ಬೆಂಗಳೂರು: ಯಶವಂತಪುರದ ಆರ್ಟಿಓ ಅಧಿಕಾರಿಗಳು ನಕಲಿ ನೋಂದಣಿ ಸಂಖ್ಯೆ ಅಳವಡಿಸಿಕೊಂಡು ಅಕ್ರಮವಾಗಿ ಓಡಾಡುತ್ತಿದ್ದ, ಐಷಾರಾಮಿ ಮರ್ಸಿಡಿಸ್-ಬೆಂಜ್ ಕಾರನ್ನ ಜಪ್ತಿ ಮಾಡಿದ್ದಾರೆ.
ಆದ್ರೆ 77 ಲಕ್ಷ ರೂ.ನ ಈ ಕಾರು ಕೇವಲ 15 ಲಕ್ಷದ 75 ಸಾವಿರ ರೂ.ಗೆ ಹರಾಜಾಗಿದ್ದು, ಬಿಲ್ಡರ್ ಅರ್ಜುನ್ ಎನ್ನುವವರು ಇದನ್ನು ಬಿಡ್ ಮೂಲಕ ಖರೀದಿ ಮಾಡಿದ್ದಾರೆ.
ಮರ್ಸಿಡಿಸ್-ಬೆನ್ಜ್ ಕಾರು ನಕಲಿ ನಂಬರ್ ಫ್ಲೇಟ್ ಅಳವಡಿಸಿಕೊಂಡು 7 ವರ್ಷಗಳಿಂದ ನಗರದಲ್ಲಿ ಓಡಾಟ ನಡೆಸುತ್ತಿತ್ತು. ಈ ಬಗ್ಗೆ ಯಶವಂತಪುರ ಆರ್ಟಿಓ ಕಚೇರಿ ಪೊಲೀಸರಿಗೆ ಮಾಹಿತಿ ಲಭ್ಯವಾಗಿತ್ತು. ಹೀಗಾಗಿ ಯಶವಂತಪುರದ ಆರ್ಟಿಓ ಇನ್ಸ್ಪೆಕ್ಟರ್ ರಾಜಣ್ಣ ನೇತೃತ್ವದ ತಂಡ ಕಾರ್ಯಾಚರಣೆ ನಡೆಸಿ ಜಪ್ತಿ ಮಾಡಿದ್ದಾರೆ.
ಮಂಡ್ಯ ಮೂಲದ ರಾಜುಗೌಡ ಎಂಬಾತ ತನ್ನ ಬೆಂಜ್ ಕಾರಿಗೆ ನಕಲಿ ನಂಬರ್ ಅಳವಡಿಸಿ, ಆರ್ಟಿಒ ತೆರಿಗೆ ಪಾವತಿಸದೇ ಮೋಸ ಕೂಡ ಮಾಡುತ್ತಿದ್ದರು. ಮಂಡ್ಯ ನಗರದ ಬಿ.ಕೆ. ರೇಖಾ ಎಂಬುವವರ ಹೆಸರಿನಲ್ಲಿ ಕಾರು ರಿಜಿಸ್ಟ್ರಾರ್ ಆಗಿದ್ದು, ಇವರು ಉಪಯೋಗಿಸುತ್ತಿದ್ದರು. ಹೀಗಾಗಿ ರಾಜುಗೌಡ ಮೇಲೆ ಆರ್ಟಿಒ ಪೊಲೀಸರು ಪ್ರಕರಣ ದಾಖಲಿಸಿ, ದಾಖಲೆ ನೀಡುವಂತೆ ಸೂಚನೆ ನೀಡಿದ್ರು. ಆದರೆ ತಿಂಗಳುಗಳು ಕಳೆದರೂ ಸರಿಯಾದ ದಾಖಲೆಗಳನ್ನ ನೀಡದೇ ಇರುವ ಕಾರಣ. ಕೇವಲ 15 ಲಕ್ಷಕ್ಕೆ ಬೆಂಜ್ ಕಾರು ಹರಾಜು ಮಾಡಲಾಗಿದೆ.
