ಬೆಳಗಾವಿ : ಮಾನವೀಯ ಸಂಬಂಧಗಳೇ ನಶಿಸಿ ಹೋಗಿರುವ ಇಂದಿನ ಕಾಲಘಟ್ಟದಲ್ಲಿ ಸ್ವಂತ ಮಕ್ಕಳೇ ತಂದೆ - ತಾಯಿಯನ್ನು ಬೀದಿಗೆ ಬಿಟ್ಟು ಬಿಡುತ್ತಾರೆ. ಹೀಗೆ ಅತಂತ್ರವಾದರಿಗೆ ನಿರಾಶ್ರಿತ ಕೇಂದ್ರಗಳು, ವೃದ್ಧಾಶ್ರಮಗಳು, ಅನಾಥಾಶ್ರಮಗಳು ಬೆಳಕಾಗಿವೆ. ಅಲ್ಲದೇ, ನಿರಾಶ್ರಿತ ಕೇಂದ್ರಗಳಲ್ಲಿ ನಿರ್ಗತಿಕರಿಗೆ ಪಾಲಿನ ಅನ್ನ, ಆಶ್ರಯದ ಜೊತೆಗೆ ಕೌಶಲ್ಯ ತರಬೇತಿ ನೀಡಲಾಗುತ್ತಿದೆ.
ನಗರ ನಿರಾಶ್ರಿತರ ಜೀವನೋಪಾಯ ಮತ್ತು ಕೌಶಲ್ಯ ಅಭಿವೃದ್ಧಿಗಾಗಿ ದೀನದಯಾಳ ಅಂತ್ಯೋದಯ ಯೋಜನೆಯಡಿ ಕೇಂದ್ರ ಸರ್ಕಾರ ನಿರಾಶ್ರಿತ ಕೇಂದ್ರಗಳನ್ನು ತೆರೆಯಲಾಗದೆ. ಸುಪ್ರೀಂಕೋರ್ಟ್ ಆದೇಶದಂತೆ ಒಂದು ಲಕ್ಷ ಜನಸಂಖ್ಯೆಗೆ 1 ನಿರಾಶ್ರಿತ ಕೇಂದ್ರ ಇರಬೇಕು. ಹಾಗಾಗಿ ಬೆಳಗಾವಿ ನಗರದ 5 ಲಕ್ಷ ಜನಸಂಖ್ಯೆ ಅನುಸಾರ ಒಟ್ಟು 5 ಕೇಂದ್ರಗಳು ಮಹಾನಗರ ಪಾಲಿಕೆಯಡಿ ಕಾರ್ಯನಿರ್ವಹಿಸುತ್ತಿವೆ. ಇದರಲ್ಲಿ ಒಂದು ಮಹಿಳೆಯರಿಗೆ ಮೀಸಲಿದೆ. ಬೆಳಗಾವಿಯ ಖಾಸಬಾಗ, ಮಹಾಂತೇಶ ನಗರ, ಮಾಳಮಾರುತಿ ಹೊರವಲಯ, ಮಹಾದ್ವಾರ ರೋಡ್, ರಾಮತೀರ್ಥ ನಗರದ ಕೇಂದ್ರಗಳಲ್ಲಿ ಪುರುಷ ಮತ್ತು ಮಹಿಳೆಯರು ಸೇರಿ ಒಟ್ಟು 92 ನಿರಾಶ್ರಿತರು ಆಶ್ರಯ ಪಡೆದಿದ್ದಾರೆ.
ಬೆಳಗಾವಿಯ ಐದು ಕೇಂದ್ರಗಳನ್ನು ಜಯ ಭಾರತ ಮಾತಾ ನಗರ ಮತ್ತು ಗ್ರಾಮೀಣ ಅಭಿವೃದ್ಧಿ ಸಂಸ್ಥೆಯು ಮಹಾನಗರ ಪಾಲಿಕೆ ಅನುದಾನದಡಿ ನಿರ್ವಹಿಸುತ್ತಿದೆ. ಸಾರ್ವಜನಿಕರು ನೀಡುವ ಮಾಹಿತಿ ಮೇರೆಗೆ ಸ್ಥಳಕ್ಕೆ ತೆರಳುವ ಇಲ್ಲಿನ ಸಿಬ್ಬಂದಿ ನಿರಾಶ್ರಿತರಿಗೆ ವೈದ್ಯಕೀಯ ತಪಾಸಣೆ ಮಾಡಿಸಿ, ನಿರಾಶ್ರಿತ ಕೇಂದ್ರದಲ್ಲಿ ದಾಖಲಿಸಿಕೊಳ್ಳುತ್ತಾರೆ. ಅವರಿಗೆ ಇಲ್ಲಿ ಉಚಿತ ಊಟ, ವಸತಿ ನೀಡಲಾಗುತ್ತಿದೆ.
