ಸಚಿವನಾಗಲಿದ್ದೇನೆ.. ಖಾತೆ ಇನ್ನೂ ಗೊತ್ತಿಲ್ಲ; ಮುರುಗೇಶ್ ನಿರಾಣಿ

ಸಚಿವ ಸ್ಥಾನ ಖಾತ್ರಿಯಾದ ಬಳಿಕ ಮುರುಗೇಶ್ ನಿರಾಣಿ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದು, ಯಾವುದೇ ಖಾತೆ ಕೊಟ್ಟರೂ ನಿಭಾಯಿಸುವೆ ಎಂದು ಹೇಳಿದ್ದಾರೆ.

ಬೆಂಗಳೂರು : ಸಚಿವ ಸ್ಥಾನ ಖಾತ್ರಿಯಾದ ಬಳಿಕ ಮಾಧ್ಯಮಗಳ ಜೊತೆ ಮುರುಗೇಶ್ ನಿರಾಣಿ ಮಾತನಾಡಿ, ಸಂಜೆ ಸಚಿವನಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದೇನೆ ಎಂದು ತಿಳಿಸಿದ್ದಾರೆ.

ಸಿಎಂ ಭೇಟಿ ಬಳಿಕ‌ ಮಾತನಾಡಿದ ಅವರು, ಸಿಎಂ ಹಾಗೂ ವರಿಷ್ಠರಿಗೆ ಅಭಿನಂದನೆ. ನಾನು ಬಿಜೆಪಿಯ ಸಾಮಾನ್ಯ ಕಾರ್ಯಕರ್ತ. ತತ್ವ ಸಿದ್ಧಾಂತಗಳ ಅಡಿಯಲ್ಲಿ ಕಾರ್ಯಕರ್ತನಾಗಿ ಕೆಲಸ ಮಾಡಿದ್ದೇನೆ. ಯಾವುದೇ ಜಾತಿ, ಪ್ರಾದೇಶಿಕ ಆಧಾರದಲ್ಲಿ ನನಗೆ ಸಚಿವ ಸ್ಥಾನ ನೀಡುತ್ತಿಲ್ಲ ಎಂದು ಸ್ಪಷ್ಟಪಡಿಸಿದರು. ಮಂತ್ರಿ ಪಟ್ಟ ಸಿಕ್ಕಾಗ ಸಂತೋಷ ಪಡೋದು, ಸಿಗದೇ ಇದ್ದಾಗ ಕಮೆಂಟ್ ಮಾಡೋನು ನಾನಲ್ಲ ಎಂದೂ ಹೇಳಿದರು.

ಎಷ್ಟು ಜನ ಪ್ರಮಾಣ ವಚನ ಸ್ವೀಕಾರ ಮಾಡ್ತಾರೆ ಅನ್ನೋದು ಸಿಎಂ ಸಾಹೇಬ್ರಿಗೆ ಗೊತ್ತು, ಯತ್ನಾಳರು ನಮಗಿಂತ ಹಿರಿಯರು, ನಮಗಿಂತ ಮುಂಚೆ ರಾಜಕೀಯಕ್ಕೆ ಬಂದವರು. ಇದು ಸಿಎಂ ಹಾಗೂ ವರಿಷ್ಠರ ನಿರ್ಧಾರ ಎಂದು ಯತ್ನಾಳ್​ಗೆ ಸಚಿವ ಸ್ಥಾನ ನೀಡದಿರುವ ಪ್ರಶ್ನೆ ಕುರಿತಂತೆ ಉತ್ತರಿಸಿದರು.

ಇನ್ನು ರೇಣುಕಾಚಾರ್ಯ ಅಸಮಾಧಾನ ವಿಚಾರಕ್ಕೆ ಪ್ರತಿಕ್ರಿಯಿಸಿ, ಬೇರೆಯವರ ಬಗ್ಗೆ ನಾನು ಕಮೆಂಟ್ ಮಾಡುವುದಿಲ್ಲ, ಇಲಾಖೆ ಸಣ್ಣದು ದೊಡ್ಡದು ಅಂತ ಇರಲ್ಲ, ಯಾವುದೇ ಇಲಾಖೆ ಸಿಕ್ರೂ ಜೀವ ತುಂಬಿ ಕೆಲಸ ಮಾಡಬೇಕು ಎಂದರು.

ಬಿಜೆಪಿಯ ಸಾಮಾನ್ಯ ಕಾರ್ಯಕರ್ತ ಎಂದು ಮತ್ತೆ ಒತ್ತಿ ಹೇಳಿದ ನಿರಾಣಿ, ಕಳೆದ ಮೂವತ್ತು ವರ್ಷದಿಂದ ನಾನು ಬಿಜೆಪಿಯಲ್ಲಿ ಇದ್ದೇನೆ. ನಾಳೆ ದಿನ ಶಾಸಕ ಸ್ಥಾನ ಕೊಟ್ಟಿಲ್ಲ ಅಂದ್ರೆ ಕೂಡ ಪಕ್ಷದ ವಿರುದ್ಧ ಹೋಗಲ್ಲ ಎಂದು ತಿಳಿಸಿದ್ರು.

ನಾನು ಮತ್ತು ಉಮೇಶ್ ಕತ್ತಿ ಜತೆಗೆ ಇದ್ದೇವೆ. ಇಬ್ಬರಿಗೆ ಕೊಡ್ತಾರೆ ಅನ್ನೋದು ನಂಗೆ ಗೊತ್ತಿದೆ. ಕಳೆದ ಬಾರಿ ಕೊಟ್ಟ ಬೃಹತ್ ಕೈಗಾರಿಕಾ ಖಾತೆಯನ್ನು ನಾನು ಬಹಳ ಶೃದ್ಧೆಯಿಂದ ನಿಭಾಯಿಸಿದ್ದೆ, ಆ ಆಧಾರದ ಮೇಲೆ ನಂಗೆ ಸಚಿವ ಸ್ಥಾನ ಕೊಟ್ಟಿದ್ದಾರೆ ಅಂದುಕೊಂಡಿದ್ದೇನೆ ಎಂದು ನಿರಾಣಿ ಹೇಳಿದ್ರು.

ಇದನ್ನೂ ಓದಿ:ರಾಕಿಂಗ್​ ಸ್ಟಾರ್​ಗೆ​ ಬಿಗ್ ಶಾಕ್​; ಯಶ್​ಗೆ ಆರೋಗ್ಯ ಇಲಾಖೆ ನೋಟಿಸ್