ಬೆಂಗಳೂರು: ಇಂದು ಬೆಂಗಳೂರಿನ ದಕ್ಷಿಣ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 26 ಕಿಲೋಮೀಟರ್ ರೋಡ್ ಶೋ ನಡೆಸಿದ್ದ ಪ್ರಧಾನಿ ನರೇಂದ್ರ ಮೋದಿ ನಾಳೆ ಬೆಂಗಳೂರು ಕೇಂದ್ರ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 8 ಕಿಲೋಮೀಟರ್ ರೋಡ್ ಶೋ ನಡೆಸಲಿದ್ದಾರೆ. ಬಿಜೆಪಿ ಪರ ಭರ್ಜರಿ ಪ್ರಚಾರ ಕಾರ್ಯ ನಡೆಸಲಿದ್ದಾರೆ.
ಜೆ.ಪಿ. ನಗರದಿಂದ ಮಲ್ಲೇಶ್ವರದ ಮಾರಮ್ಮ ದೇವಸ್ಥಾನದವರೆಗೂ ಸುಮಾರು 26 ಕಿಲೋ ಮೀಟರ್ ವರೆಗೂ ಶನಿವಾರ ರೋಡ್ ಶೋ ನಡೆಸಿ ಮತದಾರರ ಗಮನ ಸೆಳೆದ ಮೋದಿ ಭಾನುವಾರ 8 ಕಿಲೋ ಮೀಟರ್ ಬಹಿರಂಗ ಪ್ರಚಾರ ನಡೆಸಲಿದ್ದಾರೆ. ಇಂದು ರಾತ್ರಿ ರಾಜಭವನದಲ್ಲಿ ತಂಗಲಿರುವ ಮೋದಿ ನಾಳೆ ಬೆಳಗ್ಗೆ 10 ಗಂಟೆಯಿಂದ 11.30ರವರೆಗೂ ನಗರದ ಜನತೆ ಮುಂದೆ ಮತಯಾಚನೆ ನಡೆಸಲಿದ್ದಾರೆ. ಸುಮಾರು 8 ಕಿಲೋ ಮೀಟರ್ ವರೆಗೂ ರೋಡ್ ಶೋ ನಡೆಯುವ ಹಿನ್ನೆಲೆಯಲ್ಲಿ ಸುತ್ತಮುತ್ತಲಿನ ರಸ್ತೆಗಳಲ್ಲಿ ಸಂಚಾರ ದಟ್ಟಣೆಯಾಗಲಿದ್ದು, ಪರ್ಯಾಯ ಮಾರ್ಗ ಬಳಸುವಂತೆ ಸಂಚಾರ ಪೊಲೀಸರು ವಾಹನ ಸವಾರರಲ್ಲಿ ಮನವಿ ಮಾಡಿದ್ದಾರೆ.
ಇಂದು ನಗರದಲ್ಲಿ ರೋಡ್ ಶೋ ನಡೆಸಿ ಹುಬ್ಬಳ್ಳಿ ಪ್ರವಾಸಕ್ಕೆ ತೆರಳಿದ ಪ್ರಧಾನಿ ನರೇಂದ್ರ ಮೋದಿ ಸಂಜೆ ಹೆಚ್.ಎ.ಎಲ್ ವಿಮಾನ ನಿಲ್ದಾಣಕ್ಕೆ ವಾಪಸ್ಸಾಗಿ ರಾಜಭವನದಲ್ಲಿ ಇಂದು ರಾತ್ರಿ ವಾಸ್ತವ್ಯ ಹೂಡಲಿದ್ದಾರೆ. ನಾಳೆ ಬೆಳಗ್ಗೆ 9:15ಕ್ಕೆ ರಾಜಭವನದಿಂದ ಮೆಖ್ರಿ ವೃತ್ತದ ಹೆಚ್.ಕ್ಯೂ.ಟಿ.ಸಿ ಹೆಲಿಪ್ಯಾಡ್ಗೆ ತಲುಪಲಿರುವ ಮೋದಿ, ಬೆಳಗ್ಗೆ 9.30ಕ್ಕೆ ಹೊರಟು 9.50ಕ್ಕೆ ಹೆಚ್.ಎ.ಎಲ್ ವಿಮಾನ ನಿಲ್ದಾಣ ತಲುಪಲಿದ್ದಾರೆ. ಹಳೆ ವಿಮಾನ ನಿಲ್ದಾಣದ ಜಂಕ್ಷನ್ ಬಳಿ ಇರುವ ಸುರಂಜನ್ ದಾಸ್ ರಸ್ತೆ ತಲುಪಲಿರುವ ಮೋದಿ ಬಳಿಕ ಬೆಳಗ್ಗೆ 10ರಿಂದ 11.30 ರವರೆಗೂ ರೋಡ್ ಶೋ ನಡೆಸಲಿದ್ದಾರೆ.
