ಬೆಂಗಳೂರು: 71ನೇ ಗಣರಾಜ್ಯೋತ್ಸವದ ಹಿನ್ನೆಲೆ, ಕರ್ನಾಟಕ ರಾಜ್ಯ ಪೊಲೀಸ್ ಹಾಗೂ ಆಂತರಿಕ ಭದ್ರತಾ ವಿಭಾಗದ ಭಯೋತ್ಪಾದನಾ ನಿಗ್ರಹ ದಳ ಹಾಗೂ ನಕ್ಸಲ್ ನಿಗ್ರಹ ಪಡೆಗಳ ಕಾರ್ಯಾಚರಣೆಗೆ ನೆರವು ಪಡೆಯುವ ಉದ್ದೇಶದಿಂದ ಮೊದಲ ಬಾರಿಗೆ ಬೆಲ್ಜಿಯನ್ ಮಾಲಿನೋಯಿಸ್ ಶಫರ್ಡ್ ತಳಿಯ ಶ್ವಾನಗಳನ್ನ ತರಬೇತಿಗೊಳಿಸಿ ಇದೇ ಮೊದಲ ಬಾರಿಗೆ ಸೇವೆಗೆ ಸೇರ್ಪಡೆಗೊಳಿಸಲಾಯ್ತು.
71ನೇ ಗಣರಾಜ್ಯೋತ್ಸವ ಅಂಗವಾಗಿ ಇಂದು ಮಾಣಿಕ್ ಷಾ ಪರೇಡ್ ಮೈದಾನದಲ್ಲಿ ಸಂಭ್ರಮ ಮನೆ ಮಾಡಿತ್ತು. ಭದ್ರತೆ ದೃಷ್ಟಿಯಿಂದ ಬೆಲ್ಜಿಯನ್ ಮಾಲಿನೋಯಿಸ್ ಶಫರ್ಡ್ ತಳಿಯ ಶ್ವಾನಗಳನ್ನ ತರಬೇತಿಗೊಳಿಸಲಾಗಿತ್ತು. ಈ ತಳಿಯ ಶ್ವಾನವೊಂದು 2019ರ ಅಕ್ಟೋಬರ್ನಲ್ಲಿ, ಅಮೆರಿಕಾದ ಸೇನಾಪಡೆಯು ಉತ್ತರ ಸಿರಿಯಾದಲ್ಲಿ ನಡೆಸಿದ ಸೇನಾ ಕಾರ್ಯಾಚರಣೆ ಸಂದರ್ಭದಲ್ಲಿ ಭಯೋತ್ಪಾದಕರ ಅಡಗುದಾಣ ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾಗಿತ್ತು. ಇದೀಗ ಅದೇ ತಳಿಯ ಶ್ವಾನವನ್ನು, ಪೊಲೀಸ್ ಇಲಾಖೆಗೆ ಸೇರ್ಪಡೆಗೊಳಿಸಲಾಗಿದೆ.
ಬೆಲ್ಜಿಯನ್ ಮಾಲಿನೋಯಿಸ್ ಶಫರ್ಡ್ ಶ್ವಾನ ಮೂಲತಃ ಬೆಲ್ಜಿಯಂ ಮೂಲದಾಗಿದ್ದು, ಹೆಚ್ಚು ಚುರುಕುತನ, ಹೆಚ್ಚು ಗೃಹಣ ಶಕ್ತಿ, ಬುದ್ಧಿವಂತಿಕೆ, ಅಕ್ರಮಣಶೀಲಗುಣ, ಕಷ್ಟ ಸಹಿಷ್ಣುತೆ, ದೈಹಿಕ ಸಾಮರ್ಥ್ಯದಿಂದ ಸುಮಾರು 20-30ಕಿಲೋಮಿಟರ್ ನಡೆಯುವ ಮತ್ತು ಓಡಾಡುವ ಸಾಮರ್ಥ್ಯ ಹೊಂದಿದೆ. ಅಲ್ಲದೇ ಪೊಲೀಸ್ ಕಾರ್ಯಾಚರಣೆ, ದಟ್ಟ ಕಾಡುಗಳಲ್ಲಿ ಕಾರ್ಯಾಚರಣೆ, ಸ್ಫೋಟಕ ಪತ್ತೆಯಂತಹ ಬಹು ಕಾರ್ಯಕ್ಕೆ ಬಳಸಿಕೊಳ್ಳಬಹುದಾಗಿದೆ.
ಹಾಗೆಯೇ ಪೊಲೀಸರು ನೀಡುವ ಆದೇಶವನ್ನು ಚಾಚು ತಪ್ಪದೇ ಪಾಲಿಸುತ್ತದೆ. ಹಾಗೆಯೇ ಯಾವುದೇ ಆಹಾರ ಪದ್ಧತಿಯನ್ನ, ಯಾವುದೇ ವಾತಾವರಣಕ್ಕೆ ಹೊಂದಿಕೊಳ್ಳುವ ವಿಶೇಷತೆಯನ್ನ ಇದು ಹೊಂದಿದೆ. ಸದ್ಯ ಈ ಶ್ವಾನಗಳಿಗೆ ಬೆಂಗಳೂರಿನ ಗ್ರಾಮದಲ್ಲಿ ಸಿ.ಆರ್.ಎಫ್.ನ ಶ್ವಾನ ತರಬೇತಿ ಶಾಲೆಯಲ್ಲಿ 10 ತಿಂಗಳ ಕಾಲ ಶಿಸ್ತು ಕಲಿಸುವಿಕೆ ಟ್ರ್ಯಾಕಿಂಗ್, ಗುರುತು ಪತ್ತೆ, ಗಸ್ತು, ಆಕ್ರಮಣ ತರಬೇತಿ, IED ಪತ್ತೆ ಹಚ್ಚುವಿಕೆ ತರಬೇತಿ ನೀಡಲಾಗಿದ್ದು ಇಂದು ಅದು ತನ್ನ ಶಕ್ತಿ ಪ್ರದರ್ಶನ ಮಾಡಿತು.
