ಬೆಂಗಳೂರು: ಕರ್ತವ್ಯ ಬಿಟ್ಟು ಹೋಟೆಲ್ನಲ್ಲಿ ಇಸ್ಪೀಟ್ ಆಡುತ್ತಿದ್ದ ವೇಳೆ ದಕ್ಷಿಣ ವಿಭಾಗದ ಡಿಸಿಪಿ ಹರೀಶ್ ಪಾಂಡೆ ನೇತೃತ್ವದಲ್ಲಿ ದಾಳಿ ನಡೆಸಿ 7 ಮಂದಿ ಪೊಲೀಸರು ಸೇರಿ 9 ಮಂದಿಯನ್ನು ವಶಕ್ಕೆ ಪಡೆಯಲಾಗಿದೆ. ಜೆ.ಪಿ ನಗರದ 6ನೇ ಬ್ಲಾಕ್ನಲ್ಲಿರುವ ನಂದಿನಿ ಹೋಟೆಲ್ನಲ್ಲಿ ಇಸ್ಪೀಟ್ ಆಡುತ್ತಿರುವ ಕುರಿತು ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದಾಗ ಪೊಲೀಸ್ ಸಿಬ್ಬಂದಿ ಸಿಕ್ಕಿಬಿದ್ದಿದ್ದಾರೆ.
ರಾತ್ರಿ 12:45ರ ಸುಮಾರಿಗೆ ಹೋಟೆಲ್ ಮೇಲೆ ದಾಳಿ ಮಾಡಿ 52,540 ರೂಪಾಯಿ ಹಣ ಹಾಗೂ ಇಸ್ಪೀಟ್ ಕಾರ್ಡ್ಸ್ ವಶಕ್ಕೆ ಪಡೆದಿದ್ದಾರೆ. ಹಾಗೆ ಇಸ್ಪೀಟ್ ಆಟದಲ್ಲಿ ಭಾಗಿಯಾದ ಮಲ್ಲೇಶ್, ಲೋಕೇಶ್, ಗವಿ ಸಿದ್ದಪ್ಪ, ಗೋವಿಂದ, ಸತೀಶ್, ಚಂದ್ರಶೇಖರ್, ಶಿವಲಿಂಗೇಗೌಡ, ಗಿರೀಶ್ ಹಾಗೂ ರಾಮೇಗೌಡ ಎಂಬವರನ್ನು ವಶಕ್ಕೆ ಪಡೆಯಲಾಗಿದೆ. ಬಂಧಿತ 9 ಆರೋಪಿಗಳ ಪೈಕಿ 7 ಜನ ಪೊಲೀಸರು ಅಂತ ತಿಳಿದು ಬಂದಿದೆ.
ಇನ್ನು ತನಿಖೆ ವೇಳೆ ಆರೋಪಿಗಳು ಸ್ನೇಹಿತನ ಬರ್ತ್ ಡೇ ಪಾರ್ಟಿ ಹಿನ್ನೆಲೆ ಇಸ್ಪೀಟ್ ಆಡಿದ್ದಾಗಿ ತಿಳಿಸಿದ್ದಾರೆ. ಸದ್ಯ ಡಿಸಿಪಿ ಸೂಚನೆಯಂತೆ ಪುಟ್ಟೇನಹಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿಗಳ ಮೇಲೆ ಇಲಾಖಾ ತನಿಖೆಗೆ ಡಿಸಿಪಿ ಹರೀಶ್ ಪಾಂಡೆ ಸೂಚಿಸಿದ್ದಾರೆ.
