ಬೆಳಗಾವಿ: ಹಿಂದೂಪರ ಸಂಘಟನೆಯಲ್ಲಿ ಗುರುತಿಸಿಕೊಂಡಿದ್ದ ಗೋಕಾಕ್ ತಾಲೂಕಿನ ಅಂಕಲಗಿ ಗ್ರಾಮದ ಶಿವಕುಮಾರ್ ಉಪ್ಪಾರ್ ಎಂಬ ಯುವಕ ಅನುಮಾನಾಸ್ಪದವಾಗಿ ಸಾವಿಗೀಡಾದ ಯುವಕ. ಈ ಯುವಕನ ಕುಟುಂಬಕ್ಕೆ 'ಉತ್ತರ ಕರ್ನಾಟಕ ಮಂದಿ' ಫೇಸ್ಬುಕ್ ಪೇಜ್ ಸಾರ್ವಜನಿಕರಿಂದ ಹಣ ಸಂಗ್ರಹಿಸಿ ದೇಣಿಗೆ ನೀಡುವ ಮುಖಾಂತರ ಮಾನವೀಯತೆ ಮೆರೆಯಲಾಗಿದೆ.
ಗೋ ರಕ್ಷಣೆಯಲ್ಲಿ ತೊಡಗಿಕೊಂಡಿದ್ದ ಶಿವು ಉಪ್ಪಾರ್ ಕೆಲವು ದಿನಗಳ ಹಿಂದೆ ಬೆಳಗಾವಿ ಜಿಲ್ಲೆಯ ಹಿರೇಬಾಗೇವಾಡಿಯ ಎಪಿಎಂಸಿ ಆವರಣದಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಮೃತಪಟ್ಟಿದ್ದ. ಮನೆಯ ಆಧಾರ ಸ್ಥಂಭವಾಗಿದ್ದ ಯುವಕನನ್ನು ಕಳೆದುಕೊಂಡ ಕುಟುಂಬ ತೀವ್ರ ಸಂಕಷ್ಟದಲ್ಲಿತ್ತು. ಈ ಸಂಕಷ್ಟ ಗಮನಿಸಿದ ಉತ್ತರ ಕರ್ನಾಟಕ ಮಂದಿ ಎಂಬ ಹೆಸರಿನ ಫೇಸ್ಬುಕ್ ಪುಟ ಧನ ಸಹಾಯ ಮಾಡಲು ಮುಂದಾಗಿತ್ತು. ಕಳೆದ ಒಂದು ವಾರದಲ್ಲಿ ಸುಮಾರು 6 ಲಕ್ಷದ 14 ಸಾವಿರ ಹಣವನ್ನು ಸಂಗ್ರಹಿಸಿ ಯುವಕನ ತಂದೆ ತಾಯಿಗೆ ಹಸ್ತಾಂತರಿಸಲಾಗಿದೆ.
ಯುವಕನ ಸಾವಿಗೆ ಮರುಗಿದ ಜೀವಗಳಿಂದ ಧನಸಹಾಯ :
ಫೇಸ್ಬುಕ್ ಪೇಜ್ಗಳು ಕೇವಲ ಮನರಂಜನೆಗೆ ಅಥವಾ ಸಮಯ ಕಳೆಯುವುದಕ್ಕೆ ಮಾತ್ರವಲ್ಲ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಉತ್ತರ ಕರ್ನಾಟಕ ಮಂದಿ ಎಂಬ ಫೇಸ್ಬುಕ್ ಪೇಜ್ನಿಂದ ದೇಣಿಗೆ ಸಂಗ್ರಹಿಸುವ ಅಭಿಯಾನ ಆರಂಭಿಸಿದ ಒಂದೇ ವಾರದಲ್ಲಿ ಸುಮಾರು 6 ಲಕ್ಷ ರೂಪಾಯಿಗಳು ಸಂಗ್ರವಾಗಿದ್ದು, ನೂರಾರು ಜನರ ಈ ಧನ ಸಹಾಯ ಯುವಕನ ಕುಟುಂಬಕ್ಕೆ ನೆರವಾಗಿದ್ದು, ಮಾತ್ರವಲ್ಲದೇ ಮಾನವೀಯತೆ ಮೆರೆದಿದ್ದಾರೆ.
ಶಿವು ಉಪ್ಪಾರ್ ಸಾವಿಗೆ ನ್ಯಾಯ ನೀಡುವಂತೆ ಅನೇಕ ಸಂಘಟನೆಗಳಿಂದ ಹೋರಾಟ: ಅನುಮಾನಾಸ್ಪದವಾಗಿ ಸಾವಿಗೀಡಾದ ಶಿವು ಉಪ್ಪಾರ್ ಸಾವಿಗೆ ನ್ಯಾಯ ನೀಡುವಂತೆ ಅನೇಕ ಸಂಘಟನೆಗಳು ರಾಜ್ಯಾದ್ಯಂತ ಹೋರಾಟ ನಡೆಸಿದ್ದವು ಇದರ ಕುರಿತಂತೆ ಈಟಿವಿ ಭಾರತ ವರದಿ ಪ್ರಕಟಿಸಿದ್ದು. ಯುವಕನ ಸಾವಿಗೆ ನಿಖರ ಮಾಹಿತಿಯನ್ನು ಪೊಲೀಸರು ಕಲೆ ಹಾಕುತ್ತಿದ್ದಾರೆ.
