ಬಳ್ಳಾರಿ: ಹೈದರಾಬಾದ್ ಕರ್ನಾಟಕ ಭಾಗದ ರೈತರ ಜೀವನಾಡಿಯಾಗಿರುವ ತುಂಗಭದ್ರಾ ಜಲಾಶಯಕ್ಕೆ ಕಳೆದೊಂದು ವಾರದಲ್ಲೇ ಒಳಹರಿವು ಗಣನೀಯ ಪ್ರಮಾಣದಲ್ಲಿ ಏರಿಳಿತ ಕಂಡಿದೆ.
ಜುಲೈ 9ರಂದು 14,911 ಕ್ಯೂಸೆಕ್ ನೀರು, 10ರಂದು 12,875 ಕ್ಯೂಸೆಕ್ ನೀರು ಹರಿದು ಬಂದಿದ್ದು, ಮೊದಲ ದಿನಕ್ಕಿಂತಲೂ ಎರಡನೇ ದಿನ 2,036 ಕ್ಯೂಸೆಕ್ನಷ್ಟು ಒಳಹರಿವು ತಗ್ಗಿದೆ. 11ರಂದು 12,932 ಕ್ಯೂಸೆಕ್ನಷ್ಟು ಒಳಹರಿವು ಇದ್ದು, ಕೇವಲ 57 ಕ್ಯೂಸೆಕ್ನಷ್ಟು ಒಳ ಹರಿವು ಹೆಚ್ಚಿದೆ. ನಾಲ್ಕನೇ (12ರಂದು) ದಿನಕ್ಕೆ ಅಂದಾಜು 20,560 ಕ್ಯೂಸೆಕ್ನಷ್ಟು ನೀರು ಹರಿದುಬಂದಿದ್ದು, 7628 ಕ್ಯೂಸೆಕ್ ನೀರು ಒಳಹರಿವು ಹೆಚ್ಚಿದೆ. ಐದನೇ ದಿನಕ್ಕೆ (13 ರಂದು) ಅಂದಾಜು 26,945 ಕ್ಯೂಸೆಕ್ ನೀರು ಹರಿದುಬಂದಿದೆ. ಆರನೇ ದಿನಕ್ಕೆ (14ರಂದು) 20,061 ಕ್ಯೂಸೆಕ್ ನೀರು ಹರಿದುಬಂದಿದೆ. ಏಳನೇ ದಿನಕ್ಕೆ (15ರಂದು) ಕೇವಲ 15,026 ಕ್ಯೂಸೆಕ್ ನೀರು ಬಂದಿದೆ.
ಜಿಲ್ಲೆಯಲ್ಲಿ ಮುಂಗಾರು ಹಂಗಾಮಿನ ಮಳೆ ಶುರುವಾಗಿ ಒಂದೂವರೆ ತಿಂಗಳಾದ್ರೂ ಸಮರ್ಪಕ ಮಳೆ ಸುರಿದಿಲ್ಲ. ಈವರೆಗೂ ಕೇವಲ 10ರಷ್ಟು ಮಾತ್ರ ಬಿತ್ತನೆ ಕಾರ್ಯವಾಗಿದೆ. ಉಳಿದಂತೆ ಮಳೆಯಿಲ್ಲ, ಬಿತ್ತನೆಯಿಲ್ಲ. ಜಲಾಶಯಕ್ಕಾದರೂ ನೀರು ಬಂದಿದೆಯಾ ಎಂದುಕೊಂಡರೆ ಅದೂ ಇಲ್ಲ. ಬಳ್ಳಾರಿ, ಕೊಪ್ಪಳ ಹಾಗೂ ರಾಯಚೂರು ಜಿಲ್ಲೆಯ ರೈತರು ಹಾಗೂ ನೆರೆಯ ಆಂಧ್ರ ಹಾಗೂ ತೆಲಂಗಾಣದ ರೈತರು ಇದೇ ಟಿಬಿ ಡ್ಯಾಂ ನೀರು ನಂಬಿದ್ದಾರೆ.
ಕಳೆದೊಂದು ವಾರದಿಂದ ಜಲಾಶಯಕ್ಕೆ ಐದು ಟಿಎಂಸಿ ನೀರು ಬಂದಿದೆ. ಸದ್ಯ ಜಲಾಶಯದಲ್ಲಿ 9 ಟಿಎಂಸಿ ನೀರು ಸಂಗ್ರಹವಾಗಿದ್ದು, 15 ಸಾವಿರ ಕ್ಯೂಸೆಕ್ ನೀರು ಒಳಹರಿವು ಇದೆ. ಕಳೆದ ವರ್ಷ ಬೆಳೆಗೆ ಡ್ಯಾಂನಿಂದ ನೀರು ಪಡೆದಿದ್ದೆವು. ಈ ಬಾರಿ ಇದೀಗ ಡ್ಯಾಂಗೆ ನೀರು ಬರುತ್ತದೋ ಇಲ್ಲವೋ ಎಂದು ರೈತರು ಆತಂಕ ವ್ಯಕ್ತಪಡಿಸಿದ್ದಾರೆ.
ಕಳೆದ ವರ್ಷ ಇದೇ ತಿಂಗಳಲ್ಲಿ 50 ಟಿಎಂಸಿ ನೀರು ಸಂಗ್ರಹವಾಗಿತ್ತು. ಡ್ಯಾಂ ತುಂಬಿ ಬರೋಬ್ಬರಿ 230 ಟಿಎಂಸಿ ನೀರನ್ನು ನದಿ ಮೂಲಕ ಹರಿಬಿಡಲಾಗಿತ್ತು. ಈ ಬಾರಿ ಜುಲೈ ತಿಂಗಳಾದ್ರೂ ಕೇವಲ ಏಳು ಟಿಎಂಸಿ ನೀರು ಬಂದಿದೆ. ಕಳೆದ ವರ್ಷ ಆಗಸ್ಟ್ - ಜುಲೈ ತಿಂಗಳ ಅಂತ್ಯದ ವೇಳೆಗೆ ಜಲಾಶಯದಲ್ಲಿ 100 ಟಿಎಂಸಿ ನೀರು ಸಂಗ್ರಹವಾಗಿತ್ತು.
ಮಲೆನಾಡಿನಲ್ಲಿ ಭಾರಿ ಮಳೆಯಾಗದ ಹಿನ್ನೆಲೆ ತುಂಗೆಯಲ್ಲಿ ಸಾಕಷ್ಟು ನೀರಿಲ್ಲ. ಇನ್ನು 133 ಟಿಎಂಸಿ ನೀರು ಸಂಗ್ರಹ ಸಾಮರ್ಥ್ಯವಿದ್ದರೂ ಹೂಳಿನಿಂದಾಗಿ 33 ಟಿಎಂಸಿಯಷ್ಟು ನೀರು ಸಂಗ್ರಹದ ಸಾಮರ್ಥ್ಯ ಕಡಿಮೆಯಾಗಿದೆ. ಹೂಳೆತ್ತುವ ಬಗ್ಗೆ ಸರ್ಕಾರ ಕೇವಲ ಮಾತಿನಲ್ಲಿ ಕಾಲಹರಣ ಮಾಡುತ್ತಿದೆ ಎಂದು ರೈತರು ದೂರಿದ್ದಾರೆ.
