ಗೆಳೆತನಕ್ಕಿಂತ ಸಾವಿರ ರೂಪಾಯಿ ಹೆಚ್ಚಾಯ್ತು: ಬೀದರ್​ನಲ್ಲಿ ಹಣಕ್ಕಾಗಿ ಹೆಣ ಉರುಳಿಸಿದ ಸ್ನೇಹಿತ​!

ಹಣ ಹಿಂದುರಿಗಿಸುವ ವಿಚಾರಕ್ಕೆ ಸಂಬಂಧಿಸಿದಂತೆ ಜಗಳ ಉಂಟಾಗಿ ಕುಡಿದ ಮತ್ತಿನಲ್ಲಿ ಗೆಳೆಯನನ್ನು ಕೊಲೆ ಮಾಡಿರುವ ಘಟನೆ ಬೀದರ್​ನಲ್ಲಿ ನಡೆದಿದೆ.

ಬೀದರ್: 1000 ರೂಪಾಯಿ ಸಾಲ ವಾಪಸ್​ ನೀಡಿಲ್ಲವೆಂದು ಗೆಳೆಯನನ್ನೇ ಇನ್ನೊಬ್ಬ ಚಾಕುವಿನಿಂದ ಇರಿದು ಕೊಲೆಗೈದಿರುವ ಘಟನೆ ನಗರದಲ್ಲಿ ನಡೆದಿದೆ.

ಬೀದರ್​ನಲ್ಲಿ ಹಣಕ್ಕಾಗಿ ಸ್ನೇಹಿತನೆ ಮಟ್ಯಾಷ್​!

ನಗರದ ಮೈಲೂರು ಬಡಾವಣೆ ನಿವಾಸಿ ಸ್ವಾಮಿದಾಸ(25) ಕೊಲೆಯಾಗಿರುವ ಯುವಕ. ಇದೇ ಬಡಾವಣೆಯ ರವಿ ಎಂಬಾತ ಈತನಿಗೆ 1000 ರೂಪಾಯಿ ಸಾಲ ಕೊಟ್ಟಿದ್ದ. ಸೋಮವಾರ ಹಣ ವಾಪಸ್ ನೀಡುವ ವಿಚಾರಕ್ಕೆ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದಿತ್ತು. ಇದು ವಿಕೋಪಕ್ಕೆ ತಿರುಗಿ ರವಿ, ಸ್ವಾಮಿದಾಸನ ಹೊಟ್ಟೆಗೆ ಚಾಕುವಿನಿಂದ ಇರಿದಿದ್ದ.

ಗಂಭೀರವಾಗಿ ಗಾಯಗೊಂಡ ಸ್ವಾಮಿದಾಸ ಚಿಕಿತ್ಸೆ ಫಲಕಾರಿಯಾಗದೆ ಬ್ರೀಮ್ಸ್ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾನೆ. ಈ ಕುರಿತು ಗಾಂಧಿಗಂಜ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.