾರೆ.
4ನೇ ಬಾರಿ ವಿಜಯದ ನಗೆ ಬೀರಲು ಗದ್ದಿಗೌಡರ್ ಸನ್ನದ್ಧ
ಬಾಗಲಕೋಟೆ ಲೋಕಸಭಾ ಕ್ಷೇತ್ರದಿಂದ ಕಣಕ್ಕಿಳಿದಿರುವ ಪಿಸಿ ಗದ್ದಿಗೌಡರ್ ನಾಲ್ಕನೇ ಸಲ ಗೆಲುವಿನ ನಗಾರಿ ಬಾರಿಸಲು ಸಜ್ಜಾಗಿದ್ದಾರೆ. ಈ ಸಲ ಕಾಂಗ್ರೆಸ್ನ ವೀಣಾ ಕಾಶಪ್ಪನವರ್ ಇದೇ ಕ್ಷೇತ್ರದಿಂದ ಅದೃಷ್ಠ ಪರೀಕ್ಷೆಗೆ ಮುಂದಾಗಿದ್ದು, ಬಿಗ್ಫೈಟ್ ಏರ್ಪಟ್ಟಿದೆ. ಸತತ ಮೂರು ಬಾರಿ ಗೆಲುವಿನ ಮೂಲಕ ಹ್ಯಾಟ್ರಿಕ್ ಬಾರಿಸಿರುವ ಬಿಜೆಪಿ ಸಂಸದ ಸುರೇಶ್ ಅಂಗಡಿ ಸಹ ನಾಲ್ಕನೇ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ.
ಹ್ಯಾಟ್ರಿಕ್ ಬಾರಿಸಿ ಓಟ ಮುಂದುವರಿಸ್ತಾರಾ ಇವರೆಲ್ಲ:
ಬೆಂಗಳೂರು ಕೇಂದ್ರದಿಂದ ಬಿಜೆಪಿಯ ಪಿಸಿ ಮೋಹನ್ ಈಗಾಗಲೇ ಎರಡು ಸಲ ಗೆದ್ದಾಗಿದೆ. ಈ ಸಲವೂ ಹ್ಯಾಟ್ರಿಕ್ ಗೆಲುವು ದಾಖಲು ಮಾಡುವ ಉತ್ಸಾಹದಲ್ಲಿದ್ದಾರೆ. ಇನ್ನು ಬೆಂಗಳೂರು ಗ್ರಾಮಾಂತರ ಕ್ಷೇತ್ರದಲ್ಲಿ ಈಗಾಗಲೇ ಎರಡು ಸಲ ಗೆಲುವಿನ ರುಚಿ ನೋಡಿರುವ ಡಿಕೆ ಸುರೇಶ್ ಮತ್ತೊಮ್ಮೆ ಗೆಲುವಿನ ನಗೆ ಬೀರಲು ಮುಂದಾಗಿದ್ದಾರೆ. ಚಾಮರಾಜನಗರದಲ್ಲಿ ಆರ್.ಧ್ರುವನಾರಾಯಣ ಸಹ ಹ್ಯಾಟ್ರಿಕ್ ಬಾರಿಸಲು ಸಜ್ಜಾಗಿದ್ದಾರೆ. ಆದರೆ ಇವರಿಗೆ ಹಳೆ ಹುಲಿ ಬಿಜೆಪಿಯ ವಿ.ಶ್ರೀನಿವಾಸ ಪ್ರಸಾದ್‌ ಪ್ರಬಲ ಪೈಪೋಟಿ ನೀಡಿದ್ದಾರೆ. ಇನ್ನು ಎದುರಾಳಿಗಳೇ ಇಲ್ಲದೇ ಈಗಾಗಲೇ ಹ್ಯಾಟ್ರಿಕ್ ಗೆಲುವು ದಾಖಲು ಮಾಡಿರುವ ಪ್ರಹ್ಲಾದ್ ಜೋಶಿ, ಮತ್ತೊಮ್ಮೆ ಅಗ್ನಿಪರೀಕ್ಷೆಗೆ ಮುಂದಾಗಿದ್ದಾರೆ. ಆದರೆ ಈ ಬಾರಿಯೂ ಇವರಿಗೆ ವಿನಯ್ ಕುಲಕರ್ಣಿ ಅವರು ಅಡ್ಡಗಾಲಾಗಿದ್ದಾರೆ. ಕೇಂದ್ರ ಸಚಿವ ಹಾಗೂ ಬಿಜೆಪಿ ಹಿರಿಯ ಮುಖಂಡ ಜಿಎಂ ಸಿದ್ದೇಶ್ವರ್ ದಾವಣಗೆರೆ ಕ್ಷೇತ್ರದಿಂದ ನಾಲ್ಕನೇ ಬಾರಿಗೆ ವಿಜಯ ಸಾಧಿಸುವ ಸನ್ನಾಹದಲ್ಲಿದ್ದಾರೆ.
