ಪ್ಲಾಸ್ಟಿಕ್ ಬಳಸಿ ದಂಡ ಪಾವತಿಸಿದ ಮೇಯರ್ ಗಂಗಾಂಬಿಕೆ

ಬೆಂಗಳೂರು ಮಹಾನಗರ ಪಾಲಿಕೆಯ ಮೇಯರ್ ಗಂಗಾಬಿಕೆ ಪ್ಲಾಸ್ಟಿಕ್ ಬಳಸಿದ್ದಾರೆಂಬ ಆರೋಪಗಳು ಕೇಳಿ ಬಂದಿದ್ದು, ಇದರಿಂದ ಎಚ್ಚೆತ್ತು 500 ರೂ. ದಂಡ ಕಟ್ಟಿ ನಿಮಯ ಉಲ್ಲಂಘಿಸಿದಕ್ಕೆ ಕ್ಷಮೆಯಾಚಿಸಿದ್ದಾರೆ.

ಬೆಂಗಳೂರು: ಪ್ಲಾಸ್ಟಿಕ್​ ಬಳಕೆ ಮಾಡಿದರೆ ದಂಡ ವಿಧಿಸಲಾಗುತ್ತದೆ ಎಂದು ಖಡಕ್​​ ಎಚ್ಚರಿಕೆ ನೀಡಿದ್ದ ಬಿಬಿಎಂಪಿ ಮೇಯರ್ ಗಂಗಾಂಬಿಕೆ ಅವರೇ ಪ್ಲಾಸ್ಟಿಕ್​ ಬಳಸಿ ದಂಡ ಪಾವತಿಸಿದ್ದಾರೆ.

ಇದು ನನಗೆ ಗೊತ್ತಿದ್ದೂ ಆದ ತಪ್ಪಲ್ಲ. ಪ್ಲಾಸ್ಟಿಕ್ ನಿಷೇಧಕ್ಕೆ ಆಗ್ರಹಿಸುತ್ತಾ ಬಂದಿದ್ದೇನೆ. ಎಲ್ಲ ಹಂತಗಳಲ್ಲಿ ಪ್ಲಾಸ್ಟಿಕ್ ಬಳಕೆ ರದ್ದಾಗಬೇಕು ಎಂಬ ಮನೋಭಾವದಲ್ಲಿ ಈ ಆಂದೋಲನ ಆರಂಭಿಸಿದೆ. ನನ್ನಿಂದ ತಪ್ಪಾಗಿದೆ ಎಂಬ ಭಾವನೆ ನನಗೆ ಬಂದಿದೆ. ಹೀಗಾಗಿ, ನಿಯಮ ಉಲ್ಲಂಘಿಸಿದ್ದಕ್ಕೆ 500 ರೂ. ದಂಡ ಪಾವತಿಸಿದ್ದೇನೆ. ಒಂದು ಒಳ್ಳೆಯ ಅಭಿಯಾನ ನನ್ನಿಂದಲೇ ಆರಂಭವಾಗಲಿ ಎಂದು ಮೇಯರ್ ಗಂಗಾಂಬಿಕೆ ಹೇಳಿದರು.

ಘಟನೆ ಹಿನ್ನೆಲೆ:

ನೂತನ ಸಿಎಂ ಬಿ.ಎಸ್​.ಯಡಿಯೂರಪ್ಪ ಅವರನ್ನು ಭೇಟಿ ಮಾಡಿದ್ದ ವೇಳೆ ಮೇಯರ್ ಗಂಗಾಂಬಿಕೆ ಅವರು ತಮ್ಮ ಶುಭಾಶಯದೊಂದಿಗೆ ಡ್ರೈಫ್ರೂಟ್ಸ್ ಬುಟ್ಟಿಯೊಂದನ್ನು ನೀಡಿದ್ದರು. ಬುಟ್ಟಿಯ ಮೇಲ್ಭಾಗ ಪ್ಲಾಸ್ಟಿಕ್ ಕವರ್​ನಿಂದ ಮುಚ್ಚಲಾಗಿತ್ತು. ಈ ಭೇಟಿ ವೇಳೆಯ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿ, ಮೇಯರ್​ ನಡೆಯ ವಿರುದ್ಧ ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದರು. ಇದರಿಂದ ಎಚ್ಚೆತ್ತ ಮೇಯರ್, ನಿಯಮ ಉಲ್ಲಂಘಿಸಿದಕ್ಕಾಗಿ 500 ರೂ. ದಂಡ ಕಟ್ಟಿದ್ದರು. ನಿಯಮ ಉಲ್ಲಂಘಿಸಿದಕ್ಕೆ ಕ್ಷಮೆಯಾಚಿಸಿ, ಬಿಬಿಎಂಪಿಯ ಆರೋಗ್ಯ ಇಲಾಖೆಯ ಕಚೇರಿಗೆ ತೆರಳಿ ದಂಡ ಕಟ್ಟಿದ್ದಾರೆ.