ಬೆಂಗಳೂರು : ನನಗೆ ಕಿರಿಯ ವಯಸ್ಸಿನಲ್ಲೇ ಸಭಾಧ್ಯಕ್ಷ ಸ್ಥಾನದ ಜವಾಬ್ದಾರಿ ಸಿಕ್ಕಿರುವುದು ನನ್ನ ಸೌಭಾಗ್ಯ. ಕ್ಷೇತ್ರದ ಜನರ ಆಶೀರ್ವಾದದಿಂದಾಗಿ ಈ ಹಂತ ತಲುಪಲು ಸಾಧ್ಯವಾಗಿದೆ. ಪ್ರಜಾಪ್ರಭುತ್ವವನ್ನು ಪ್ರತಿಪಾದಿಸಿದ ಹಿರಿಯರಿಗೆ ಕೃತಜ್ಞತೆ ಸಲ್ಲಿಸುವುದಾಗಿ ನೂತನ ಸಭಾಧ್ಯಕ್ಷ ಯು ಟಿ ಖಾದರ್ ಹೇಳಿದ್ದಾರೆ. ಇಂದು ವಿಧಾನಸಭೆಯಲ್ಲಿ ಸಭಾಧ್ಯಕ್ಷ ಸ್ಥಾನಕ್ಕೆ ಅವಿರೋಧವಾಗಿ ಮಂಗಳೂರು ಕ್ಷೇತ್ರದ ಕಾಂಗ್ರೆಸ್ ಶಾಸಕ ಯು. ಟಿ. ಖಾದರ್ ಫರೀದ್ ಆಯ್ಕೆಯಾದರು.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಮುಖ್ಯಮಂತ್ರಿ ಸಿದ್ದರಾಮಯ್ಯ, ಉಪಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಹಾಗೂ ನೂತನ ಶಾಸಕರನ್ನು ಅಭಿನಂದಿಸಿದರು. ಭಾರತ ದೇಶದಲ್ಲಿ ಪ್ರಜಾಪ್ರಭುತ್ವ ವ್ಯವಸ್ಥೆ ಮೈಸೂರು ಭಾಗದಲ್ಲಿ ಮೊದಲ ಬಾರಿಗೆ ಜಾರಿಗೆ ಬಂದಿದೆ. ಬ್ರಿಟಿಷರ ವಿರೋಧದ ನಡುವೆ ಮೈಸೂರು ಮಹಾರಾಜರು ಪ್ರಜಾಪ್ರಭುತ್ವವನ್ನು ಅನುಷ್ಠಾನಕ್ಕೆ ತಂದರು. ಇಂತಹ ವ್ಯವಸ್ಥೆಯೊಳಗೆ ಕಿರಿಯ ವಯಸ್ಸಿಗೆ ನನ್ನನ್ನು ಸಭಾಧ್ಯಕ್ಷರಾಗಿ ಅವಿರೋಧವಾಗಿ ಆಯ್ಕೆ ಮಾಡಿದ ಸದನದ ಎಲ್ಲ ಸದಸ್ಯರಿಗೂ ಅಭಿನಂದನೆಗಳು ಎಂದರು.
ಕರಾವಳಿ ಭಾಗದ ವೈಕುಂಠ ಬಾಳಿಗ ಅವರು ಈ ಹಿಂದೆ ಸಭಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ. ಸಭಾಧ್ಯಕ್ಷರಾಗಿ ಸದನದ ಘನತೆ ಹೆಚ್ಚಿಸಲು ನಿಮ್ಮೆಲ್ಲರ ಸಹಕಾರ ಅಗತ್ಯವಾಗಿದೆ. ಜನಪ್ರತಿನಿಧಿಗಳು ನಾಡಿನ ಅಭಿವೃದ್ಧಿಗೆ ಪೂರಕವಾಗಿ ಕೆಲಸ ಮಾಡಬೇಕು. ನಾಡಿನ ಜನರ ಶ‍್ರೇಯೋಭಿವೃದ್ಧಿಯೇ ನಮ್ಮ ಆದ್ಯತೆಯಾಗಿರಬೇಕು. ಎಲ್ಲಾ ವರ್ಗದವರ ಸಮಸ್ಯೆಗಳನ್ನು ಚರ್ಚಿಸುವ ಮೂಲಕ ಬೆಳಕು ಚೆಲ್ಲಬೇಕಿದೆ. ಪಕ್ಷ ಬೇಧವಿಲ್ಲದೆ ಎಲ್ಲಾ ಶಾಸಕರನ್ನು ಸಮಾನವಾಗಿ ಕಾಣುವುದು. ಸದನದ ಘನತೆ ಎತ್ತಿಹಿಡಿಯುವುದು ನನ್ನ ಜವಾಬ್ದಾರಿಯಾಗಿದೆ. ಕಲಾಪದಲ್ಲಿ ಮೌಲಿಕ ಚರ್ಚೆಗಳು ಹೆಚ್ಚಾಗಲಿ ಎಂದು ಯು ಟಿ ಖಾದರ್ ಆಶಿಸಿದರು.