ಚಿಕ್ಕಬಳ್ಳಾಪುರದಲ್ಲಿ ಎಂ. ವೀರಪ್ಪ ಮೊಯ್ಲಿ ಕಾಂಗ್ರೆಸ್ನ ಪ್ರಬಲ ಅಭ್ಯರ್ಥಿ. ಈಗಾಗಲೇ 2009 ಹಾಗೂ 2014ರಲ್ಲಿ ಗೆಲುವಿನ ನಗೆ ಬೀರಿರುವ ಮೊಯ್ಲಿ ಈ ಸಲವೂ ಗೆಲುವು ದಾಖಲು ಮಾಡಿ ಹ್ಯಾಟ್ರಿಕ್ ಗೆಲುವು ದಾಖಲು ಮಾಡುವ ಸಾಧ್ಯತೆ ಇದೆ. ಇನ್ನು ಹಾಲಿ ಸಂಸದ ನಳಿನ್‌ ಕುಮಾರ್ ಕಟೀಲ್ಗೆ ಬಿಜಪಿ ಮೂರನೇ ಬಾರಿಗೆ ಕಣಕ್ಕಿಳಿಸಿದೆ. ಈಗಾಗಲೇ ಗೆಲುವಿನ ನಗಾರಿ ಬಾರಿಸಿರುವ ಕಟೀಲ್ ಗೆದ್ದು ಹ್ಯಾಟ್ರಿಕ್ ಸಾಧನೆ ಮಾಡುವ ತವಕದಲ್ಲಿದ್ದಾರೆ.
ಸೋಲಿಲ್ಲದ ಸರದಾರನಿಗೆ ಆಗುತ್ತಾ ಮುಖಭಂಗ?
ಸೊಲ್ಲಿಲ್ಲದ ಸರದಾರ ಮಲ್ಲಿಕಾರ್ಜುನ್ ಖರ್ಗೆ, ಕಾಂಗ್ರೆಸ್ನ ಪ್ರಬಲ ಅಭ್ಯರ್ಥಿ. ಈಗಾಗಲೇ ಗುಲ್ಬರ್ಗಾ ಕ್ಷೇತ್ರದಿಂದ ಎರಡು ಸಲ ಗೆದ್ದಿರುವ ಖರ್ಗೆಗೆ ಈ ಸಲ ಅವರದ್ದೇ ಪಕ್ಷದ ಚಿಂಚೋಳಿ ಶಾಸಕರಾಗಿದ್ದ ಉಮೇಶ್ ಜಾಧವ್ ಪ್ರಬಲ ಎದುರಾಳಿಯಾಗಿದ್ದಾರೆ. ಒಂದು ವೇಳೆ ಈ ಕ್ಷೇತ್ರದಿಂದ ಖರ್ಗೆ ಗೆಲುವು ದಾಖಲು ಮಾಡಿದರೆ ಹೊಸ ದಾಖಲೆ ನಿರ್ಮಾಣವಾಗಲಿದೆ.
