ಬೆಂಗಳೂರು: ನಂಬರ್ ಗೇಮ್ ಆಟದಲ್ಲಿ ಸಮ್ಮಿಶ್ರ ಸರ್ಕಾರದಂತೆ ಬಿಜೆಪಿ ಕೂಡ ಬೀಳಲಿದೆ ಎನ್ನುವ ಆತಂಕದಿಂದ ಬಿಜೆಪಿ ಪಾರಾಗಿದ್ದು ಯಾರ ಬೆಂಬವೂ ಇಲ್ಲದೆ ಬಿಜೆಪಿ ಅಗತ್ಯ ಸಂಖ್ಯಾಬಲವನ್ನು ಅಧಿಕೃತವಾಗಿ ಹೊಂದಿದೆ.
ಒಂದೆಡೆ ಅತೃಪ್ತ ಶಾಸಕರು ಅನರ್ಹಗೊಂಡು ಆತಂಕಕ್ಕೆ ಸಿಲುಕಿದ್ದರೆ ಇತ್ತ ಬಿಜೆಪಿ ಪಾಳಯದಲ್ಲಿ ನೆಮ್ಮದಿಯ ನಿಟ್ಟುಸಿರು ಕಂಡುಬಂದಿದೆ. ಮೊನ್ನೆ ಮೂವರು ಶಾಸಕರನ್ನ ಅನರ್ಹಗೊಳಿಸಿದ್ದ ಸ್ಪೀಕರ್ ರಮೇಶ್ ಕುಮಾರ್ ಇಂದು ತುರ್ತು ಸುದ್ದಿಗೋಷ್ಠಿ ನಡೆಸಿ 14 ಅತೃಪ್ತ ಶಾಸಕರನ್ನು ಅನರ್ಹಗೊಳಿಸಿ ಆದೇಶ ಹೊರಡಿಸಿದ್ದಾರೆ. ಇದರಿಂದಾಗಿ ವಿಧಾನಸಭೆಯಲ್ಲಿ 17 ಸ್ಥಾನಗಳು ಖಾಲಿಯಾಗಿದ್ದು, ವಿಧಾನಸಭೆ ಸದಸ್ಯರ ಬಲ 207 ಕ್ಕೆ ಕುಸಿದಿದೆ. ಹಾಗಾಗಿ ಬಹುಮತಕ್ಕೆ ಈ ಹಿಂದೆ ಇದ್ದ 113 ರ ಬದಲು 104 ಮ್ಯಾಜಿಕ್ ನಂಬರ್ ಆಗಿದೆ. ಸ್ಪೀಕರ್ ಸಮಬಲ ಬಂದಾಗ ಮಾತ್ರ ಮತ ಚಲಾಯಿಸಬೇಕಿರುವ ಕಾರಣ 103 ಮ್ಯಾಜಿಕ್ ನಂಬರ್ ಆಗಲಿದೆ.
ಸದ್ಯ ಬಿಜೆಪಿ ವಿಧಾನಸಭೆಯಲ್ಲಿ105 ಸದಸ್ಯ ಬಲ ಹೊಂದಿದ್ದು, ಓರ್ವ ಪಕ್ಷೇತರ ಶಾಸಕ ಕೂಡ ಬಿಜೆಪಿ ಬೆಂಬಲಿಸಿರುವ ಕಾರಣ 106 ಆಗಿದೆ. ಹೀಗಾಗಿ ಅನಾಯಾಸವಾಗಿ ಯಾವುದೇ ತೊಡಕಿಲ್ಲದೇ ಬಿಜೆಪಿಯು ಬಹುಮತವನ್ನು ಸಾಬೀತುಪಡಿಸಲಿದೆ.
ಶಾಸಕರ ರಾಜೀನಾಮೆ ಇತ್ಯರ್ಥ ಆಗದ ಕಾರಣ 224 ಸದಸ್ಯ ಬಲದ ವಿಧಾನಸಭೆಯಲ್ಲಿ ಸದನದಲ್ಲಿ ಹಾಜರಿದ್ದ ಸಂಖ್ಯೆಯ ಆಧಾರದಲ್ಲಿ ಸಮ್ಮಿಶ್ರ ಸರ್ಕಾರ ವಿಶ್ವಾಸಮತದಲ್ಲಿ ಸೋಲನ್ನು ಅನುಭವಿಸಿತ್ತು. ಅಂದು ಮ್ಯಾಜಿಕ್ ಸಂಖ್ಯೆ 113 ಆಗಿದ್ದರೂ ಮೈತ್ರಿ ಪಕ್ಷದ ಶಾಸಕರು ಸದನಕ್ಕೆ ಬಾರದೆ ಇದ್ದದ್ದರಿಂದ ಹಾಜರಿದ್ದ ಸದಸ್ಯರ ಮತಗಳ ವಿಭಜನೆ ಮೂಲಕ ಫಲಿತಾಂಶ ಪ್ರಕಟಿಸಲಾಗಿತ್ತು. ಆದರೆ, ಈಗ ತೀರ್ಪು ಹೊರಬಂದ ಕಾರಣ ಮ್ಯಾಜಿಕ್ ನಂಬರ್ 103 ಆಗಿದ್ದು ಅಧಿಕೃತವಾಗಿಯೇ ಬಿಜೆಪಿ ಅಷ್ಟು ಸಂಖ್ಯೆಯನ್ನು ಹೊಂದಿರುವುದರಿಂದ ಅನಾಯಾಸವಾಗಿ ವಿಶ್ವಾಸಮತ ಗೆಲ್ಲುವ ವಿಶ್ವಾಸದಲ್ಲಿದೆ.
