ತ್ವರಿತ ನ್ಯಾಯದಾನದ ಮೂಲಕ ಜನರ ಹಕ್ಕುಗಳ ರಕ್ಷಣೆ: ಮುಖ್ಯ ನ್ಯಾಯಮೂರ್ತಿ ವರಾಳೆ

ರಾಜ್ಯ ಹೈಕೋರ್ಟ್‌ನಲ್ಲಿ ಗಣರಾಜ್ಯೋತ್ಸವ ಸಂಭ್ರಮ. ನ್ಯಾಯಾಂಗದ ಮುಂದೆ ಜನರ ಹಕ್ಕುಗಳ ರಕ್ಷಣೆಯ ಹೊಣೆ ಇದೆ. ತ್ವರಿತ ನ್ಯಾಯದಾನದ ಮೂಲಕ ನಾಗರಿಕರ ರಕ್ಷಣೆಯಾಗಬೇಕು - ಹೈಕೋರ್ಟ್ ಮುಖ್ಯನ್ಯಾಯಮೂರ್ತಿ ವರಾಳೆ.

ಬೆಂಗಳೂರು: "ದೇಶದ ಜನತೆಯ ಹಕ್ಕುಗಳನ್ನು ರಕ್ಷಣೆ ಮಾಡುವ ಜವಾಬ್ದಾರಿ ನ್ಯಾಯಾಂಗ ಕ್ಷೇತ್ರದ ಮುಂದಿದ್ದು, ಇಡೀ ನ್ಯಾಯಾಂಗ ಕ್ಷೇತ್ರ ತ್ವರಿತ ನ್ಯಾಯದಾನದ ಮೂಲಕ ನಾಗರಿಕರ ರಕ್ಷಣೆ ಮಾಡಬೇಕು" ಎಂದು ಮುಖ್ಯ ನ್ಯಾಯಮೂರ್ತಿ ಪ್ರಸನ್ನ ಬಾಲಚಂದ್ರ ವರಾಳೆ ತಿಳಿಸಿದ್ದಾರೆ. 74ನೇ ಗಣರಾಜ್ಯೋತ್ಸವದ ಪ್ರಯುಕ್ತ ಗುರುವಾರ ಹೈಕೋರ್ಟ್ ಆವರಣದಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಧ್ವಜಾರೋಹಣ ನೆರವೇರಿಸಿ ಅವರು ಮಾತನಾಡಿದರು.

"ಸಂವಿಧಾನದಲ್ಲಿ ಸಾಮಾಜಿಕ, ಆರ್ಥಿಕ ಮತ್ತು ರಾಜಕೀಯ ಸಮಾನತೆ, ಸ್ವಾತಂತ್ರ್ಯ ಮತ್ತು ಭ್ರಾತೃತ್ವದ ಮೂಲಭೂತ ಅಂಶಗಳನ್ನು ರಕ್ಷಣೆ ಮಾಡುವುದು ನ್ಯಾಯಾಂಗ ವ್ಯವಸ್ಥೆಯ ಪ್ರಾಥಮಿಕ ಕರ್ತವ್ಯ. ಅವುಗಳನ್ನು ಈ ಕ್ಷೇತ್ರ ಚಾಚೂ ತಪ್ಪದೆ ಪಾಲಿಸಬೇಕಾಗುತ್ತದೆ. ನಮ್ಮ ಸಂವಿಧಾನದಲ್ಲಿ ದೇಶದ ಜನತೆಯ ವೈವಿಧ್ಯತೆಯ ಅಗತ್ಯಗಳಿಗೆ ಪರಿಹಾರ ನೀಡಲಾಗಿದೆ. ಆ ಮೂಲಕ ಜನತೆಯನ್ನು ಒಗ್ಗೂಡಿಸುವ ಶಕ್ತಿ ಇದೆ. ಅಲ್ಲದೆ, ಮನುಕುಲದ ಘನತೆ ಎತ್ತಿ ಹಿಡಿಯಲಿದೆ ಮತ್ತು ಮಾನವನ ಮೌಲ್ಯಗಳ ಕಲ್ಪನೆಗಳು ಮತ್ತು ಆಧ್ಯಾತ್ಮಿಕ ಮಾನದಂಡಗಳನ್ನು ಗೌರವಿಸಲಿದೆ" ಎಂದು ಹೇಳಿದರು.

