ಬೈಲಹೊಂಗಲ (ಬೆಳಗಾವಿ): ಲಾಕ್ ಡೌನ್ನಿಂದಾಗಿ ಆರ್ಥಿಕ ಸಂಕಷ್ಟದಲ್ಲಿರುವ ಲಿಂಗಾಯತ ಕಮ್ಮಾರ (ಕಂಬಾರ) ಹಾಗೂ ವೃತ್ತಿನಿರತ ಬಡಿಗೇರ ಕರಕುಶಲ ಕಾರ್ಮಿಕರಿಗೆ ಸರಕಾರದ ಪ್ಯಾಕೇಜ್‌ನಲ್ಲಿ ಆರ್ಥಿಕ ನೆರವು ನೀಡುವಂತೆ ಆಗ್ರಹಿಸಿ ಅಖಿಲ ಕರ್ನಾಟಕ ಲಿಂಗಾಯತ ಕಂಬಾರ, ಬಡಿಗೇರ ಕ್ಷೇಮಾಭಿವೃದ್ಧಿ ಸಂಘದ ವತಿಯಿಂದ ಬೈಲಹೊಂಗಲ ಉಪವಿಭಾಗಾಧಿಕಾರಿ ಶಿವಾನಂದ ಭಜಂತ್ರಿ ಮೂಲಕ ಮುಖ್ಯಮಂತ್ರಿಗೆ ಮನವಿ ಸಲ್ಲಿಸಲಾಯಿತು.
ಈ ವೇಳೆ, ಸಂಘದ ರಾಜ್ಯಾಧ್ಯಕ್ಷ ಮಡಿವಾಳಪ್ಪ ಬಡಿಗೇರ ಮಾತನಾಡಿ, ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ನಾನಾ ಕುಶಲಕರ್ಮಿಗಳಿಗೆ ಪ್ಯಾಕೇಜ್ ಘೋಷಣೆ ಮಾಡಿದ್ದಾರೆ. ಈಗಿನ ಪ್ಯಾಕೇಜ್‌ನಲ್ಲಿ ಬಡಗಿತನ, ಕಮ್ಮಾರ ಕೆಲಸ ಮಾಡುತ್ತಿರುವ ಕುಶಲಕರ್ಮಿಗಳಿಗೂ ಆರ್ಥಿಕ ಸಹಾಯ ಮಾಡಬೇಕು ಎಂದು ಒತ್ತಾಯಿಸಿದರು.
ಲಾಕ್ಡೌನ್ನಿಂದಾಗಿ ಕಂಬಾರಿಕೆ ಮಾಡುವವರ ಜೀವನ ದುಸ್ಥರವಾಗಿದ್ದು, ಸರಕಾರ ಈ ಸಮಾಜವನ್ನು ಪರಿಗಣಿಸಿ ಆರ್ಥಿಕ ಪ್ಯಾಕೇಜ್ ಘೋಷಣೆ ಮಾಡಬೇಕಿದೆ ಎಂದರು.
ಉಪಾಧ್ಯಕ್ಷ ಬಸವರಾಜ ಕಂಬಾರ, ಕಾರ್ಯದರ್ಶಿ ಮಡಿವಾಳಪ್ಪ ಕಂಬಾರ, ಮುಖಂಡ ಶಂಕರ ಬಡಿಗೇರ, ಜಿ.ಪಂ. ಸದಸ್ಯ ಶಂಕರ ಮಾಡಲಗಿ, ಉಮೇಶ ಬಡಿಗೇರ, ಬಸವರಾಜ ಬಡಿಗೇರ, ಮಹಾಂತೇಶ ಕಂಬಾರ ಉಪಸ್ಥಿತರಿದ್ದರು.