ಮಹಾತ್ಮ ಗಾಂಧೀಜಿ, ಸಂವಿಧಾನಶಿಲ್ಪಿ ಬಿ ಆರ್ ಅಂಬೇಡ್ಕರ್ ಸೇರಿದಂತೆ ಹಲವು ಮಹನೀಯರು ಜನರ ದನಿಯಾಗಿ ಕೆಲಸ ಮಾಡಿದ್ದಾರೆ. ಅದೇ ರೀತಿ ಸಂವಿಧಾನದ ನಾಲ್ಕನೇ ಅಂಗವಾದ ಮಾಧ್ಯಮ ರಂಗ ಹಾಗೂ ಕಾರ್ಯಾಂಗ ಕೂಡ ಕೆಲಸ ಮಾಡುತ್ತಿದ್ದು, ರಾಜ್ಯದ ಅಭಿವೃದ್ಧಿಗೆ ಶ್ರಮಿಸುವ ಮೂಲಕ ಬಲಿಷ್ಠ ಕರ್ನಾಟಕವನ್ನು ನಿರ್ಮಾಣ ಮಾಡೋಣ ಎಂದು ಯು ಟಿ ಖಾದರ್ ಹೇಳಿದರು.
ನಂತರ ಮಾತು ಮುಂದುವರಿಸಿದ ಸ್ಪೀಕರ್, ಕಳೆದ ಮೂರು ದಿನಗಳ ಕಾಲ 7 ಗಂಟೆ 10 ನಿಮಿಷ ಸದನದ ಕಲಾಪ ನಡೆದಿದ್ದು, 223 ಸದಸ್ಯರು ಪ್ರಮಾಣ ವಚನ ಸ್ವೀಕರಿಸಿದ್ದಾರೆ ಎಂದು ಹೇಳಿದರು. ನಂತರ ರಾಷ್ಟ್ರಗೀತೆ ಹಾಡುವ ಮೂಲಕ ಸದನವನ್ನು ಅನಿರ್ಧಿಷ್ಠಾವಧಿಗೆ ಮುಂದೂಡಲಾಯಿತು.
ಎರಡನೇ ಕಿರಿಯ ವಯಸ್ಸಿನ ಸ್ಪೀಕರ್ : ಇದಕ್ಕೂ ಮುನ್ನ ನೂತನವಾಗಿ ಆಯ್ಕೆಯಾದ ಸಭಾಧ್ಯಕ್ಷರ ಕುರಿತು ಮಾತನಾಡಿದ ಸಚಿವ ಡಾ. ಜಿ. ಪರಮೇಶ್ವರ್ ಅವರು, ಯು.ಟಿ ಖಾದರ್ ಅವರನ್ನು ಎರಡನೇ ಅತಿ ಚಿಕ್ಕ ವಯಸ್ಸಿನ ಸ್ಪೀಕರ್ ಎಂದು ಹೇಳಬಹುದು. ರಮೇಶ್‍ ಕುಮಾರ್ ಅವರು 1994ರಲ್ಲಿ ಸ್ಪೀಕರಾಗಿದ್ದಾಗ ಅವರ ವಯಸ್ಸು 43 ವರ್ಷ. ಈಗ ನೀವು ಕಿರಿಯ ಸ್ಪೀಕರ್ ಆಗಿದ್ದೀರಿ. ಯುವಕರಿಗೆ ಮಾದರಿಯಾಗಿ, ಆದರ್ಶವಾಗಿ ಇರುತ್ತೀರಿ ಎಂದು ಭಾವಿಸುತ್ತೇನೆ. ನಿಮಗೆ ಸವಾಲುಗಳು ಹೆಚ್ಚು ಇವೆ. ಪ್ರಥಮ ಬಾರಿಗೆ ಅಲ್ಪಸಂಖ್ಯಾತರೊಬ್ಬರು ಈ ಸ್ಥಾನವನ್ನು ಪ್ರತಿನಿಧಿಸುತ್ತಿದ್ದಾರೆ. ಇಡೀ ದೇಶ ನಿಮ್ಮನ್ನು ಗಮನಿಸುತ್ತದೆ ನಿಮಗೆ ಒಳ್ಳೆಯದಾಗಲಿ ಎಂದು ಹಾರೈಸಿದರು.
