ಅಥಣಿ (ಬೆಳಗಾವಿ): ಕಳೆದ ವರ್ಷದ ಕಬ್ಬಿನ ಬಾಕಿ ಬಿಲ್ ಬಿಡುಗಡೆ ಹಾಗೂ ಈ ವರ್ಷದ ಹಂಗಾಮಿನ ದರ ನಿಗದಿಪಡಿಸುವಂತೆ ಕೃಷ್ಣಾ ಸಕ್ಕರೆ ಕಾರ್ಖಾನೆಯ ಆಡಳಿತ ಮಂಡಳಿಗೆ ಕರ್ನಾಟಕ ರಾಜ್ಯರೈತ ಸಂಘ ಹಾಗೂ ಹಸಿರು ಸೇನೆ ವತಿಯಿಂದ ಮನವಿ ಸಲ್ಲಿಸಲಾಯಿತು.
ಈ ವೇಳೆ ಕರ್ನಾಟಕ ರೈತ ಸಂಘದ ಜಿಲ್ಲಾ ಉಪಾಧ್ಯಕ್ಷ ಎ ಬಿ ಹಳ್ಳೂರ ಮಾತನಾಡಿ, ಅಥಣಿಯ ಕೃಷ್ಣಾ ಸಕ್ಕರೆ ಕಾರ್ಖಾನೆಯವರು 2018/19ನೇ ಸಾಲಿನ ಪ್ರತಿ ಟನ್ಗೆ ನೀಡಬೇಕಿದ್ದ ಬಾಕಿ ಹಣವಾದ 200 ರೂ. ಬಿಡುಗಡೆ ಮಾಡುವಂತೆ ಮತ್ತು 2019/20ನೇ ಸಾಲಿನ ಸರ್ಕಾರದ ಎಫ್ಆರ್ಪಿ ದರದ ಪ್ರಕಾರ ₹2750 ಬಿಲ್ ನೀಡಬೇಕಿತ್ತು. ಆದರೆ, ₹2700 ಮಾತ್ರ ರೈತರಿಗೆ ನೀಡಿರುತ್ತಾರೆ.
ಬಾಕಿ ಉಳಿಸಿಕೊಂಡಿರುವ 50 ರೂ. ನೀಡಬೇಕು ಹಾಗೂ ಕಳೆದ ವರ್ಷಗಳ ಬಾಕಿ ಹಣವನ್ನೂ ರೈತರಿಗೆ ಜಮೆ ಮಾಡಬೇಕು ಮತ್ತು ಕಾರ್ಖಾನೆಯವರೇ ಹೇಳಿದ ಹಾಗೆ ಪ್ರತಿ ಟನ್ಗೆ ಹೆಚ್ಚುವರಿಯಾಗಿ 200 ರೂ. ಕೊಡುವುದಾಗಿ ಭರವಸೆ ನೀಡಿದ್ದರು. ಆದರೆ, ಈವರೆಗೆ ಆ ಬಿಲ್ ನೀಡಿಲ್ಲ. ಕಳೆದ ವರ್ಷದ ಬಾಕಿ ಬಿಲ್ ನೀಡುವುದರ ಜೊತೆಗೆ ಈ ವರ್ಷದ ಬೆಲೆ ನಿಗದಿ ಮಾಡಿ ಕಾರ್ಖಾನೆ ಪ್ರಾರಂಭಿಸಬೇಕು ಎಂದರು.
