ಬಳ್ಳಾರಿ ಆರ್​ಟಿಒ ಕಚೇರಿ ಮೇಲೆ ಎಸಿಬಿ ದಾಳಿ

ಬಳ್ಳಾರಿ ಜಿಲ್ಲೆಯ ಬಳ್ಳಾರಿ ಪ್ರಾದೇಶಿಕ ಸಾರಿಗೆ ಅಧಿಕಾರಿ ಕಚೇರಿಯ ಮೇಲೆ ಭ್ರಷ್ಟಾಚಾರ ನಿಗ್ರಹ ದಳದ ಅಧಿಕಾರಿಗಳು ಸೋಮವಾರ ದಾಳಿ ನಡೆಸಿ ಆರ್​​ಟಿಒ ಕಚೇರಿಯ ಅಧಿಕಾರಿಗಳು, ಸಿಬ್ಬಂದಿ  ಮತ್ತು ಖಾಸಗಿ ಏಜೆಂಟ್ಗಳ​ ತನಿಖೆ ನಡೆಸಿದರು.

ಬಳ್ಳಾರಿ: ನಗರದ ಆರ್​​ಟಿಒ ಕಚೇರಿ ಮೇಲೆ ಎಸಿಬಿ ಅಧಿಕಾರಿಗಳು ದಾಳಿ ನಡೆಸಿದ್ದು, 33 ಖಾಸಗಿ ಏಜೆಂಟ್​​ಗಳಿಂದ ಲಕ್ಷಾಂತರ ರೂ. ನಗದು ವಶಕ್ಕೆ ಪಡೆದಿದ್ದಾರೆ.

ಜಿಲ್ಲೆಯ ಬಳ್ಳಾರಿ ಪ್ರಾದೇಶಿಕ ಸಾರಿಗೆ ಅಧಿಕಾರಿ ಕಚೇರಿಯ ಮೇಲೆ ಭ್ರಷ್ಟಾಚಾರ ನಿಗ್ರಹ ದಳದ ಅಧಿಕಾರಿಗಳು ಸೋಮವಾರ ದಾಳಿ ನಡೆಸಿ ಆರ್​​ಟಿಒ ಕಚೇರಿಯ ಅಧಿಕಾರಿಗಳು, ಸಿಬ್ಬಂದಿ ಮತ್ತು ಖಾಸಗಿ ಏಜೆಂಟರುಗಳ ತನಿಖೆ ನಡೆಸಿದರು. ಕಚೇರಿಯಲ್ಲಿ ವಾಹನಗಳ ನೋಂದಣಿ, ಚಾಲನಾ ಪರವಾನಗಿ, ನಿರ್ವಾಹಕ ಲೈಸನ್ಸ್, ವಾಹನಗಳ ಪರ್ಮಿಟ್ ಇನ್ನಿತರ ಸರ್ಕಾರಿ ಕೆಲಸಗಳಿಗಾಗಿ ಅಧಿಕಾರಿಗಳು, ಸಿಬ್ಬಂದಿ, ಏಜೆಂಟ್​​ಗಳು ಲಂಚ ಪಡೆಯುತ್ತಾರೆ ಎಂಬ ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆದಿದೆ.

ದಾಳಿ ವೇಳೆ 33 ಖಾಸಗಿ ಏಜೆಂಟ್​​ಗಳಿಂದ 3,94,000 ರೂ. ವಶಪಡಿಸಿಕೊಳ್ಳಲಾಗಿದೆ. ಶೋಧನಾ ಕಾಲಕ್ಕೆ ದಾಖಲಾತಿಗಳ ಅನ್ವಯ ವಹಿವಾಟು ನಡೆಸಿದ ಮೊತ್ತ 3,41,000 ರೂ. ಇದನ್ನು ಸ್ವೀಕೃತಿ ಪಡೆದು ಸಾರಿಗೆ ಅಧಿಕಾರಿಗಳಿಗೆ ಹಣ ಹಿಂತಿರುಗಿಸಲಾಗಿದೆ. ಸೋಮವಾರ ಬ್ಯಾಂಕ್​​ಗೆ ಜಮಾ ಮಾಡಬೇಕಾದ ಹಗರಿ ಚೆಕ್​​ ಪೋಸ್ಟ್​​ನಲ್ಲಿ ಸಂಗ್ರಹವಾದ ಮೊತ್ತ 1,96,000 ರೂಪಾಯಿ ಆಗಿದೆ. ಇದನ್ನು ಸಹ ಸ್ವೀಕೃತಿ ಪಡೆದು ಸಾರಿಗೆ ಅಧಿಕಾರಿಗಳಿಗೆ ಹಣ ಹಿಂತಿರುಗಿಸಲಾಗಿದೆ ಎಂದು ಎಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ. ಸಂಜೆ 7 ಗಂಟೆವರೆಗೆ ಎಸಿಬಿ ತಂಡ ತನಿಖೆ ನಡೆಸಿದೆ.

ಖಾಸಗಿ ಏಜೆಂಟ್​​ಗಳಾದ ಪ್ರಕಾಶ್, ಖಾದರ್, ಅಬ್ದುಲ್, ಪಾಲಾಕ್ಷಿ ಸುರೇಶ್ ಎಂಬುವರನ್ನು ವಶಕ್ಕೆ ಪಡೆದು ತನಿಖೆ ಮುಂದುವರಿಸಲಾಗುತ್ತದೆ ಎಂದು ಎಸಿಬಿ ಅಧಿಕಾರಿಗಳು ತಿಳಿಸಿದರು.

ಭ್ರಷ್ಟಾಚಾರ ನಿಗ್ರಹ ದಳ ಬಳ್ಳಾರಿ ಡಿವೈಎಸ್​​ಪಿ ಚಂದ್ರಕಾಂತ್ ಪೂಜಾರ್, ಕೊಪ್ಪಳ ಜಿಲ್ಲೆ ಡಿವೈಎಸ್​​ಪಿ ರುದ್ರ ಪೂಜಿನ ಕೊಪ್ಪ, ಬಳ್ಳಾರಿ ಇನ್ಸ್​ಪೆಕ್ಟರ್ ಶ್ರೀಧರ್ ದೊಡ್ಡಿ, ಕೊಪ್ಪಳ ಇನ್ಸ್​ಪೆಕ್ಟರ್ ಬಿಳಿಮಗಿ ತಂಡದಿಂದ ದಾಳಿ ನಡೆದಿದೆ.