ಜಿ. ಟಿ. ದೇವೇಗೌಡ ಪ್ರತಿಕ್ರಿಯೆ : ಜೆಡಿಎಸ್‍ನ ಸದಸ್ಯ ಜಿ.ಟಿ. ದೇವೇಗೌಡ ಅವರು ಮಾತನಾಡಿ, 23ನೇ ಸಭಾಧ್ಯಕ್ಷರಾಗಿ ನೀವು ಆಯ್ಕೆಯಾಗಿದ್ದೀರಿ. ಮಾಜಿ ಪ್ರಧಾನಿ ಹೆಚ್‍. ಡಿ. ದೇವೇಗೌಡರು ನಿಮ್ಮ ಆಯ್ಕೆಯನ್ನು ನೋಡಿ ಸಂತೋಷ ಪಟ್ಟಿದ್ದಾರೆ. ರಾಜ್ಯದ ಅಭಿವೃದ್ಧಿ ವಿಚಾರಗಳ ಬಗ್ಗೆ ಚರ್ಚೆಯಾಗಬೇಕು. ಸದನ ಚರ್ಚೆಯಾಗುವ ಎಲ್ಲಾ ವಿಚಾರಗಳಿಗೂ ಪರಿಹಾರ ಸಿಗುವಂತಾಗಬೇಕು ಎಂದು ಹೇಳಿದರು.
ಬಳಿಕ ಸಚಿವ ಕೆ.ಎಚ್‍. ಮುನಿಯಪ್ಪ ಮಾತನಾಡಿ, ಸದನದ ಸಮಯ ಹಾಳಾಗುವುದನ್ನು ತಪ್ಪಿಸಬೇಕು. ಸಮಯ ವ್ಯಯವಾಗುವುದನ್ನು ತಪ್ಪಿಸಿದರೆ, ಜನರ ತೆರಿಗೆ ಹಣ ವ್ಯಯವಾಗುವುದನ್ನು ತಪ್ಪಿಸಬಹುದು ಎಂಬ ಸಲಹೆ ನೀಡಿದರು. ಇದೇ ವೇಳೆ ಕಾಂಗ್ರೆಸ್ ಶಾಸಕ ಟಿ. ಬಿ. ಜಯಚಂದ್ರ ಮಾತನಾಡಿ, ಸಭಾಧ್ಯಕ್ಷರು ನೀಡುವ ತೀರ್ಪು ನ್ಯಾಯಾಂಗಕ್ಕೂ ಮಾರ್ಗದರ್ಶನ ನೀಡುವಂತಿರಬೇಕು. ಕ್ರಿಯಾಲೋಪ ವಿಚಾರ ಪ್ರಸ್ತಾಪವಾದಾಗ ಎರಡು ಕಡೆಯ ವಾದವನ್ನು ಆಲಿಸಿ ಜನತಂತ್ರ ವ್ಯವಸ್ಥೆ ಉಳಿಯುವ ಸಂವಿಧಾನ ಬದ್ಧವಾಗಿ ತೀರ್ಪು ನೀಡಬೇಕು. ಅದನ್ನು ಎಲ್ಲರೂ ಗೌರವಿಸುವಂತಿರಬೇಕು.
