ಬೆಂಗಳೂರು : ಆರೋಗ್ಯ ಸಚಿವರ ಏಕ ಪತ್ನಿ ವ್ರತಸ್ಥ ಪ್ರಮಾಣಪತ್ರ ಹಾಗೂ ರಾಜ್ಯದ 225 ಎಂಎಲ್ಎಗಳು ಚಾರಿತ್ರ್ಯದ ಪರೀಕ್ಷೆ ಆಗಬೇಕು ಎಂಬ ಹೇಳಿಕೆಗೆ ಮಾಧ್ಯಮ ಅಕಾಡೆಮಿ ಮಾಜಿ ಅಧ್ಯಕ್ಷ, ಹಿರಿಯ ಪತ್ರಕರ್ತ ಎಂ ಸಿದ್ದರಾಜು ಈಟಿವಿ ಭಾರತಕ್ಕೆ ಪ್ರತಿಕ್ರಿಯೆ ನೀಡಿದ್ದಾರೆ.
ಈ ಕುರಿತು ಮಾತನಾಡಿದ ಅವರು, ಒಬ್ಬ ಕ್ಯಾಬಿನೆಟ್ ಸಚಿವನಾಗಿ ಈ ರೀತಿ ಹೇಳಿಕೆ ನೀಡಿರುವುದು ದುರದೃಷ್ಟಕರ, ಸಾಮಾನ್ಯ ಜನರ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ ಎಂದು ಅಭಿಪ್ರಾಯಪಟ್ಟರು.
ಬೇಜವಾಬ್ದಾರಿ ಹೇಳಿಕೆ ನೀಡಿ ತಮ್ಮನ್ನು ತಾವೇ ಸಂಕಷ್ಟಕ್ಕೆ ಸಿಲಿಕಿಸಿಕೊಂಡಿದ್ದು, ಈ ಹೇಳಿಕೆ ನಮ್ಮನ್ನಾಳುವ ಸರ್ಕಾರದ ಹಿರಿಯ ಸಚಿವನಿಂದ ಬಂದಿರುವುದು ತುಂಬಾ ದುರದೃಷ್ಟಕರ ಎಂದು ಬೇಸರ ವ್ಯಕ್ತಪಡಿಸಿದರು.
ಎಲ್ಲಾ ಜನಪ್ರತಿನಿಧಿಗಳು ತಮ್ಮ ಹೆಂಡತಿಯರ ಜೊತೆ ನಿಷ್ಠರಾಗಿಲ್ಲ ಎನ್ನುವಂತಿದೆ. ರಾಜ್ಯದ 225 ಜನಪ್ರಧಿನಿಧಿಗಳಲ್ಲಿ 7 ಮಹಿಳಾ ಶಾಸಕಿಯರಿದ್ದಾರೆ ಎಂಬುದನ್ನು ಸಚಿವರು ಮರೆತಂತಿದೆ.
ಬೇಜವಾಬ್ದಾರಿ ಹೇಳಿಕೆಗಳು ಸುಮ್ಮನೆ ವಿವಾದಗಳನ್ನು ಹುಟ್ಟಿ ಹಾಕುತ್ತವೆ ಹೊರೆತು, ಇದರಿಂದ ಸರ್ಕಾರಕ್ಕಾಗಲಿ, ಜನಸಾಮಾನ್ಯರಿಗಾಗಲಿ ಯಾವುದೇ ಪ್ರಯೋಜನವಿಲ್ಲ. ತಮ್ಮ ಬಾಲಿಶ ಹೇಳಿಕೆಯಿಂದ ತಮ್ಮನ್ನು ತಾವು ಜನರ ಕಣ್ಣಲ್ಲಿ ಸಣ್ಣವರನ್ನಾಗಿಸಿಕೊಂಡಿದ್ದಾರೆ ಎಂದರು.
