ಬೆಂಗಳೂರು ಲಾಕ್​ಡೌನ್​ ವೇಳೆ ರಸ್ತೆಗಿಳಿಯಲ್ಲ ಓಲಾ-ಉಬರ್ ಕ್ಯಾಬ್​ಗಳು

ಇಂದು ರಾತ್ರಿಯಿಂದಲೇ ಓಲಾ ಹಾಗೂ ಉಬರ್ ಕ್ಯಾಬ್ ಗಳು ರಸ್ತೆಗೆ ಇಳಿಯದಂತೆ ಓಲಾ-ಉಬರ್ ಕ್ಯಾಬ್ ಅಸೋಸಿಯೇಷನ್​ನ ಎಲ್ಲಾ ಚಾಲಕರಿಗೆ ತಿಳಿಸಲಾಗಿದೆ ಎಂದು ಕರ್ನಾಟಕ ರಾಜ್ಯ ಓಲಾ-ಉಬರ್ ಅಸೋಸಿಯೇಷನ್​ ರಾಜ್ಯಾಧ್ಯಕ್ಷ ತನ್ವೀರ್ ಪಾಷ ಹೇಳಿದ್ದಾರೆ.

ಬೆಂಗಳೂರು : ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಪ್ರದೇಶಗಳಲ್ಲಿ ಇಂದು ರಾತ್ರಿ 8 ಗಂಟೆಯಿಂದ ಒಂದು ವಾರಗಳ ಕಾಲ ಲಾಕ್​ಡೌನ್ ಇರುವ ಹಿನ್ನೆಲೆ ಓಲಾ ಹಾಗೂ ಉಬರ್ ಕ್ಯಾಬ್​ಗಳು ರಸ್ತೆಗೆ ಇಳಿಯುವುದಿಲ್ಲ ಎಂದು ಕರ್ನಾಟಕ ರಾಜ್ಯ ಓಲಾ-ಉಬರ್ ಅಸೋಸಿಯೇಷನ್​ ರಾಜ್ಯಾಧ್ಯಕ್ಷ ತನ್ವೀರ್ ಪಾಷ ಹೇಳಿದರು.

ಈ ಬಗ್ಗೆ ಓಲಾ ಹಾಗೂ ಉಬರ್ ಕ್ಯಾಬ್​ ಚಾಲಕರಿಗೆ ತಿಳಿಸಲಾಗಿದೆ. ಅಲ್ಲದೆ ಏರ್​ಪೋರ್ಟ್ ಪಿಕ್​ಅಪ್ ಅಂಡ್ ಡ್ರಾಪ್​ಗೆ ಹೋಗುವ ಚಾಲಕರು ಪ್ರಯಾಣಿಕರ ಏರ್ ಟಿಕೆಟ್ ಅನ್ನು ಕಲೆಕ್ಟ್ ಮಾಡಿ ಜೊತೆಯಲ್ಲಿ ಇಟ್ಟುಕೊಂಡು ಪ್ರಯಾಣ ಮಾಡಿ. ಒಂದು ವೇಳೆ ಪೊಲೀಸರು ತಡೆದರೆ ವಿಮಾನದ ಟಿಕೆಟ್​ ಪಾಸ್ ಆಗಿರುತ್ತದೆ. ಸರ್ಕಾರ ಕೊರೊನಾ ನಿಯಂತ್ರಣ ಮಾಡುವಲ್ಲಿ ವಿಫಲವಾಗಿದೆ. ಅವರು ಮಾಡಿದ ತಪ್ಪಿಗೆ ಮತ್ತೆ-ಮತ್ತೆ ಲಾಕ್​ಡೌನ್ ಮಾಡಿ ಬಡವರು, ಶ್ರಮಿಕರು, ಕೂಲಿ ಕಾರ್ಮಿಕರಿಗೆ ಹಾಗೂ ಕ್ಯಾಬ್ ಚಾಲಕರಿಗೆ ತುಂಬಾ ದೊಡ್ಡ ಪೆಟ್ಟು ಬಿದ್ದಿದೆ ಎಂದು ತನ್ವೀರ್ ಬೇಸರ ವ್ಯಕ್ತಪಡಿಸಿದರು.

ನಾಳೆಯಿಂದ ನಮ್ಮ ಚಾಲಕರು ಹೇಗೆ ಜೀವನವನ್ನು ನಿರ್ವಹಿಸಬೇಕು ಎಂದು ಪರಿತಪಿಸುತ್ತಿದ್ದಾರೆ. ಕೋವಿಡ್​ ಭೀತಿಯಿಂದ ಕ್ಯಾಬ್​ಗಳಿಗೆ ಬ್ಯುಸಿನೆಸ್ ಇಲ್ಲದೆ ಸಂಕಷ್ಟದಲ್ಲಿದ್ದಾರೆ. ಅಲ್ಲದೆ ಸರ್ಕಾರ 7ಲಕ್ಷ ಕ್ಯಾಬ್ ಚಾಲಕರಿಗೆ ಐದು ಸಾವಿರ ರೂ. ಪರಿಹಾರ ಹಣ ನೀಡುವುದಾಗಿ ಹೇಳಿ, ಕೇವಲ ಒಂದು ಲಕ್ಷ ಚಾಲಕರಿಗೆ ಮಾತ್ರ ಅನುದಾನದ ಹಣ ನೀಡಿ ಮಾತು ತಪ್ಪಿದೆ ಎಂದು ಅಸಮಾಧಾನ ಹೊರಹಾಕಿದರು.