ಸದಸ್ಯರಿಗೆ ಮಾಹಿತಿಯನ್ನು ಕಾಗದ ರಹಿತವಾಗಿ ನೀಡುವ ಪ್ರಯೋಗ ಮಾಡಬೇಕು. ವಿರೋಧ ಪಕ್ಷ ಕ್ರಿಯಾಶೀಲವಾಗಿದ್ದಾಗ ಸಂವಿಧಾನದ ಆಶಯ ಈಡೇರಿಸಲು ಸಾಧ್ಯ. ಸಚಿವರು ಪರಿಶೀಲಿಸುವುದಾಗಿ ನೀಡುವ ಉತ್ತರವು ಭರವಸೆಗಳ ಸಮಿತಿ ಮುಂದೆ ಬರುತ್ತದೆ. ಅದು ಪರಿಶೀಲಿಸಿ ವರದಿ ನೀಡುವ ವೇಳೆಗೆ ವರ್ಷವೇ ಕಳೆದಿರುತ್ತದೆ. ಹೀಗಾಗಿ ರೂಲ್ಸ್ ಸಮಿತಿ ರಚಿಸಬೇಕು ಎಂಬ ಸಲಹೆ ಕೊಟ್ಟರು.
ಸಿದ್ಧಾಂತಕ್ಕೆ ಜೋತು ಬೀಳಬಾರದು : ಬಿಜೆಪಿ ಶಾಸಕ ವಿ. ಸುನಿಲ್‍ ಕುಮಾರ್ ಮಾತನಾಡಿ, ಹೊಸ ಸದಸ್ಯರಿಗೆ ಹೆಚ್ಚು ಅವಕಾಶ ಕೊಡಬೇಕು. ಹೊಸ ವಿಚಾರದ ಚರ್ಚೆ ಮಾಡಿ ಪರಿಹಾರ ಕಂಡುಕೊಳ್ಳಲು ಸಾಧ್ಯವಾಗಲಿದೆ. ನೀವು ವಿರೋಧ ಪಕ್ಷದ ಉಪ ನಾಯಕರಾಗಿ ಸಾಮಾಜಿಕ ಕಳಕಳಿಯಿಂದ ಮಾತನಾಡಿದ್ದೀರಿ. ನೀವು ಸಿದ್ಧಾಂತಕ್ಕೆ ಜೋತು ಬೀಳಬಾರದು. ಸದನ ನಡೆಸುವುದಲ್ಲದೆ, ಶಾಸಕರ ರಕ್ಷಣೆ ಜವಾಬ್ದಾರಿಯನ್ನು ನೀವು ಮಾಡಬೇಕು. ಒಳ್ಳೆಯ ಸಂಗತಿಗಳು ಸದನದಲ್ಲಿ ಹೆಚ್ಚು ಚರ್ಚೆಯಾಗಲಿ. ವಿರೋಧ ಪಕ್ಷವಾಗಿ ದೊಡ್ಡ ಜವಾಬ್ದಾರಿಯಿದ್ದು, ಸರ್ಕಾರವನ್ನು ಎಚ್ಚರಿಸುವ ಕೆಲಸ ಮಾಡುತ್ತೇವೆ ಎಂದರು.
ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷದ ಶಾಸಕ ಹಾಗು ರಾಜ್ಯಾಧ್ಯಕ್ಷ ಜನಾರ್ದನ ರೆಡ್ಡಿ ಮಾತನಾಡಿ, ನೀವು ಜಾತ್ಯತೀತ ವ್ಯಕ್ತಿತ್ವವನ್ನು ಬೆಳೆಸಿಕೊಂಡು ಬಂದವರು. ಹೆಚ್ಚು ಶಾಸಕರು ಮೊದಲ ಬಾರಿಗೆ ಆಯ್ಕೆಯಾಗಿದ್ದಾರೆ. ಅವರಿಗೆ ಹೆಚ್ಚು ಅವಕಾಶ ನೀಡಬೇಕು ಎಂದು ಹೇಳಿದರು. ಹಾಗು ಬಿಜೆಪಿ ಶಾಸಕ ಬಿ. ಪಿ. ಹರೀಶ್‍ ಪ್ರತಿಕ್ರಿಯಿಸಿ, ನಾನು ನಿಮ್ಮನ್ನು ಶ್ರೇಷ್ಠ ಕ್ರೀಡಾಪಟು ಎಂದು ಭಾವಿಸಿದ್ದೇನೆ. ಸದನವನ್ನು ಕೂಡ ಕ್ರೀಡಾ ಮನೋಭಾವದಿಂದ ತೆಗೆದುಕೊಂಡು ಹೋಗಬೇಕು. ಯುವ ಸದಸ್ಯರನ್ನು ಪ್ರೋತ್ಸಾಹಿಸುವ ಮೂಲಕ ನಿಮ್ಮ ತಂದೆಯವರ ಹೆಸರಿಗೆ ಗೌರವ ತರುತ್ತೀರಿ ಎಂದು ಭಾವಿಸುತ್ತೇನೆ ಎಂದರು.
