ಬೆಂಗಳೂರು: ರಾಜ್ಯದಲ್ಲಿ ನಾಲ್ಕನೇ ದಿನದ ಲಾಕ್ಡೌನ್ ಪ್ರಾರಂಭವಾಗಿದ್ದು, ರಾಜಧಾನಿಯ ಬಹುತೇಕ ರಸ್ತೆಗಳು ಖಾಲಿಯಿರುವುದು ಕಂಡು ಬರುತ್ತಿದೆ.
ಸಾರ್ವಜನಿಕರು ಇನ್ನೂ 11 ದಿನ ಮನೆಯಲ್ಲಿಯೇ ಇರಬೇಕಿದ್ದು, ಖರೀದಿಗೆ ಬೆಳಗ್ಗೆ 10 ಗಂಟೆವರೆಗೆ ಮಾತ್ರ ಕಟ್ಟುನಿಟ್ಟಿನ ಅವಕಾಶ ನೀಡಲಾಗಿದೆ. ಸುಖಾಸುಮ್ಮನೆ ಹೊರ ಬಂದರೆ ಕೇಸ್ ಬೀಳುತ್ತದೆ ಎಂದು ಪೊಲೀಸರು ಎಚ್ಚರಿಕೆ ನೀಡಿದ್ದು, ನಗರದಲ್ಲಿ ಖಾಕಿ ಸರ್ಪಗಾವಲು ಹಾಕಲಾಗಿದೆ.
ಕೊನೆಯ ಕ್ಷಣದಲ್ಲಿ ಖರೀದಿಗೆ ಜನರ ತಾರಾತುರಿ:
10 ಗಂಟೆಯಾದರೂ ಕೆಲ ಬೀದಿಬದಿ ವ್ಯಾಪಾರಸ್ಥರು ಮಾರಾಟ ಮಾಡುತ್ತಿದ್ದು, ಕೊನೆಯ ಕ್ಷಣದಲ್ಲಿ ಖರೀದಿಗೆ ಜನರ ತಾರಾತುರಿ ನೆಡೆದಿದೆ. ಅಗತ್ಯ ವಸ್ತುಗಳನ್ನ ಕೊಳ್ಳುವುದಕ್ಕೆ ರಾಜಧಾನಿಯ ಜನರು ಕೆಲವು ಕಡೆ 10 ಗಂಟೆ ನಂತರವೂ ಕೆಲ ದಿನಸಿ ಅಂಗಡಿ, ಹಣ್ಣಿನ ಅಂಗಡಿಗಳಲ್ಲಿ ಕೊಳ್ಳಲು ಮುಗಿಬಿದ್ದಿರುವುದು ಕಂಡು ಬರುತ್ತಿದೆ.
ಮಲೇಶ್ವರಂನಲ್ಲಿ ಖರೀದಿ ಭರಾಟೆ, ದಿನಸಿ ಅಂಗಡಿಗಳ ಮುಂದೆ ಕ್ಯೂ:
ಪ್ರಮುಖ ವ್ಯಾಪಾರಿ ಕೇಂದ್ರ ಮಲೇಶ್ವರಂನಲ್ಲಿ ಖರೀದಿ ಭರಾಟೆ ಜೋರಾಗಿದ್ದು, ಕೆಲ ದಿನಸಿ ಅಂಗಡಿಗಳ ಮುಂದೆ ದಿನಸಿ ಸಾಮಾನುಗಳನ್ನ ಕೊಳ್ಳಲು ಜನರು ಸಾಮಾಜಿಕ ಅಂತರ, ಮಾಸ್ಕ್ ಹಾಕಿಕೊಂಡು ಸರತಿ ಸಾಲಿನಲ್ಲಿ ನಿಂತಿದ್ದರು.
ನಾಲ್ಕನೇ ದಿನ ರಾಜಧಾನಿಯಲ್ಲಿ ಜನಸಂಖ್ಯೆ ಕಡಿಮೆಯಿದೆ ಎಂದು ಈಗಾಗಲೇ ವರದಿಯಾಗಿದ್ದು, ಸಾಕಷ್ಟು ಜನ ನಗರ ಬಿಟ್ಟು ತಮ್ಮ ತಮ್ಮ ಊರುಗಳಿಗೆ ಸೇರಿಕೊಂಡಿದ್ದಾರೆ. ನಗರದ ಹಲವು ಕಡೆ ವ್ಯಾಪಾರ ಇಲ್ಲದಿರುವುದು ಜನಜಂಗುಳಿ ಕಡಿಮೆಯಾಗಿರುವುದು ಕೂಡ ವರದಿಯಾಗಿದೆ. ಆದರೆ ಪ್ರಮುಖ ವ್ಯಾಪಾರಿ ಕೇಂದ್ರ ಮಲೇಶ್ವರಂನಲ್ಲಿ ಮಾತ್ರ ಸ್ವಲ್ಪ ಜನಸಂದಣಿ ಕಂಡು ಬಂದಿದೆ.
ಓದಿ: ಲಾಕ್ಡೌನ್ ವೇಳೆ ಮನ್ರೇಗಾ ಯೋಜನೆಯಡಿ ಕೆಲಸ ಮಾಡಲು ರಾಜ್ಯ ಸರ್ಕಾರ ಅನುಮತಿ
