ಬಳ್ಳಾರಿ: ಇಂದಿನಿಂದ ಸಂಪೂರ್ಣ ಲಾಕ್ಡೌನ್ ಜಾರಿಗೊಂಡ ಹಿನ್ನೆಲೆ ಕಾಲ್ನಡಿಗೆಯಲ್ಲೇ ತೆರಳುತ್ತಿದ್ದ ವಯೋವೃದ್ಧೆಯನ್ನ ಬೈಕ್ ಮೇಲೆ ಹತ್ತಿಸಿ ಸುರಕ್ಷಿತ ಸ್ಥಳಕ್ಕೆ ಕಳಿಸುವ ಮೂಲಕ ಮುಖೇನ ಸಂಚಾರಿ ಠಾಣೆಯ ಎಎಸ್ಐ ಮಾನವೀಯತೆ ಮೆರೆದಿದ್ದಾರೆ.
ನಗರದ ಹೃದಯ ಭಾಗವಾದ ಗಡಿಗಿ ಚನ್ನಪ್ಪ ವೃತ್ತದಲ್ಲಿಂದು ಕರ್ತವ್ಯದಲ್ಲಿದ್ದ ಸಂಚಾರಿ ಠಾಣೆಯ ಎಎಸ್ಐ ಹೆಚ್. ನಾಗಭೂಷಣ ಅವರು, ವಯೋವೃದ್ಧೆವೋರ್ವರು ಊರುಗೋಲಿನ ಸಹಾಯದೊಂದಿಗೆ ಕಾಲ್ನಡಿಗೆಯಲ್ಲಿ ಬರುತ್ತಿರೋದನ್ನ ಗಮನಿಸಿದರು. ಈ ವೇಳೆ ವ್ಯಕ್ತಿಯ ಬೈಕ್ ಅನ್ನ ತಡೆದು, ಅಜ್ಜಿಯನ್ನು ಬೈಕ್ ಮೇಲೆ ಹತ್ತಿಸಿ, ಮನೆಗೆ ಕಳಿಸಿದರು. ಅಲ್ಲದೇ, ತಮ್ಮಲ್ಲಿದ್ದ ವಾಕಿಟಾಕಿಯಲ್ಲಿ ಮುಂದಿನ ಹಂತದಲ್ಲಿ ಬಂದೋಬಸ್ತ್ನಲ್ಲಿದ್ದ ಪೊಲೀಸ್ ಸಿಬ್ಬಂದಿಗೆ ಈ ಬೈಕ್ ಅನ್ನ ತಡೆಯದಂತೆ ಸೂಚನೆ ನೀಡಿದರು.
ಶೇಕ್ ಹ್ಯಾಂಡ್ ನಾಗಭೂಷಣ ಎಂದೇ ಖ್ಯಾತಿ ಗಳಿಸಿರೋ ಎಎಸ್ಐ ಹೆಚ್.ನಾಗಭೂಷಣ ಅವರು, ಲಾಕ್ಡೌನ್ ಬಂದೋಬಸ್ತ್ನಲ್ಲೂ ಅಗತ್ಯವಿರುವ ಸಾರ್ವಜನಿಕರ ಸಂಚಾರಕ್ಕೆ ಯಾವುದೇ ಅಡೆತಡೆ ಆಗದಂತೆ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡುವ ಮೂಲಕ ಜನರ ಪ್ರೀತಿಗೆ ಪಾತ್ರರಾಗಿದ್ದಾರೆ.