ಇನ್ನು ಕಾಂಗ್ರೆಸ್ ಶಾಸಕ ಕೆ.ಎಂ. ಶಿವಲಿಂಗೇಗೌಡ ಮಾತನಾಡಿ ಸದನದ ಸಮಿತಿಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ಕೊಡಬೇಕು. ಹೊಸಬರಿಗೆ ಅವಕಾಶ ಕೊಟ್ಟು ಸಂಸದೀಯ ಪಟುಗಳನ್ನು ಬೆಳೆಸುವ ಶಕ್ತಿ ನಿಮ್ಮ ಮೇಲಿದೆ ಎಂದು ಹೇಳಿದರು. ನಂತರ ಮತ್ತೊಬ್ಬ ಕಾಂಗ್ರೆಸ್ ಶಾಸಕ ಬಸವರಾಜ ರಾಯರೆಡ್ಡಿ ಮಾತನಾಡಿ, ಸಭಾಧ್ಯಕ್ಷರಾದವರು ಚುನಾವಣೆಯಲ್ಲಿ ಸೋಲುತ್ತಾರೆ ಎಂಬ ಮೌಢ್ಯ ಬಿತ್ತಲಾಗುತ್ತಿದೆ. ಸಭಾಧ್ಯಕ್ಷರಾದವರು ಸೋಲುತ್ತಾರೆ ಎಂಬ ವರದಿ ಮಾಡುವುದನ್ನು ಮಾಧ್ಯಮಗಳು ನಿಲ್ಲಿಸಬೇಕು. ಸಭಾಧ್ಯಕ್ಷರಾದವರ ವಿರುದ್ಧ ಅಭ್ಯರ್ಥಿ‍ಗಳನ್ನು ಸ್ಪರ್ಧೆಗಿಳಿಸದೇ ಮತ್ತೆ ವಿಧಾನಸಭೆಗೆ ಆಯ್ಕೆ ಮಾಡಲಾಗುತ್ತಿತ್ತು. ಅದೇ ರೀತಿ ಮುಂದೆ ಖಾದರ್ ವಿರುದ್ಧವೂ ಯಾವ ಅಭ್ಯರ್ಥಿ ಹಾಕಬಾರದು ಎಂದರು.
ಈ ವೇಳೆ ಶಾಸಕರಾದ ಡಾ. ಸಿ.ಎನ್‍. ಅಶ್ವತ್ಥನಾರಾಯಣ, ಆರಗ ಜ್ಞಾನೇಂದ್ರ, ಹೆಚ್‍.ಕೆ. ಪಾಟೀಲ್‍, ಸಿ.ಎನ್‍. ಬಾಲಕೃಷ್ಣ, ಡಾ. ಶರಣ್ ಪ್ರಕಾಶ್‍ ಪಾಟೀಲ್‍, ಎನ್‍.ಎಚ್‍. ಕೋನರೆಡ್ಡಿ, ಬಿ.ಆರ್. ಪಾಟೀಲ್‍, ಬಿ.ವೈ. ವಿಜಯೇಂದ್ರ ಅವರು ನೂತನ ಸಭಾಧ್ಯಕ್ಷರನ್ನು ಅಭಿನಂದಿಸಿ ಮಾತನಾಡಿದರು.
ಇದನ್ನೂ ಓದಿ : ವಿರೋಧ ಪಕ್ಷ ಬಲಿಷ್ಠವಿದ್ದಷ್ಟು ಬಲಿಷ್ಠವಾಗಿರುತ್ತೇವೆ, ದುರ್ಬಲರಾದರೆ, ನಾವೂ ದುರ್ಬಲರಾಗುತ್ತೇವೆ : ಡಿ ಕೆ ಶಿವಕುಮಾರ್
