'ಯಾವುದೇ ಬಣ ಗಿಣ ಇಲ್ಲ': ದಸರಾ ಪ್ರವಾಸದಿಂದ ಹಿಂದೆ ಸರಿದ ಸಚಿವ ಸತೀಶ್ ಜಾರಕಿಹೊಳಿ ಹೇಳಿಕೆ

ಸಚಿವ ಸತೀಶ್ ಜಾರಕಿಹೊಳಿ ಅವರು ಮೈಸೂರು ದಸರಾ ಪ್ರವಾಸದಿಂದ ಹಿಂದೆ ಸರಿದಿದ್ದಾರೆ.

ಬೆಂಗಳೂರು: ''ಯಾವುದೇ ಬಣ ಗಿಣ ಇಲ್ಲ, ಸಮಾನ ಮನಸ್ಕ ಶಾಸಕರು ದಸರಾ ಆಚರಣೆಗಾಗಿ ಮೈಸೂರಿಗೆ ಹೋಗಬೇಕು ಅಂತ ಇತ್ತು. ಆಮೇಲೆ ಸಿಎಂ, ಅಧ್ಯಕ್ಷರ ಗಮನಕ್ಕೆ ತಂದು ಹೋಗುತ್ತೇವೆ'' ಎಂದು ಸಚಿವ ಸತೀಶ್ ಜಾರಕಿಹೊಳಿ ತಿಳಿಸಿದ್ದಾರೆ.

ಈ ಬಗ್ಗೆ ಬೆಂಗಳೂರಲ್ಲಿ ಪ್ರತಿಕ್ರಿಯಿಸಿದ ಸಚಿವ ಸತೀಶ್ ಜಾರಕಿಹೊಳಿ, ''ಮೈಸೂರಿಗೆ ಕೆಲವರು ಹೋಗಬೇಕು ಅಂತ ಮಾತನಾಡಿದ್ದೆವು. ದಸರಾ ನೋಡಲು ಬನ್ನಿ ಅಂತ ಅಲ್ಲಿನ ಶಾಸಕರೂ ಹೇಳ್ತಿದ್ದರು. ಕೆಲವು ನಮ್ಮ ಲೈಕ್ ಮೈಂಡೆಡ್ ಶಾಸಕರು ಹೋಗಬೇಕು ಎಂದು ಇತ್ತು. ನಮ್ಮನ್ನು ಎಲ್ಲಾದರೂ ಟ್ರಿಪ್ ಕರೆದುಕೊಂಡು ಹೋಗಿ ಅಂತ ಕೆಲವರು ಹೇಳ್ತಿದ್ರು. ಹಾಗೆ ಸಮಾನ ಮನಸ್ಕರು ಹೋಗಬೇಕು ಅಂತ ಇತ್ತು'' ಎಂದರು ಸಮಜಾಯಿಶಿ ನೀಡಿದರು.
''ಈಗ ದಸರಾ ಹಬ್ಬ ಇದ್ದು, ಸದ್ಯ ಹೋಗುವುದು ಬೇಡ ಅಂತ ಇದ್ದೇವೆ. ಮುಂದೆ ಹೋಗಬೇಕು ಅಂತಾದರೆ ಸಿಎಂ ಹಾಗೂ ಅಧ್ಯಕ್ಷರ ಗಮನಕ್ಕೆ ತಂದು ಹೋಗ್ತೇವೆ. ಪಕ್ಷದೊಳಗೆ ಯಾವುದೇ ಬಣ ಗಿಣ ಅಂತೇನಲ್ಲ'' ಎಂದು ಸ್ಪಷ್ಟಪಡಿಸಿದರು.

20 ಶಾಸಕರೊಂದಿಗೆ ಒಟ್ಟಾಗಿ ಮೈಸೂರಿಗೆ ತೆರಳುವ ಸಚಿವ ಸತೀಶ್ ಜಾರಕಿಹೊಳಿ ಮುಂದಾಗಿದ್ದರು ಎಂದು ಹೇಳಲಾಗಿತ್ತು. ಸತೀಶ್ ಜಾರಕಿಹೊಳಿ ನಡೆಗೆ ಎಐಸಿಸಿ ಬ್ರೇಕ್ ಹಾಕಿದೆ. ಬಸ್ ಮೂಲಕ 20 ಶಾಸಕರೊಂದಿಗೆ ಮೈಸೂರಿಗೆ ತೆರಳಿದರೆ ಬೇರೆ ಸಂದೇಶ ರವಾನೆಯಾಗುವ ಆತಂಕದಿಂದ ಎಐಸಿಸಿ ಶಾಸಕರ ಟ್ರಿಪ್​ಗೆ ತಡೆಯೊಡ್ಡಿದೆ. ಮೈಸೂರಿಗೆ ತೆರಳಲು ಬಸ್ ಅ​ನ್ನು ಸಿದ್ಧಪಡಿಸಲಾಗಿತ್ತು.‌ ಈಗಾಗಲೇ ಕೈ ಶಾಸಕರಲ್ಲಿ ಸರ್ಕಾರದ ವಿರುದ್ಧ ಅಸಮಾಧಾನ ಇದೆ ಎಂಬ ಕೂಗು ಕೇಳಿ ಬರುತ್ತಿದೆ. ಈ ವೇಳೆ, 20 ಶಾಸಕರು ಒಟ್ಟಾಗಿ ಹೋದರೆ, ಪ್ರತಿಪಕ್ಷಗಳಿಗೆ ಆಹಾರವಾಗುವ ಸಾಧ್ಯತೆ ಇದೆ‘‘ಎಂದು ಎಐಸಿಸಿ ಪ್ರವಾಸ ಕೈಬಿಡುವಂತೆ ಸೂಚಿಸಿದೆ ಎನ್ನಲಾಗಿದೆ.

