ನಗರದಲ್ಲಿ ರಸ್ತೆ ಗುಂಡಿಗಳಿದ್ದರೆ ವಾಟ್ಸಾಪ್ ಮಾಡಿ, ಪರಿಹಾರ ಪಡೆಯಿರಿ

ಸಾರ್ವಜನಿಕರು ತಮ್ಮ ಸುತ್ತಮುತ್ತಲ ರಸ್ತೆ ಗುಂಡಿಗಳ ಪೋಟೋ ತೆಗೆದು ಮೊಬೈಲ್ ಸಂಖ್ಯೆ 8095500118ಕ್ಕೆ ಕಳುಹಿಸಬಹುದಾಗಿದೆ. ಲೊಕೇಷನ್ ಕೂಡ ಕಳುಹಿಸಿದರೆ, ಈ ಕುರಿತು ಕೆಎಸ್ಎಲ್ಎಸ್ಎ ಪರಿಶೀಲಿಸಿ, ನ್ಯಾಯಾಲಯದ ಗಮನಕ್ಕೆ ತರಲಿದೆ.

ಬೆಂಗಳೂರು: ನಗರದಲ್ಲಿರುವ ರಸ್ತೆ ಗುಂಡಿಗಳಿಂದ ಮುಕ್ತಿ ಪಡೆಯಲು ಕರ್ನಾಟಕ ರಾಜ್ಯ ಕಾನೂನು ಸೇವಾ ಪ್ರಾಧಿಕಾರ ಸಾರ್ವಜನಿಕರಿಗೆ ಅವಕಾಶ ಕಲ್ಪಿಸಿದೆ.

ನಗರದಲ್ಲಿರುವ ರಸ್ತೆ ಗುಂಡಿಗಳನ್ನು ಸರಿಯಾಗಿ ಮುಚ್ಚದಿರುವ ಕುರಿತು ವ್ಯಾಪಕ ಆರೋಪಗಳಿವೆ. ಹಾಗೆಯೇ ಸಾಕಷ್ಟು ಬಾರಿ ಇವೇ ಗುಂಡಿಗಳಿಂದ ಅಪಘಾತಗಳೂ ಸಂಭವಿಸಿವೆ. ಈ ಹಿನ್ನೆಲೆಯಲ್ಲಿ ಕೆಲ ಸಂಘಟನೆಗಳು ರಸ್ತೆ ಗುಂಡಿಗಳನ್ನು ಮುಚ್ಚಲು ಬಿಬಿಎಂಪಿ ಸೇರಿದಂತೆ ಸಂಬಂಧಿಸಿದ ಪ್ರಾಧಿಕಾರಗಳಿಗೆ ನಿರ್ದೇಶಿಸುವಂತೆ ಕೋರಿ ಹೈಕೋರ್ಟ್​ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿವೆ.

ರಸ್ತೆ ಗುಂಡಿಗಳಿಗೆ ಪರಿಹಾರ

ಅರ್ಜಿ ವಿಚಾರಣೆ ನಡೆಸುತ್ತಿರುುವ ಹೈಕೋರ್ಟ್, ನಗರದಲ್ಲಿರುವ ರಸ್ತೆ ಗುಂಡಿಗಳು ಹಾಗೂ ಕಳಪೆಯಾಗಿರುವ ರಸ್ತೆಗಳ ಕುರಿತು ವರದಿ ಕೇಳಿದ್ದು, ಈ ಮಾಹಿತಿಯನ್ನು ಸಾರ್ವಜನಿಕರಿಂದ ಪಡೆದುಕೊಳ್ಳಲು ಕೆಎಸ್ಎಲ್ಎಸ್ಎ ವಾಟ್ಸಾಪ್ ಬಳಸಿಕೊಳ್ಳಲು ಕರೆ ನೀಡಿದೆ.

ಅದರಂತೆ, ಸಾರ್ವಜನಿಕರು ತಮ್ಮ ಸುತ್ತಮುತ್ತಲ ರಸ್ತೆ ಗುಂಡಿಗಳ ಪೋಟೋ ತೆಗೆದು ಮೊಬೈಲ್ ಸಂಖ್ಯೆ 8095500118ಕ್ಕೆ ಕಳುಹಿಸಬಹುದಾಗಿದೆ. ಹಾಗೆಯೇ, ರಸ್ತೆ ಗುಂಡಿ ಇರುವ ಲೊಕೇಷನ್ ಕೂಡ ಕಳುಹಿಸಿದರೆ, ಈ ಕುರಿತು ಕೆಎಸ್ಎಲ್ಎಸ್ಎ ಪರಿಶೀಲಿಸಿ, ನ್ಯಾಯಾಲಯದ ಗಮನಕ್ಕೆ ತರಲಿದೆ.