ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಕಂಟ್ರಿಮೇಡ್ ಪಿಸ್ತೂಲ್ಗಳ ಬಳಕೆ ಮಾಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ನಗರದಲ್ಲಿ ಅಕ್ರಮವಾಗಿ ಗನ್ ಸಪ್ಲೈಯರ್ಗಳ ಮೇಲೆ ಪೊಲೀಸರು ಸೂಕ್ತ ಕ್ರಮ ಕೈಗೊಳ್ಳಲು ಮುಂದಾಗಿದ್ದಾರೆ.
ಕೆಲದಿನಗಳ ಹಿಂದೆ ಸುದ್ದಗುಂಟೆಪಾಳ್ಯದಲ್ಲಿ ವಿಧ್ವಂಸಕ ಕೃತ್ಯ ವೆಸಗಲು ಸಿದ್ದನಿದ್ದ ಮೆಹಬೂಬ್ ಪಾಷಾ ಎಂಬ ಶಂಕಿತ ಉಗ್ರ ಆತನ ಮೇಲೆ ಪೊಲೀಸರು ದಾಳಿ ನಡೆಸಿ ಮೂರು ಪಿಸ್ತೂಲ್, 60 ಸಜೀವ ಗುಂಡು ಪತ್ತೆ ಮಾಡಿದ್ದಾರೆ. ಕಳೆದ ಗುರುವಾರ ಬಾಗಲೂರು ರೌಡಿಯೊಬ್ಬನ ಬಳಿ 1 ಪಿಸ್ತೂಲ್, 7 ಜೀವಂತ ಗುಂಡುಗಳೊಂದಿಗೆ ರೌಡಿ ಫಯಾಜುಲ್ಲಾ ಪೊಲೀಸರ ಬೀಟ್ ವೇಳೆ ರೆಡ್ ಹ್ಯಾಂಡ್ ಆಗಿ ಸಿಕ್ಕಿ ಬಿದ್ದಿದ್ದ. ಹಾಗಾಗಿ ಉದ್ಯಾನನಗರಿಯಲ್ಲಿ ಪಿಸ್ತೂಲ್ಗಳು ಎಲ್ಲಿಂದ ಸರಬರಾಜಾಗುತ್ತಿವೆ ಎಂಬುದರ ಕುರಿತು ಪೊಲೀಸರು ತನಿಖೆ ಕೈಗೊಂಡಿದ್ದರು.
ಬಿಹಾರ, ಉತ್ತರ ಪ್ರದೇಶದಿಂದ ಕಡಿಮೆ ಬೆಲೆಗೆ ಕಂಟ್ರಿಮೇಡ್ ಪಿಸ್ತೂಲ್ಗಳು ರವಾನೆಯಾಗುತ್ತಿವೆ. 25 ರಿಂದ 30 ಸಾವಿರಕ್ಕೆ ರೌಡಿಶೀಟರ್ಗಳಿಗೆ, ಪುಂಡರಿಗೆ ಮಾರಾಟ ಮಾಡುತ್ತಿದ್ದ ವಿಚಾರ ಬಯಲಾಗಿದೆ. ಸದ್ಯ ಪೊಲೀಸರು ಆರೋಪಿಗಳ ಜಾಡು ಹಿಡಿದು ತನಿಖೆ ಮುಂದುವರೆಸಿದ್ದಾರೆ.
ಹತ್ತಾರು ಪ್ರಕರಣಗಳು ದಾಖಲು: ನಗರ ಪೊಲೀಸರು ಈವರೆಗೆ ಆರ್ಮ್ಸ್ ಬಳಕೆ ಮತ್ತು ಅಕ್ರಮವಾಗಿ ಆಯುಧಗಳನ್ನ ಹೊಂದಿರುವ ಕುರಿತಂತೆ 22ಕ್ಕೂ ಹೆಚ್ಚು ಪ್ರಕರಣ ದಾಖಲಾಗಿವೆ.13 ಪಿಸ್ತೂಲ್, 1 ಎಸ್ಬಿಬಿಎಲ್, 2 ಏರ್ಗನ್ಗಳು,130 ರೌಂಡ್ ಜೀವಂತ ಗುಂಡು ಸಹ ಪತ್ತೆಯಾಗಿವೆ. ಈಗಾಗಲೇ 30ಕ್ಕೂ ಅಧಿಕ ಆರೋಪಿಗಳನ್ನ ಪೊಲೀಸರು ಬಂಧಿಸಿದ್ದಾರೆ.
