ರಮೇಶ್​ ಜಾರಕಿಹೊಳಿ ಮುಂದಿನ ಜಲಸಂಪನ್ಮೂಲ ಸಚಿವ: ಅಭಿಮಾನಿಗಳಿಂದ ಪ್ರಚಾರ

ಉಪಚುನಾವಣೆ ಹೊಸ್ತಿಲ್ಲಲಿರುವ ರಮೇಶ್​ ಜಾರಕಿಹೊಳಿಗೆ ಬಿಜೆಪಿ ಸರ್ಕಾರದಲ್ಲಿ ಜಲಸಂಪನ್ಮೂಲ ಖಾತೆ ಸಿಗಬಹುದೆಂದು ಅಭಿಮಾನಿಗಳು ನಿರೀಕ್ಷೆಯಿಟ್ಟಿದ್ದು, ನಮ್ಮ ಸಾಹುಕಾರ  ಬಿಜೆಪಿ ಸರ್ಕಾರದ ಮುಂದಿನ ಜಲಸಂಪನ್ಮೂಲ ಸಚಿವ ಎಂದು ಪ್ರಚಾರ ಮಾಡುತ್ತಿದ್ದಾರೆ.

ಬೆಳಗಾವಿ: ನಮ್ಮ ಸಾಹುಕಾರ ಬಿಜೆಪಿ ಸರ್ಕಾರದ ಮುಂದಿನ ಜಲಸಂಪನ್ಮೂಲ ಸಚಿವ ಎಂದು ಅನರ್ಹ ಶಾಸಕ ರಮೇಶ್ ಜಾರಕಿಹೊಳಿ ಬೆಂಬಲಿಗರು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಚಾರಪಡಿಸುತ್ತಿದ್ದಾರೆ.

ಉಪಚುನಾವಣೆ ಫಲಿತಾಂಶಕ್ಕೂ ಮೊದಲೇ ಅಭಿಮಾನಿಗಳು ರಮೇಶ್​ ಜಾರಕಿಹೊಳಿಗೆ ಖಾತೆ ಫಿಕ್ಸ್ ಮಾಡುತ್ತಿರುವುದು ಕುತೂಹಲ ಮೂಡಿಸಿದೆ. ಕಳೆದ 25 ವರ್ಷಗಳಿಂದ ಕಾಂಗ್ರೆಸ್​ನಲ್ಲಿದ್ದ ರಮೇಶ್​ ಜಾರಕಿಹೊಳಿ ನಿನ್ನೆಯಷ್ಟೇ ಬಿಜೆಪಿ ಸೇರಿದ್ದಾರೆ‌. ಅಲ್ಲದೇ ಗೋಕಾಕ್​ ಕ್ಷೇತ್ರದ ಉಪಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ಟಿಕೆಟ್​ ಗಿಟ್ಟಿಸಿಕೊಂಡಿದ್ದಾರೆ. ಬೆಂಗಳೂರಿನಿಂದ ರಮೇಶ್​ ಜಾರಕಿಹೊಳಿ ಇಂದು ಗೋಕಾಕ್​ಗೆ ಆಗಮಿಸಲಿದ್ದು, ಸ್ವಾಗತಿಸಲು ಸಕಲ ಸಿದ್ಧತೆ ಮಾಡಿಕೊಳ್ಳಲಾಗಿದೆ.

ಅಭಿಮಾನಿಗಳಿಂದ ಪ್ರಚಾರ

ಮೈತ್ರಿ ಸರ್ಕಾರದಲ್ಲಿ ರಮೇಶ್​ ಜಾರಕಿಹೊಳಿ ಜಲಸಂಪನ್ಮೂಲ ಖಾತೆ ಮೇಲೆ ಕಣ್ಣಿಟ್ಟಿದ್ದರು. ಆದರೆ ಆ ಖಾತೆಯನ್ನು ಡಿ.ಕೆ. ಶಿವಕುಮಾರ್​ಗೆ ವಹಿಸಲಾಗಿತ್ತು. ಜಲಸಂಪನ್ಮೂಲ ಖಾತೆ ನೀಡದಿದ್ದಕ್ಕೆ ಮೈತ್ರಿ ಸರ್ಕಾರದ ವಿರುದ್ಧ ಸಿಡಿದೆದ್ದಿದ್ದ ರಮೇಶ್​ ಜಾರಕಿಹೊಳಿ, ದೋಸ್ತಿ ಸರ್ಕಾರ ಕೆಡವುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಸದ್ಯ ಚುನಾವಣೆ ಹೊಸ್ತಿಲ್ಲಲಿರುವ ಜಾರಕಿಹೊಳಿಗೆ ಬಿಜೆಪಿ ಸರ್ಕಾರದಲ್ಲಿ ಜಲಸಂಪನ್ಮೂಲ ಖಾತೆ ಸಿಗಬಹುದೆಂದು ಅಭಿಮಾನಿಗಳು ನಿರೀಕ್ಷೆಯಿಟ್ಟಿದ್ದಾರೆ.

ಅಲ್ಲದೇ ಬಾಲಾಜಿ ಮಧುಕರ್​ ಯಾದವ್ ಎಂಬುವವರು, ರಮೇಶ್​ ಜಾರಕಿಹೊಳಿ ಸರಳತೆ ಹಾಗೂ ಸಮಾನತೆಯ ಪ್ರತೀಕ. ಬೆಳಗಾವಿ ಜಿಲ್ಲೆಯ ಹುಲಿ, ಹಠವಾದಿ ರಾಜಕಾರಣಿಯಾಗಿದ್ದಾರೆ. ಇವರೇ ಮುಂದಿನ ಜಲಸಂಪನ್ಮೂಲ ಸಚಿವ ಎಂದು ತನ್ನ ಫೇಸ್​ ಬುಕ್​ ಪುಟದಲ್ಲಿ ಬರೆದುಕೊಂಡಿದ್ದಾರೆ.