ಬೀದರ್: ಲಾಕ್ಡೌನ್ನಿಂದಾಗಿ ಮಾರುಕಟ್ಟೆ ಇಲ್ಲದೆ ಅನೇಕ ಬೆಳಗಾರರು ಸಂಕಷ್ಟಕ್ಕೊಳಗಾಗಿದ್ದಾರೆ. ಇದರ ಮಧ್ಯೆ ಕಟಾವಿಗೆ ಬಂದ ಕಲ್ಲಂಗಡಿ ಮಾರಾಟ ಮಾಡಲು ಸಾಧ್ಯವಾಗದೇ ತೊಂದರೆಗೊಳಗಾಗಿದ್ದ ರೈತನೋರ್ವನಿಗೆ ನಟ ಉಪೇಂದ್ರ ಸಹಾಯ ಮಾಡಿದ್ದಾರೆ.
ಬೀದರ್ ಜಿಲ್ಲೆಯ ಔರಾದ್ನ ತೆಗಂಪೂರ್ ಗ್ರಾಮದ ರೈತ ಶಿವಕುಮಾರ್ ಎರಡು ಎಕರೆ ಜಮೀನಿನಲ್ಲಿ ಕಲ್ಲಂಗಡಿ ಬೆಳೆದಿದ್ದರು. ಆದರೆ ಲಾಕ್ಡೌನ್ ಕಾರಣ ಮಾರಾಟ ಮಾಡಲು ಸಾಧ್ಯವಾಗಿರಲಿಲ್ಲ. ಇದೀಗ ಅವರು ಬೆಳೆದ ಕಲ್ಲಂಗಡಿ ಖರೀದಿ ಮಾಡಿ ಬಡವರು, ನಿರ್ಗತಿಕರಿಗೆ ವಿತರಣೆ ಮಾಡುವ ಮೂಲಕ ನಟ ಉಪೇಂದ್ರ ಸಹಾಯ ಮಾಡಿದ್ದಾರೆ.
ಫಲವತ್ತಾಗಿ ಬೆಳೆದ ಕಲ್ಲಂಗಡಿ ಕಟಾವಿಗೆ ಬಂದು ಮಾರುಕಟ್ಟೆಗೆ ಸಾಗಿಸುವ ಸಂದರ್ಭದಲ್ಲೇ ಲಾಕ್ಡೌನ್ ಜಾರಿಗೊಂಡಿರುವ ಕಾರಣ ಸಂಕಷ್ಟಕ್ಕೊಳಗಾಗಿದ್ದರು. ಈ ವಿಷಯ ಸಾಮಾಜಿಕ ಜಾಲತಾಣದ ಮೂಲಕ ಉಪೇಂದ್ರ ಫೌಂಡೇಶನ್ ಗಮನಕ್ಕೆ ಬಂದಿದೆ. ಇದಕ್ಕೆ ಪ್ರತಿಕ್ರಿಯಿಸಿದ ನಟ ಉಪೇಂದ್ರ, ಸಂಕಷ್ಟದಲ್ಲಿದ್ದ ರೈತನ ಅಂದಾಜು 7 ಟನ್ ಕಲ್ಲಂಗಡಿ ಹಣ್ಣು ಖರೀದಿ ಮಾಡಿ ಬೀದರ್ ನಗರದ ಅಲೆಮಾರಿ, ಬಡವರು, ನಿರ್ಗತಿಕರ ಪ್ರದೇಶಗಳಲ್ಲಿ ಉಚಿತವಾಗಿ ಸರಬರಾಜು ಮಾಡಿದ್ದಾರೆ. ಈ ಮೂಲಕ ರೈತ ಬೆಳೆದ ಬೆಳೆ ಖರೀದಿ ಮಾಡುವ ಮೂಲಕ ಹಸಿವಿನಿಂದ ಬಳಲಿರುವ ಅನೇಕರಿಗೆ ಸಹಾಯ ಮಾಡಿದ್ದಾರೆ.
ಈ ವಿಚಾರವಾಗಿ 'ಈಟಿವಿ ಭಾರತ' ಜತೆಯಲ್ಲಿ ರೈತ ಶಿವಾನಂದ ಮುಕ್ತೇದಾರ ಮಾತನಾಡಿ, ಹಾಫ್ ಕಾಮ್ಸ್ನವರು ನಮ್ಮ ಸಹಾಯಕ್ಕೆ ಬರಲಿಲ್ಲ. ಆದರೆ ನಟ ಉಪೇಂದ್ರ ಬೆಂಗಳೂರಲ್ಲಿ ಕೂತು ನಮ್ಮ ಸಹಾಯಕ್ಕೆ ಬಂದಿದ್ದಾರೆ. ಈಗಾಗಲೇ ಕಲ್ಲಂಗಡಿ ಖರೀದಿ ಮಾಡಿಕೊಂಡು ಹೊಗಿದ್ದಾರೆ. ನನ್ನ ಬೆಳೆಗೆ ಸಿಗಬೇಕಾದ ಹಣ ನೇರವಾಗಿ ಅಕೌಂಟ್ಗೆ ಟ್ರಾನ್ಸ್ಫರ್ ಮಾಡಲಿದ್ದಾರೆ ಎಂದಿದ್ದಾರೆ.
ಹೈದರಾಬಾದ್ ಮಾರುಕಟ್ಟೆ ಬಂದ್ ಆಗಿದ್ದರಿಂದ ನಮ್ಮ ಭಾಗರ ರೈತರಿಗೆ ಸಮಸ್ಯೆ ಆಗಿದೆ. ವರ್ಷಕ್ಕೆ 3-4 ಲಕ್ಷ ರೂ. ಆದಾಯ ಬರುತ್ತಿತ್ತು. ಆದರೆ ಕೊರೊನಾ ಹೊಡೆತಕ್ಕೆ ಎಲ್ಲವೂ ಬುಡಮೇಲಾಗಿದೆ. ಇಂತಹ ಸಂದರ್ಭದಲ್ಲಿ ನಮ್ಮ ಸಹಾಯಕ್ಕೆ ಬಂದ ಉಪೇಂದ್ರ ಅವರಿಗೆ ಕೃತಜ್ಞತೆಗಳು ಎಂದು ಹೇಳಿಕೊಂಡಿದ್ದಾರೆ.
