ಪ್ರತಿಮೆ ಸ್ಥಾಪನೆ ವಿಚಾರ ಎರಡು ಸಮುದಾಯದಲ್ಲಿ ಘರ್ಷಣೆ: ಕೊಡಿಗೇಹಳ್ಳಿಯಲ್ಲಿ ಪೊಲೀಸ್ ಬಿಗಿ ಭದ್ರತೆ

ರಾತ್ರಿ ಕೆಂಪೇಗೌಡರ ಪ್ರತಿಮೆ ಹಾಗೂ  ಶಿವಕುಮಾರ ಸ್ವಾಮೀಜಿ ಪ್ರತಿಮೆ ಸ್ಥಾಪನೆಗೆ ಸಂಬಂಧಿಸಿದ ವಿಚಾರ ಎರಡು ಸಮುದಾಯಗಳ ನಡುವೆ ವಿವಾದಕ್ಕೆ ತಿರುಗಿರುವ ಪ್ರಕರಣ ದೊಡ್ಡಬಳ್ಳಾಪುರ ತಾಲೂಕು ಕೊಡಿಗೇಹಳ್ಳಿ ಗ್ರಾಮದಲ್ಲಿ ನಡೆದಿದೆ.

ದೊಡ್ಡಬಳ್ಳಾಪುರ: ರಾತ್ರೋರಾತ್ರಿ ಕೆಂಪೇಗೌಡರ ಪ್ರತಿಮೆಯನ್ನೂ ಗ್ರಾಮದ ಒಂದು ಸಮುದಾಯ ಸ್ಥಾಪನೆ ಮಾಡಿದರೆ, ಮತ್ತೊಂದು ಸಮುದಾಯ ಬೆಳಗ್ಗೆ ಶಿವಕುಮಾರ ಸ್ವಾಮೀಜಿಯ ಪ್ರತಿಮೆ ಸ್ಥಾಪನೆಗೆ ಮುಂದಾಗಿರುವ ಘಟನೆ ದೊಡ್ಡಬಳ್ಳಾಪುರ ತಾಲೂಕು ಕೊಡಿಗೇಹಳ್ಳಿ ಗ್ರಾಮ ಜರುಗಿದೆ. ಗ್ರಾಮದಲ್ಲಿ ಈ ಪ್ರತಿಮೆ ಸ್ಥಾಪನೆಯ ವಿಚಾರ ವಿವಾದಕ್ಕೆ ತಿರುಗಿದ್ದು ಅಶಾಂತಿಯ ಗೊಂದಲ ವಾತಾವರಣ ಸೃಷ್ಟಿಸಿದೆ.

ಹೀಗಾಗಿ ಸ್ಥಳದಲ್ಲಿ ಪೊಲೀಸ್ ಬಿಗಿ ಬಂದೋಬಸ್ತ್ ವ್ಯವಸ್ಥೆ ಕಲ್ಪಿಸಲಾಗಿದೆ. ಗ್ರಾಮದ ಎರಡು ಪ್ರತ್ಯೇಕ ಸಮುದಾಯದವರು ನಾಡಪ್ರಭು ಕೆಂಪೇಗೌಡ ಮತ್ತು ಶಿವಕುಮಾರ ಸ್ವಾಮೀಜಿ ಅವರ ಪ್ರತಿಮೆ ಸ್ಥಾಪನೆಗೆ ಜಿದ್ದಾಜಿದ್ದಿಗೆ ಬಿದ್ದಿದ್ದಾರೆ.

ನವೆಂಬರ್ 30ರಂದು ರಾತ್ರಿ ಒಂದು ಸಮುದಾಯದವರು ಕೆಂಪೇಗೌಡ ಪ್ರತಿಮೆ ಸ್ಥಾಪನೆ ಮಾಡಿದ್ದಾರೆ. ಕೆಂಪೇಗೌಡರ ಪ್ರತಿಮೆಗೆ ಮತ್ತೊಂದು ಸಮುದಾಯ ತಕರಾರು ಮಾಡಿದೆ. ಬೆಳಗ್ಗೆ ಪ್ರತಿಮೆಗೆ ಪೂಜೆ ಮಾಡಲು ಬಂದಾಗ ಎರಡು ಸಮುದಾಯಗಳ ನಡುವೆ ಮಾತಿನ ಚಕಮಕಿ ನಡೆದು ವಿವಾದ ವಿಕೋಪಕ್ಕೆ ತಿರುಗಿದೆ. ಪ್ರತಿಮೆ ವಿವಾದದ ಸ್ವರೂಪ ಪಡೆಯುತ್ತಿದ್ದ ಸ್ಥಳಕ್ಕೆ ಆಗಮಿಸಿದ್ದ ಪೊಲೀಸರು ಪೂಜೆಗೆ ಅವಕಾಶ ನೀಡದೇ ವಾಪಸ್ ಕಳುಹಿಸಿದ್ದಾರೆ. ಸ್ಥಳದಲ್ಲೇ ಪೊಲೀಸ್ ಬಂದೋಬಸ್ತ್ ಮಾಡಲಾಗಿದೆ.

