ರಾಜ್ಯದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದ ವಂಚನೆ ಯತ್ನ ಪ್ರಕರಣ ತಣ್ಣಗಾಗಿದೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹೆಸರಲ್ಲಿ 25 ಕೋಟಿ ರೂಪಾಯಿ ವಂಚನೆ ಯತ್ನ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಟ ದರ್ಶನ್ ಮತ್ತು ನಿರ್ಮಾಪಕ ಉಮಾಪತಿ ನಡುವಿನ ಗೊಂದಲ ಮಂಗಳವಾರ ಅಂತ್ಯ ಕಂಡಿದೆ. ಈ ಹಿನ್ನೆಲೆಯಲ್ಲಿ ಇಂದು ನಿರ್ಮಾಪಕ ಉಮಾಪತಿ ಬನಶಂಕರಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿದ್ದಾರೆ.
ನಿರ್ಮಾಪಕ ಉಮಾಪತಿ ಈ ಪ್ರಕರಣದಲ್ಲಿ ತಾನು ಯಾವುದೇ ತಪ್ಪು ಮಾಡಿಲ್ಲ. ನಮ್ಮ ಮನೆ ದೇವರು ಬನಶಂಕರಿ ಅಮ್ಮ ಕಾಪಾಡುತ್ತಾಳೆ ಅಂತಾ ಹೇಳಿದ್ದರು. ಅದರಂತೆ ನಿನ್ನೆಯೇ ದರ್ಶನ್ ಹಾಗೂ ಉಮಾಪತಿ ಖಾಸಗಿ ಹೋಟೆಲ್‌ನಲ್ಲಿ ಭೇಟಿಯಾಗಿ ಚರ್ಚಿಸಿ, ಈ ವಿವಾದಕ್ಕೆ ಫುಲ್ ಸ್ಟಾಪ್ ಇಟ್ಟಿದ್ದಾರೆ. ದರ್ಶನ್ ಅವರ ಜೊತೆ ಸಂಧಾನ ಹಿನ್ನೆಲೆ, ನಿರ್ಮಾಪಕ ಉಮಾಪತಿ ಅವರು ಪತ್ನಿ ಸಮೇತ ಬನಶಂಕರಿ ದೇವಸ್ಥಾನಕ್ಕೆ ಬಂದು ವಿಶೇಷ ಪೂಜೆ ನೆರವೇರಿಸಿದ್ದಾರೆ.
ಬನಶಂಕರಿ ಅಮ್ಮನ ಭಕ್ತನಾಗಿರುವ ಉಮಾಪತಿ, ಮಂಗಳವಾರ ಮಾತನಾಡುವ ವೇಳೆ ನಾನು ನಿರಪರಾಧಿ. ಬನಶಂಕರಿ ಅಮ್ಮ ನನ್ನನ್ನು ಕಾಪಾಡುತ್ತಾಳೆ ಎಂದು ಹೇಳಿದ್ರು. ಈಗ ಪ್ರಕರಣದಲ್ಲಿ ಕೊಂಚ ರಿಲೀಫ್ ಸಿಗ್ತಿದ್ದಂತೆ, ದೇವಿಗೆ ಉಮಾಪತಿ ಪೂಜೆ ಸಲ್ಲಿಸಿದ್ದಾರೆ.
