ಬೆಳಗಾವಿ: ಮಾರ್ಕಂಡೇಯ ಡ್ಯಾಮ್​ನಿಂದ 5 ಸಾವಿರ ಕ್ಯೂಸೆಕ್ ನೀರು ಹೊರಕ್ಕೆ

ಬೆಳಗಾವಿಯ ಶಿರೂರ ಗ್ರಾಮದ ಬಳಿಯಿರುವ ಮಾರ್ಕಂಡೇಯ ಡ್ಯಾಮ್​ನಿಂದ 5 ಸಾವಿರ ಕ್ಯೂಸೆಕ್ ನೀರು ಬಿಡುಗಡೆ ಮಾಡಲಾಗಿದೆ. ಈ ಡ್ಯಾಮ್​ಗೆ 5,200 ಕ್ಯೂಸೆಕ್ ನಷ್ಟು ಒಳಹರಿವು ಬರುತ್ತಿದ್ದು, ಇವತ್ತಿನ ಗರಿಷ್ಠಮಟ್ಟ 704 ಮೀಟರ್ ಇದೆ.

ಬೆಳಗಾವಿ: ಜಿಲ್ಲೆಯಲ್ಲಿ ಸುರಿಯುತ್ತಿರುವ ಮಳೆಗೆ ಮಾರ್ಕಂಡೇಯ ನದಿ ಒಳಹರಿವು ಹೆಚ್ಚಾಗಿದ್ದು, ಶಿರೂರ ಗ್ರಾಮದ ಬಳಿಯಿರುವ ಡ್ಯಾಮ್​ನಿಂದ 5 ಸಾವಿರ ಕ್ಯೂಸೆಕ್ ನೀರು ಬಿಡುಗಡೆ ಮಾಡಲಾಗಿದೆ ಎಂದು ಡ್ಯಾಮ್ ಸಹಾಯಕ ಕಾರ್ಯಪಾಲಕ ಅಭಿಯಂತರ ಎಸ್.ಕೆ. ಯಂಟ್ಟದ್ದಿನವರ ಹೇಳಿದ್ದಾರೆ.

ಈಟಿವಿ ಭಾರತದೊಂದಿಗೆ ಮಾತನಾಡಿದ ಅವರು, ಮಾರ್ಕಂಡೇಯ ಡ್ಯಾಮ್​ಗೆ 5,200 ಕ್ಯೂಸೆಕ್ ನಷ್ಟು ಒಳಹರಿವು ಬರುತ್ತಿದ್ದು, ಇವತ್ತಿನ ಗರಿಷ್ಠಮಟ್ಟ 704 ಮೀಟರ್ ಇದೆ. ಇನ್ನು ಕೇವಲ ಒಂದೂವರೆ ಮೀಟರ್ ನೀರು ಬಂದ್ರೆ ಡ್ಯಾಮ್ ಫುಲ್ ಆಗಲಿದೆ. ಕ್ರಸ್ಟ್ ಗೇಟ್ ಬಂದ್​​ ಮಾಡಿದ ಒಂದೇ ದಿನದಲ್ಲಿ ಡ್ಯಾಮ್ ಪೂರ್ತಿಯಾಗಿ ಭರ್ತಿ ಆಗಲಿದೆ. ಹೀಗಾಗಿ ಬರುವ ಮಳೆಗಾಲದ ದಿನಗಳನ್ನು ಹಾಗೂ ಡ್ಯಾಮ್​ನ ಸುರಕ್ಷತೆ ದೃಷ್ಟಿಯಿಂದ 5‌00 ಕ್ಯೂಸೆಕ್ ಒಳಹರಿವಿನ ನೀರನ್ನು ಮಾತ್ರ ಇಟ್ಟುಕೊಂಡು ಉಳಿದೆಲ್ಲಾ ನೀರನ್ನು ಹೊರಗೆ ಬಿಡಲಾಗುತ್ತಿದೆ ಎಂದರು.

ಮಾರ್ಕಂಡೇಯ ಡ್ಯಾಮ್​ನಿಂದ 5 ಸಾವಿರ ಕ್ಯೂಸೆಕ್ ನೀರು ಹೊರಕ್ಕೆ

ಮಾರ್ಕಂಡೇಯ ಡ್ಯಾಮ್​ನ ಮಾಹಿತಿ:

ಬೆಳಗಾವಿ ಜಿಲ್ಲೆಯ ಹುಕ್ಕೇರಿ ತಾಲೂಕಿನ ಶಿರೂರು ಗ್ರಾಮದ ಬಳಿಯಿರುವ ಈ ಮಾರ್ಕಂಡೇಯ ಡ್ಯಾಮ್ ರೈತರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ನೀರಾವರಿ ಯೋಜನೆಗೆ ನಿರ್ಮಿಸಲಾಗಿದೆ. ಈ ಡ್ಯಾಮ್ 3.696 ಟಿಎಂಸಿ ನೀರಿನ ಗರಿಷ್ಠ ಸಾಮರ್ಥ್ಯ ಹೊಂದಿದ್ದು, 432 ಚದರ ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಜಲಾನಯನ ಪ್ರದೇಶವಿದೆ. ಇನ್ನು 475 ಮೀಟರ್ ಉದ್ದವಿರುವ ಈ ಮಾರ್ಕಂಡೇಯ ಡ್ಯಾಮ್ 39.10ಮೀಟರ್ ಎತ್ತರದಲ್ಲಿದ್ದು, 696 ಮೀಟರ್ ಸಾಮರ್ಥ್ಯದ 6 ಕ್ರಸ್ಟ್ ಗೇಟ್ ಗಳನ್ನು ಹೊಂದಿದೆ.

ಈ ಡ್ಯಾಮ್ ನೀರನ್ನು ನೀರಾವರಿ ಯೋಜನೆಗಾಗಿ 3.220ಟಿಎಂಸಿ, 0.295 ಕುಡಿಯುವುದಕ್ಕಾಗಿ ಬಳಸಲಾಗುತ್ತದೆ. ರೈತರಿಗೆ ಅನುಕೂಲವಾಗುವಂತೆ ಹೆಚ್ಚಾಗಿ ನೀರಾವರಿ ಯೋಜನೆಗೆ ಬಳಸಿಕೊಳ್ಳಲಾಗಿದೆ. ಮಾರ್ಕಂಡೇಯ ಡ್ಯಾಮ್ ನ ವ್ಯಾಪ್ತಿಯಲ್ಲಿ 11142.73 ಹೆಕ್ಟೇರ್ ಭೂಪ್ರದೇಶ ಹಾಗೂ 7 ಗ್ರಾಮಗಳು ಮುಳುಗಡೆ ವ್ಯಾಪ್ತಿಗೆ ಬರುತ್ತವೆ.