ಕೆಂಪೇಗೌಡ ಪ್ರತಿಮೆ ಸ್ಥಾಪಿಸಿದವರು ಯಾವುದೂ ಕಾರಣಕ್ಕೂ ಸ್ಥಳದಿಂದ ಪ್ರತಿಮೆ ತೆರವು ಮಾಡುವುದಿಲ್ಲವೆಂದು ಪಟ್ಟು ಹಿಡಿದಿದ್ದಾರೆ. ರಾತ್ರೋ ರಾತ್ರಿ ಕೆಂಪೇಗೌಡರ ಪ್ರತಿಮೆ ಸ್ಥಾಪನೆಗೆ ಮತ್ತೊಂದು ಸಮುದಾಯ ಅಕ್ರೋಶ ವ್ಯಕ್ತಪಡಿಸಿದೆ, ಕೆಂಪೇಗೌಡರ ಬಗ್ಗೆ ನಮಗೆ ಅಪಾರ ಗೌರವವಿದೆ. ವರ್ಷದ ಹಿಂದೆ ಈ ಸ್ಥಳದಲ್ಲಿ ಶಿವಕುಮಾರ ಸ್ವಾಮೀಜಿ ವೃತ್ತವೆಂದು ನಾಮಕರಣ ಮಾಡಲಾಗಿದೆ.

ಕೊಡಿಗೇಹಳ್ಳಿ ಗ್ರಾಮ ಪಂಚಾಯಿತಿಯಲ್ಲಿ ರೆಸ್ಯೂಲೇಷನ್ ಕೂಡ ಮಾಡಲಾಗಿದೆ. ಈ ಸ್ಥಳದಲ್ಲಿ ಕನ್ನಡ ಧ್ವಜ ಸಹ ಇದ್ದು ಕನ್ನಡ ಬಾವುಟಕ್ಕೆ ಎತ್ತರದಲ್ಲಿ ಪಕ್ಷದ ಬಾವುಟ ಕಟ್ಟಿದ್ದರು. ಈ ಬಗ್ಗೆ ಪ್ರಶ್ನೆ ಮಾಡಿದ ಒಂದೇ ಕಾರಣಕ್ಕೆ ರಾತ್ರೋರಾತ್ರಿ ಪ್ರತಿಮೆ ಸ್ಥಾಪನೆ ಮಾಡಿದ್ದಾರೆಂಬುದು ಮತ್ತೊಂದು ಸಮುದಾಯದ ಹೇಳಿದೆ.

ಠಾಣೆ ಮೆಟ್ಟಿಲೇರಿದ ವಿವಾದ: ಸದ್ಯ ಪ್ರತಿಮೆ ವಿವಾದ ಪೊಲೀಸ್ ಠಾಣೆ ಮೆಟ್ಟಿಲೇರಿದೆ. ರಾಜಕೀಯ ಕಾರಣದಿಂದ ಈ ಘಟನೆ ವಿವಾದಕ್ಕೆ ಗುರಿಯಾಗಿದೆ. ಎರಡು ಸಮುದಾಯ ರಾಜಕೀಯ ಬಿಟ್ಟು ಕೆಂಪೇಗೌಡರ ಮತ್ತು ಶಿವಕುಮಾರ ಸ್ವಾಮೀಜಿ ಅವರ ಆದರ್ಶ ಪಾಲನೆ ಮಾಡಿದ್ದಾದರೆ ವಿವಾದ ಕ್ಷಣದಲ್ಲೇ ಮರೆಯಾಗುವುದು.

ಇದನ್ನೂಓದಿ:ಹಳ್ಳಿಗಾಡಿನ ಜನರ ಅಕ್ಷಯ ಪಾತ್ರೆ ಹೈನುಗಾರಿಕೆ: ರೈತನ‌ ಬದುಕು ಬಂಗಾರ