ಕತ್ತಿ ತೂಗುತ್ತಲೇ ಇರುತ್ತೆ: ಬಾಕಿ ಬಿಲ್ ವಿಚಾರವಾಗಿ ಮಾತನಾಡಿದ ಅವರು, ''ಬಿಲ್ ಬಾಕಿ ಉಳಿಸಿಕೊಂಡಿರೋದು ನಾವಲ್ಲ ಹಿಂದಿನ ಸರ್ಕಾರದಿಂದ. ಹಿಂದಿನ ಸರ್ಕಾರದಲ್ಲಿ ಬಾಕಿ ಉಳಿದ ಕಾಮಗಾರಿಗಳ ಬಿಲ್ ಒಂದೊಂದಾಗಿ ಕ್ಲಿಯರ್ ಮಾಡ್ತಿದ್ದೇವೆ. ಗ್ರ್ಯಾಂಟ್​ಗೆ ಕಾಮಗಾರಿಗೆ ಮ್ಯಾಚ್ ಆಗಿದ್ರೆ ಬಿಲ್ ಕೊಟ್ಟೆ ಕೊಡ್ತೇವೆ'' ಎಂದರು.

''ಹಾಗಿದ್ರೆ, ಒಂದೇ ವರ್ಷ, ಒಂದೇ ತಿಂಗಳಲ್ಲಿ ಬಿಲ್ ಬಿಡುಗಡೆ ಆಗುತ್ತದೆ. ಬೇರೆ ಇಲಾಖೆ ಬಗ್ಗೆ ನನಗೆ ಗೊತ್ತಿಲ್ಲ. ಸೀನಿಯಾರಿಟಿ ನೋಡಿಯೇ ನಮ್ಮ ಇಲಾಖೆ ಬಿಲ್ ಕೊಡ್ತಾ ಇದ್ದೇವೆ. ಕಾಮಗಾರಿಗಳಿಗೆ ಕಮಿಷನ್ ಕೊಡಬೇಕು ಎನ್ನುವ ಆರೋಪವನ್ನು ಡೇ ಒನ್ ನಿಂದ ಸ್ಟಾರ್ಟ್ ಮಾಡಿದ್ದಾರೆ. ಹೊಸ ಆರೋಪವೇನೂ ಅಲ್ಲ ಅದು. ಕತ್ತಿ ತೂಗ್ತಾನೇ ಇರುತ್ತದೆ. ನಾವು ಅದನ್ನು ತಪ್ಪಿಸಿಕೊಂಡು ಓಡಾಡಬೇಕಷ್ಟೇ'' ಎಂದರು.

''ಯಾವುದನ್ನೂ ಸಾಬೀತು ಮಾಡುವುದು ಕಷ್ಟ. ಕೆಲಸ ನಿರಂತರವಾಗಿ ನಡೆಯುತ್ತಿದೆ. ನಮ್ಮ ಸರ್ಕಾರದ ಕಾಮಗಾರಿಗಳನ್ನು ಜನವರಿಯಿಂದ ಸ್ಟಾರ್ಟ್ ಮಾಡ್ತೇವೆ.‌ ಯಾವ ಕೆಲಸವೂ ನಿಂತಿಲ್ಲ. ಕಮಿಷನ್ ಆರೋಪವನ್ನು ಅವರದೇ ಸರ್ಕಾರ ಇದ್ದಾಗ ಡಿಫೆಂಡ್ ಮಾಡಿಕೊಳ್ಳಲು ಅವರ ಕೈಲಿ ಆಗಿಲ್ಲ'' ಎಂದು ವಾಗ್ದಾಳಿ ನಡೆಸಿದರು.

ಇದನ್ನೂ ಓದಿ: ಗುತ್ತಿಗೆದಾರರ ನಿವಾಸದಲ್ಲಿ ಕೋಟಿ ಕೋಟಿ ಹಣ ಪತ್ತೆ ಕೇಸ್ ಇಡಿಗೆ ವಹಿಸಿ: ಯಡಿಯೂರಪ್ಪ ಆಗ್ರಹ