ಬಳ್ಳಾರಿ : ಜಿಲ್ಲೆಯ ಅರಣ್ಯ ಪ್ರದೇಶದಲ್ಲಿ 28,08,000 ರೂ. ಮೌಲ್ಯದ 270 ಕೆಜಿ ಶ್ರೀಗಂಧದ ಕಟ್ಟಿಗೆಗಳನ್ನು 3 ಜನ ಆರೋಪಿಗಳು ಅಕ್ರಮವಾಗಿ ಸಾಗಣೆ ಮಾಡುತ್ತಿದ್ದರು. ಖಚಿತ ಮಾಹಿತಿ ಮೇರೆಗೆ ಸಂಡೂರಿನ ಪೊಲೀಸರು ಇಂದು ಬೆಳಗಿನ ಜಾವ ಇವರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಸಂಡೂರು-ಹೊಸಪೇಟೆ ರಸ್ತೆಯಲ್ಲಿ ಬರುವ ಬಾವಿಹಳ್ಳಿ ಕ್ರಾಸ್ ಬಳಿ ಸುಶೀಲಾನಗರ ತಾಂಡಾದ ಇ. ಆರ್ ರಾಮ ಲೀನಾನಾಯ್ಕ್, ಆರ್. ಮಂಜುನಾಥ್ ನಾಯ್ಕ್, ಕಿರಣ್ ನಾಯ್ಕ್ ಎಂಬ ಆರೋಪಿಗಳನ್ನು ಬಂಧಿಸಲಾಗಿದೆ.
ಆರೋಪಿಗಳನ್ನು ಸೆರೆ ಹಿಡಿಯುವಲ್ಲಿ ಡಿಎಸ್ಪಿ ಮಲ್ಲೇಶ್ ದೊಡ್ಡಮನಿ ಹಾಗೂ ಡಿಸಿಆರ್ಬಿ ಹಾಗೂ ಅವರ ನೇತೃತ್ವದ ತಂಡ ಹಾಗೂ ಸಂಡೂರು ಠಾಣೆ ಅಧಿಕಾರಿ ಹಾಗೂ ಸಿಬ್ಬಂದಿ ಭಾಗವಹಿಸಿದ್ದಾರೆ. ಈ ವೇಳೆ ಇತರೆ ಆರೋಪಿಗಳು ಪರಾರಿಯಾಗಿದ್ದಾರೆ.
8 ಲಕ್ಷ ರೂ. ಮೌಲ್ಯದ ಜಿನಾನ್ ಪಿಕ್-ಅಪ್ ವಾಹನ, 6 ಲಕ್ಷ ರೂ. ಮೌಲ್ಯದ ಟಯೋಟಾ ಗ್ಲಾಂಜಾ ಕಾರು ಸೇರಿದಂತೆ ಒಟ್ಟು 42,08,000 ರೂ. ಗಂಧದ ಕಟ್ಟಿಗೆ ಹಾಗೂ ವಾಹನಗಳನ್ನು ಜಪ್ತಿ ಮಾಡಲಾಗಿದೆ. ಈ ಜಾಲವನ್ನು ಬೇಧಿಸಿದ ಇಡೀ ತಂಡಕ್ಕೆ ಹಾಗೂ ಅಧಿಕಾರಿಗಳನ್ನು ಎಸ್ಪಿ ಸೈದಲು ಅಡಾವತ್ ಅವರು ಅಭಿನಂದಿಸಿ, ನಗದು ಬಹುಮಾನವನ್ನು ಘೋಷಿಸಿದ್ದಾರೆ.
ಓದಿ: ಕಾಂಗ್ರೆಸ್ ಭ್ರಷ್ಟಾಚಾರದ ಗಂಗೋತ್ರಿ: ಸಿದ್ದರಾಮಯ್ಯಗೆ ಅಚ್ಛೇದಿನ್ ಬರಲ್ಲ ಎಂದ ಸಿಎಂ