"ಬಾಬಾ ಸಾಹೇಬ್​ ಅಂಬೇಡ್ಕರ್ ಅವರ ನೇತೃತ್ವದಲ್ಲಿ ದೇಶಕ್ಕೆ ಅತ್ಯಮೂಲ್ಯವಾದ ಸಂವಿಧಾನ ಸಿಕ್ಕಿದೆ. ಇದರಲ್ಲಿರುವ ಎಲ್ಲ ಅಂಶಗಳನ್ನು ಕಟ್ಟುನಿಟ್ಟಾಗಿ ಪಾಲನೆ ಮಾಡಿದಲ್ಲಿ ಭಾರತ ದೇಶ ನಿರೀಕ್ಷೆ ಮೀರಿ ಸಾಧನೆ ಮಾಡಲು ನೆರವಾಗಲಿದೆ. ಹೀಗಾಗಿ ಕಾನೂನುಗಳಿಂದ ಸಂವಿಧಾನದ ರಕ್ಷಣೆ ಮಾಡಬೇಕಾಗಿರುವುದು ನಮ್ಮ ಜವಾಬ್ದಾರಿ" ಎಂದು ತಿಳಿಸಿದರು.

ನ್ಯಾಯ ಎಲ್ಲರಿಗೂ ದೊರಕಬೇಕು: "ಸಾಮಾಜಿಕವಾಗಿ ಹಿಂದುಳಿದವರು, ಮಹಿಳೆಯರು, ಮಕ್ಕಳು ಮತ್ತು ಹಿರಿಯ ನಾಗರಿಕರಿಗೆ ನ್ಯಾಯ ಲಭ್ಯವಾಗುವಂತೆ ಮಾಡಲು ನ್ಯಾಯಾಂಗ ಕ್ಷೇತ್ರ ಶ್ರಮಿಸಬೇಕಾಗಿದೆ. ಸಂವಿಧಾನದ ಮೂಲಕ ನಾಗರಿಕರಿಗೆ ಲಭ್ಯವಿರುವ ಎಲ್ಲ ಕಾನೂನುಗಳು ಎಲ್ಲರಿಗೂ ಲಭ್ಯವಾಗುವಂತಾಗಬೇಕು. ಈ ಎಲ್ಲ ಅಂಶಗಳನ್ನು ಪರಿಗಣಿಸಿಯೇ ನ್ಯಾಯ ಒದಗಿಸುವಂತಾಗಬೇಕು. ಸಂಪನ್ಮೂಲಗಳು ಮತ್ತು ಜ್ಞಾನದ ಕೊರತೆಯಿಂದ ಯಾವುದೇ ವ್ಯಕ್ತಿಗೆ ನ್ಯಾಯ ಲಭ್ಯವಾಗದಂತೆ ನೋಡಿಕೊಳ್ಳಬೇಕು" ಎಂದರು.