ಹೊಸ ತಿಪ್ಪಸಂದ್ರ ರಸ್ತೆಯಲ್ಲಿರುವ ಕೆಂಪೇಗೌಡ ಪ್ರತಿಮೆಯಿಂದ ರೋಡ್ ಶೋ ಆರಂಭವಾಗಲಿದ್ದು, ಹೆಚ್.ಎ.ಎಲ್ ಎರಡನೇ ಹಂತದ 80 ಅಡಿ ರಸ್ತೆ ಜಂಕ್ಷನ್, 12ನೇ ಮುಖ್ಯ ರಸ್ತೆ ಜಂಕ್ಷನ್, 100 ಅಡಿ ಜಂಕ್ಷನ್, ಇಂದಿರಾನಗರ, ಸುಬ್ರಮಣ್ಯಸ್ವಾಮಿ ದೇವಸ್ಥಾನದ ಮೂಲಕ ಎಂಜಿ ರಸ್ತೆಗೆ ತಲುಪಿ ಟ್ರಿನಿಟಿ ಸರ್ಕಲ್ನಲ್ಲಿ ರೋಡ್ ಶೋ ಕೊನೆಗೊಳಿಸಲಾಗುತ್ತದೆ.
ಮೋದಿ ಎಲ್ಲೆಲ್ಲಿ ಪ್ರಚಾರ ?: ಹಳೆ ವಿಮಾನ ರಸ್ತೆಯಿಂದ ತೆರೆದ ವಾಹನದಲ್ಲಿ ಪ್ರಚಾರ ಕಾರ್ಯ ಆರಂಭಿಸಲಿರುವ ಮೋದಿ, ಸುರಂಜನ್ ದಾಸ್ ರಸ್ತೆ, ಎಂ.ಜಿ.ರೋಡ್, ಬಿಗ್ರೇಡ್ ರೋಡ್, ರೇಸ್ ಕೋರ್ಸ್ ರೋಡ್, ಟಿ.ಚೌಡಯ್ಯ ರಸ್ತೆ, ರಮಣ ಮಹರ್ಷಿ ರಸ್ತೆ, ಜಗದೀಶ್ ನಗರ, ಜೆ.ಬಿ.ನಗರ ಮುಖ್ಯರಸ್ತೆ, ಬಿಎಂಎಲ್ ಜಂಕ್ಷನ್, ನ್ಯೂತಿಪ್ಪಸಂದ್ರ ಮಾರ್ಕೆಟ್, ಇಂದಿರಾನಗರದ 80ನೇ ಅಡಿ ರಸ್ತೆ, ನ್ಯೂ ತಿಪ್ಪಸಂದ್ರ ರೋಡ್, ಇಂದಿರಾನಗರ ಕಾವೇರಿ ಸ್ಕೂಲ್, ಸಿಎಂಎಚ್ ರೋಡ್, ಆದರ್ಶ ಜಂಕ್ಷನ್, ಹಲಸೂರು ಮೆಟ್ರೋ ನಿಲ್ದಾಣ ಹಾಗೂ ಟ್ರಿನಿಟಿ ಸರ್ಕಲ್ ನಲ್ಲಿ ರೋಡ್ ಶೋ ಮುಗಿಯಲಿದೆ. ವಾಹನ ಸವಾರರು ಅನ್ಯ ಮಾರ್ಗ ಬಳಸುವಂತೆ ಟ್ರಾಫಿಕ್ ಪೊಲೀಸರು ಮನವಿ ಮಾಡಿದ್ದಾರೆ.
ಮಿನಿಟ್ ಟು ಮಿನಿಟ್ ವಿವರ:
10.00- ಹೊಸ ತಿಪ್ಪಸಂದ್ರದ ಕೆಂಪೇಗೌಡ ಪ್ರತಿಮೆ
10.15- ಹೆಚ್.ಎ.ಎಲ್ ಎರಡನೇ ಹಂತದ 80 ಅಡಿ ರಸ್ತೆ ಜಂಕ್ಷನ್
10.25- ಹೆಚ್.ಎ.ಎಲ್ ಎರಡನೇ ಹಂತದ 12ನೇ ಮುಖ್ಯರಸ್ತೆ ಜಂಕ್ಷನ್
10.35- 100 ಅಡಿ ರಸ್ತೆ ಜಂಕ್ಷನ್
10.50- ಸಿಎಂಹೆಚ್ ರಸ್ತೆ
11.10- ಹಳೆ ಮದ್ರಾಸು ರಸ್ತೆ
11.30- ಟ್ರಿನಿಟಿ ವೃತ್ತ
ರೋಡ್ ಶೋ ಮುಗಿಸಿ ಅದೇ ರಸ್ತೆ ಮಾರ್ಗವಾಗಿ ರಾಜಭವನ ತಲುಪಲಿರುವ ಪ್ರಧಾನಿ ನರೇಂದ್ರ ಮೋದಿ ರಾಜಭವನದಿಂದ ಹೆಚ್. ಎ ಎಲ್ ವಿಮಾನ ನಿಲ್ದಾಣಕ್ಕೆ ತೆರಳಲಿದ್ದು, ಅಲ್ಲಿಂದ ಶಿವಮೊಗ್ಗ ಪ್ರವಾಸಕ್ಕೆ ತೆರಳಲಿದ್ದಾರೆ. ಪ್ರವಾಸ ಮುಗಿಸಿ ನಾಳೆ ರಾತ್ರಿ ನವದೆಹಲಿಗೆ ವಾಪಸ್ಸಾಗಲಿದ್ದಾರೆ.
ಇದನ್ನೂ ಓದಿ: ಹನುಮಂತನ ನಾಡಿನಲ್ಲಿ ಬಜರಂಗದಳ ನಿಷೇಧಿಸಲು ಕಾಂಗ್ರೆಸ್ ಯತ್ನ: ಯೋಗಿ ಆದಿತ್ಯನಾಥ್ ವಾಗ್ದಾಳಿ
