ಸದಸ್ಯರ ಅನರ್ಹತೆ ವಿಚಾರದಲ್ಲಿ ಸ್ಪೀಕರ್​ಗೆ ಸಂಪೂರ್ಣ ಅಧಿಕಾರ ಇರಬೇಕು: ಸಿದ್ದರಾಮಯ್ಯ

ಪಕ್ಷಾಂತರಿಗಳ ವಿರುದ್ಧ ಅಸಮಾಧಾನ ಹೊರ ಹಾಕಿರುವ ಮಾಜಿ ಸಿಎಂ ಸಿದ್ದರಾಮಯ್ಯ, ಅಂತಹ ಸದಸ್ಯರ ಅನರ್ಹತೆಯ ವಿಚಾರದಲ್ಲಿ ಸ್ಪೀಕರ್​​ಗೆ ಸಂಪೂರ್ಣ ಅಧಿಕಾರವಿರಬೇಕು. ಅವರ ನಿರ್ಣಯವೇ ಅಂತಿಮವಾಗಬೇಕು ಎಂದಿದ್ದಾರೆ.

ಬೆಂಗಳೂರು: ಸ್ಪೀಕರ್​​ ಮಟ್ಟದಲ್ಲೇ ಅನರ್ಹತೆಯ ವಿಚಾರ ಇತ್ಯರ್ಥವಾಗಬೇಕಿದ್ದು, ಈ ಸಂಬಂಧ ಸ್ಪೀಕರ್​​ಗೆ ಸಂಪೂರ್ಣ ಅಧಿಕಾರ ಇರಬೇಕು ಎಂದು ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ತಿಳಿಸಿದ್ದಾರೆ.

ಪಕ್ಷಾಂತರ ಕಾಯ್ದೆ ಸಂಬಂಧ ಸ್ಪೀಕರ್​​ ಜೊತೆಗಿನ ಸಭೆ ಬಳಿಕ ಮಾತನಾಡಿದ ಅವರು, ಮೂರು ತಿಂಗಳ ಒಳಗೆ ಅನರ್ಹತೆಯ ಪ್ರಕರಣ ಇತ್ಯರ್ಥವಾಗಬೇಕು. ರಾಜೀನಾಮೆ ಕೊಟ್ರೆ ಅವರ ನಡವಳಿಕೆ ನೋಡಿ ತೀರ್ಮಾನ ಮಾಡಬೇಕು. ರಾಜೀನಾಮೆ ಅಂಗೀಕಾರದ ಬಗ್ಗೆ ಅವರ ಮನಸ್ಥಿತಿ, ನಡವಳಿಕೆ ನೋಡಿ ನಿರ್ಧಾರ ಮಾಡಬೇಕು ಎಂದು ಸ್ಪೀಕರ್​​ಗೆ ಅಭಿಪ್ರಾಯ ನೀಡಿದ್ದೇನೆ ಎಂದರು.

ಇಂದಿನ ಸಭೆಯಲ್ಲಿ ನಮ್ಮ ಅಭಿಪ್ರಾಯ ಹೇಳಿದ್ದೇವೆ‌. ಯಾರೇ ಪಕ್ಷಾಂತರಿಗಳು ಆದರೂ ಎರಡು ಬಾರಿ ಎಲೆಕ್ಸನ್​ಗೆ ನಿಲ್ಲಬಾರದು. ಅವರಿಗೆ ಅಧಿಕಾರ ಕೊಡಬಾರದು,‌ ಪಕ್ಷಾಂತರ ವಿಷಯದಲ್ಲಿ ಸ್ಪೀಕರ್ ನಿರ್ಣಯವೇ ಅಂತಿಮವಾಗಬೇಕು. ಈ ವಿಷಯದಲ್ಲಿ ಸ್ಪೀಕರ್​ಗೆ ಸಂಪೂರ್ಣ ಅಧಿಕಾರ ಕೊಡಬೇಕು. ಜೊತೆಗೆ ಇಂತ ಕೇಸ್​ಗಳು ಮೂರು ತಿಂಗಳ ಒಳಗೆ ಇತ್ಯರ್ಥ ಆಗಬೇಕು. 10ನೇ ಷೆಡ್ಯೂಲ್​​ನಲ್ಲಿ ಸ್ಪೀಕರ್ ತೀರ್ಪೇ ಅಂತಿಮವಾಗಿ ಆಗಬೇಕು ಎಂಬುದು ನಮ್ಮ ಅಭಿಪ್ರಾಯ ಎಂದು ವಿವರಿಸಿದರು‌.

ಈ ಪಕ್ಷಾಂತರಿಗಳಿಂದ ಬೇರೆ ಬೇರೆ ರಾಜ್ಯಗಳಲ್ಲಿ ಸರ್ಕಾರಗಳನ್ನೇ ಬೀಳಿಸಿ ಬಿಟ್ಟಿದ್ದಾರೆ. ಈ ರೀತಿ ಆದರೆ ಪ್ರಜಾಪ್ರಭುತ್ವ ಎಲ್ಲಿ ಉಳಿಯುತ್ತೆ? ಯಾವುದೇ ಅಧಿಕಾರವನ್ನು ಅವರಿಗೆ ಕೊಡಬಾರದು. ಮೂರನೇ ಜಡ್ಜಮೆಂಟ್​​ಗೆ ಇದನ್ನು ಹೋಗಲು ಬಿಡಬಾರದು. ಈ ವಿಷಯಗಳನ್ನು ಸ್ಪೀಕರ್​ಗೆ ನಾವು ತಿಳಿಸಿದ್ದೇವೆ. ಬೇರೆಯವರು ಕೂಡ ಅವರವರ ಅಭಿಪ್ರಾಯ ತಿಳಿಸಿದ್ದಾರೆ ಎಂದು ವಿವರಿಸಿದರು.