"ಜಾತಿ, ಸಂಸ್ಕೃತಿ, ಬಣ್ಣದ ಆಧಾರದಲ್ಲಿ ತಾರತಮ್ಯ ಅನುಸರಿಸಬಾರದು ಎಂದು ಸಂವಿಧಾನದಲ್ಲಿ ಒತ್ತಿ ಹೇಳಲಾಗಿದೆ. ಜೊತೆಗೆ, ಸಂವಿಧಾನದಿಂದ ಜನತೆಗೆ ಲಭ್ಯವಾಗಿರುವ ಹಕ್ಕುಗಳನ್ನು ನ್ಯಾಯಾಂಗ ಕ್ಷೇತ್ರದ ಸಹಕಾರದಿಂದ ರಕ್ಷಣೆ ಮಾಡಬೇಕು. ಅಲ್ಲದೆ, ಬಾಬಾ ಸಾಹೇಬ್​ ಅಂಬೇಡ್ಕರ್​ ಹೇಳಿದಂತೆ ನಾವು ಮೊದಲು ಭಾರತೀಯರು, ಕೊನೆಯದೂ ಭಾರತೀಯರು ಭಾರತವನ್ನು ಹೊರತು ಪಡಿಸಿ ಬೇರೇನೂ ಇಲ್ಲ ಎಂಬುದನ್ನು ನಾವು ಅರಿತುಕೊಳ್ಳಬೇಕು" ಎಂದು ಅವರು ವಿವರಿಸಿದರು.

"ನ್ಯಾಯಾಂಗ ಕ್ಷೇತ್ರ ಪ್ರಸ್ತುತ ಸ್ಥಿತಿಗತಿಗಳು ಮತ್ತು ಮುಂದೆ ಎದುರಾಗುವ ಸವಾಲುಗಳನ್ನು ಗಮನಿಸಿ ನ್ಯಾಯದಾನ ಮಾಡಬೇಕು. ಜನರ ಹಕ್ಕುಗಳನ್ನು ರಕ್ಷಣೆ ಮಾಡುವ ಕುರಿತ ಪ್ರತಿಜ್ಞೆ ಮಾಡಬೇಕು. ಈ ಸಂದರ್ಭದಲ್ಲಿ ಎದುರಾಗುವ ಸವಾಲುಗಳನ್ನು ಹಿಮ್ಮೆಟ್ಟಿಸಬೇಕು" ಎಂದು ಅವರು ನ್ಯಾಯಾಂಗ ಅಧಿಕಾರಿಗಳಿಗೆ ಸಲಹೆ ನೀಡಿದರು. ಈ ಸಂದರ್ಭದಲ್ಲಿ ಹೈಕೋರ್ಟ್​ನ ಎಲ್ಲ ನ್ಯಾಯಮೂರ್ತಿಗಳು, ಸಿವಿಲ್​ ನ್ಯಾಯಾಲಯದ ನ್ಯಾಯಾಧೀಶರು, ನ್ಯಾಯಾಂಗ ಅಧಿಕಾರಿಗಳು, ಹಿರಿಯ ವಕೀಲರು, ಸರ್ಕಾರಿ ವಕೀಲರು ಮತ್ತಿತರರು ಹಾಜರಿದ್ದರು.

ಇದಕ್ಕೂ ಮುನ್ನ ಅಡ್ವೋಕೇಟ್​ ಜನರಲ್​ ಕಚೇರಿಯಿಂದ ನಡೆದ ಗಣರಾಜ್ಯೋತ್ಸವದಲ್ಲಿ ರಾಜ್ಯ ಅಡ್ವೋಕೆಟ್​ ಜನರಲ್​ ಪ್ರಭುಲಿಂಗ ನಾವದಗಿ ಧ್ವಜಾರೋಹಣ ನೆರವೇರಿಸಿದರು. ಬೆಂಗಳೂರು ವಕೀಲರ ಸಂಘದಿಂದ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಸಂಘದ ಅಧ್ಯಕ್ಷ ವಿವೇಕ್​ ಸುಬ್ಬಾರೆಡ್ಡಿ ಧ್ವಜಾರೋಹಣ ನೆರವೇರಿಸಿದರು.

ಇದನ್ನೂ ಓದಿ: ಆಂಬ್ಯುಲೆನ್ಸ್‌ ಅಪಘಾತದಿಂದ ರೋಗಿ ಸಾವು ಪ್ರಕರಣ: ಪರಿಹಾರ ನೀಡಲು ಹೈಕೋರ್ಟ್ ಆದೇಶ