ಚಿಕ್ಕೋಡಿ: ಈರುಳ್ಳಿ ಬೆಲೆ ನೂರರ ಗಡಿ ದಾಟಿ ಹೋಟೆಲ್,ದಾಬಾ ಮಾಲೀಕರ ಕಣ್ಣಲ್ಲಿ ಕಣ್ಣೀರು ತರಿಸಿದೆ. ಬರುವ ಗ್ರಾಹಕರಿಗೆ ಈರುಳ್ಳಿ ನೀಡಲು ಹಿಂದೇಟು ಹಾಕುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ಉತ್ತರ ಕರ್ನಾಟಕ ಹಾಗೂ ಪಶ್ಚಿಮ ಮಹಾರಾಷ್ಟ್ರದ ಪ್ರತಿ ಹಳ್ಳಿಗಳ ಹೋಟೆಲ್ಗಳಲ್ಲಿ ಭಜ್ಜಿ ಹಾಗೂ ಖಾರದ ಭಡಂಗ್ (ಚುರುಮರಿ) ಖಾದ್ಯ ಫೇಮಸ್. ಈ ಖಾದ್ಯ ತಿನ್ನುವಾಗ ಉಳ್ಳಾಗಡ್ಡಿ ಬೇಕೇಬೇಕು.ಆದರೆ, ಏಕಾಏಕಿ ಈರುಳ್ಳಿ ಬೆಲೆ ಏರಿಕೆಯಿಂದಾಗಿ ಹೋಟೆಲ್ಗಳಲ್ಲಿ ಭಜ್ಜಿ, ಚುರುಮರಿಗಳಲ್ಲಿ ಈರುಳ್ಳಿ ಬದಲಾಗಿ ಕ್ಯಾಬೇಜ್ ಪೀಸ್ ಕೊಡುತ್ತಿದ್ದಾರೆ. ಇದು ಗ್ರಾಹಕರಿಗೆ ತೆಲೆನೋವಾಗಿದೆ. ಮೊದಲಿನಿಂದಲೂ ಭಜ್ಜಿ, ಭಡಂಗ ಜೊತೆ ಉಳ್ಳಾಗಡ್ಡಿ ತಿನ್ನುವಂತವರಿಗೆ ಈಗ ಸೌತೆಕಾಯಿ, ಕ್ಯಾಬೇಜ್ ತಿನ್ನಲ್ಲು ಆಗದೆ ಮಾಲೀಕರ ಜತೆ ವಾಗ್ವಾದಕ್ಕಿಳಿಯುತ್ತಿದ್ದಾರೆ.
ದರ ಹೆಚ್ಚಾಗಲು ಕಾರಣ : ಈರುಳ್ಳಿ ಬೆಳೆಯನ್ನು ಉತ್ತರ ಕರ್ನಾಟಕ ಹಾಗೂ ಮಹಾರಾಷ್ಟ್ರದಲ್ಲಿ ಹೆಚ್ಚಾಗಿ ಬೆಳೆಯುತ್ತಾರೆ. ಒಣ ಭೂಮಿಯಲ್ಲಿ ಮತ್ತು ಕಬ್ಬಿನ ಸಾಲಿನಲ್ಲಿ 2ನೇ ವಾಣಿಜ್ಯ ಬೆಳೆಯಾಗಿ ಹೆಚ್ಚಾಗಿ ಬೆಳೆಯುವುದು ಸಾಮಾನ್ಯ. ಆದರೆ, ಈ ವರ್ಷ ಬೇಸಿಗೆಯಲ್ಲಿ ಕೃಷ್ಣಾ ನದಿ ಸಂಪೂರ್ಣ ಬತ್ತಿರೋದರಿಂದ ಹಾಗೂ ಅತಿ ಮಳೆಯಿಂದಾಗಿ ನದಿಗೆ ಪ್ರವಾಹದಿಂದ ಲಕ್ಷಾಂತರ ಎಕರೆ ಈರುಳ್ಳಿ ನೀರಿನಿಂದ ಜಲಾವೃತಗೊಂಡಿದೆ.
ಕಳೆದೆರಡು ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ಈರುಳ್ಳಿ ಬೆಲೆ ಅತಿ ಏರಿಕೆಯಾಗಿದೆ. ಆದರೆ, ಈ ಬಾರಿ ಉತ್ತರ ಕರ್ನಾಟಕದಲ್ಲಿ ಬೆಳೆದ ಈರುಳ್ಳಿ ಬೆಲೆ ಹಾಳಾಗಿದ್ದರಿಂದ ಈ ಭಾಗದ ಯಾವ ರೈತನಿಗೂ ಕೂಡಾ ಈರುಳ್ಳಿ ಬೆಳೆ ಕೈಗೆ ಬಂದಿಲ್ಲ.ಪ್ರತಿ ವರ್ಷ ನೂರಾರು ಕ್ವಿಂಟಲ್ಗಳಷ್ಟು ಬೆಳೆಯುತಿದ್ದ ರೈತನಿಗೆ ಈ ಬಾರಿ ಈರುಳ್ಳಿ ಬೆಳೆ ಹಾಳಾಗಿ ಕಂಗಾಲಾಗುವಂತಾಗಿದೆ.