ಇನ್ನು ಟೇಲರಿಂಗ್, ಮೇಣದ ಬತ್ತಿ, ಡಿಶ್ ವಾಶ್ ಲಿಕ್ವಿಡ್, ಪಿನಾಯಿಲ್ ತಯಾರಿಕೆ ಸೇರಿ ಮತ್ತಿತರ ಕೌಶಲ್ಯ ಕಲಿಸಲಾಗುತ್ತಿದೆ. ಈ ಮೂಲಕ ಸ್ವಾವಲಂಬಿಗಳಾಗಿ ಅವರು ಬದುಕಲು ಪ್ರೇರೆಪಿಸಲಾಗುತ್ತಿದೆ. ಅಲ್ಲದೇ ಇಲ್ಲಿ ಆಶ್ರಯ ಪಡೆದಿರುವ ಕೆಲವರು ಕೆಎಂಎಫ್, ಹೋಟೆಲ್, ಕಿರಾಣಿ ಅಂಗಡಿ ಕೆಲಸ ಮಾಡುತ್ತಿದ್ದಾರೆ. ಕೆಲವರು ಸೆಕ್ಯೂರಿಟಿ ಗಾರ್ಡ್ ಆಗಿಯೂ ಹೊಸ ಬದುಕು ಕಟ್ಟಿಕೊಳ್ಳುವತ್ತ ಹೆಜ್ಜೆ ಇಡುತ್ತಿದ್ದಾರೆ.
ಖಾಸಬಾಗ ಕೇಂದ್ರದಲ್ಲಿ ಕಳೆದ ಮೂರು ವರ್ಷಗಳಿಂದ ಆಶ್ರಯ ಪಡೆದಿರುವ ಪ್ರಸಾದ ಕುಲಕರ್ಣಿ ಈಟಿವಿ ಭಾರತ ಜೊತೆಗೆ ಮಾತನಾಡಿ, ಒಂದು ಕುಟುಂಬದಂತೆ ನಾವೆಲ್ಲಾ ಇಲ್ಲಿ ವಾಸವಿದ್ದೇವೆ. ಯಾವುದಕ್ಕೂ ಕೊರತೆ ಆಗದಂತೆ ನೋಡಿಕೊಳ್ಳುತ್ತಾರೆ. ಇಲ್ಲಿ ಶಿಸ್ತು, ಕಂಪ್ಯೂಟರ್ ಸಾಫ್ಟವೇರ್ ಕೌಶಲ್ಯಗಳನ್ನು ಕಲಿಯುತ್ತಿದ್ದೇನೆ ಎಂದರು.
ಕೇಂದ್ರಗಳ ಸಂಯೋಜಕ ರಾವಸಾಹೇಬ ಶಿರಹಟ್ಟಿ ಮಾತನಾಡಿ, ಕೌಶಲ್ಯ ಅಭಿವೃದ್ಧಿಗೆ ಆದ್ಯತೆ ನೀಡುತ್ತೇವೆ. ಪಿಎಂ ಸ್ವನಿಧಿ ಯೋಜನೆಯಡಿ ಕೆಲವರಿಗೆ ಸ್ವಂತ ಉದ್ಯೋಗ ಕೈಗೊಳ್ಳಲು ಲೋನ್ ಕೊಡಿಸಿದ್ದೇವೆ. 2011ರಿಂದ ಈವರೆಗೆ ಇಲ್ಲಿಂದ ಆಶ್ರಯ ಪಡೆದು ಹೊರ ಹೋಗಿರುವ ಸುಮಾರು 150ಕ್ಕೂ ಹೆಚ್ಚು ಜನರು ಹೊಸ ಬದುಕು ಕಟ್ಟಿಕೊಂಡಿದ್ದಾರೆ. ಹಾಗಾಗಿ, ಸೂರು ಇಲ್ಲದೇ ಬೀದಿ ಬದಿ ಮಲಗುವ ಜನರು ಇಲ್ಲಿಗೆ ಬಂದರೆ ನಿಮಗೂ ಒಳ್ಳೆಯ ವ್ಯವಸ್ಥೆ ಮಾಡುತ್ತೇವೆ ಎಂದು ಕೋರಿದರು.
ಇದನ್ನೂ ಓದಿ : ಯುವಜನರಿಗೆ ಆರ್ಥಿಕ, ಸಾಮಾಜಿಕ ಶಕ್ತಿ ನೀಡಲು ಯುವನಿಧಿ ಕೊಟ್ಟಿದ್ದೇವೆ: ಡಿಸಿಎಂ ಡಿ ಕೆ ಶಿವಕುಮಾರ್
