ಆನೇಕಲ್/ಬೆಂಗಳೂರು: ಪೊಲೀಸರು ರೌಡಿ ಶೀಟರ್ ಜೆಸಿಬಿ ನಾರಾಯಣ್ನನ್ನು ಸೇರಿ ಐವರನ್ನು ದರೋಡೆ ಪ್ರಕರಣದಲ್ಲಿ ಬಂಧಿಸಿದ್ದಾರೆ.ರಾಜಕಾರಣಿಗಳ ಒತ್ತಡಕ್ಕೆ ಮಣಿದು ಜೆಸಿಬಿ ನಾರಾಯಣ್ ಬಂಧನ ಮಾಡಲಾಗಿದೆ ಎಂದು ಹೇಳಲಾಗುತ್ತಿದೆ.
ರಾಜಕಾರಣಿಗಳ ಒತ್ತಡಕ್ಕೆ ಮಣಿದು ರೌಡಿಶೀಟರ್ ಜೆಸಿಬಿ ನಾರಾಯಣ್ ಅನ್ನು ಬಂಧಿಸಿದ್ದಾರೆ ಎಂದು ಬಹುಜನ ದಲಿತ ಸಂಘರ್ಷ ಸಮಿತಿ ಸಂಸ್ಥಾಪಕ ಆರ್ಎಂಎನ್ ರಮೇಶ ಆರೋಪಿಸಿದ್ದಾರೆ.
ಜು.27ರ ಸಂಜೆ ಹುಲ್ಲಹಳ್ಳಿ-ಬಿಂಗೀಪುರ ರಸ್ತೆಯ ಕ್ರೈಸ್ಟ್ ಅಕಾಡೆಮಿ ಶಾಲೆ ಮುಂಭಾಗ ಪತ್ರಿಕಾ ಮಾಧ್ಯಮದವರೊಂದಿಗೆ ಮಾತನಾಡುತ್ತಿದ್ದ ವೇಳೆ ಎಲೆಕ್ಟ್ರಾನಿಕ್ ಸಿಟಿ ಪೊಲೀಸರು ಜೆಸಿಬಿ ನಾರಾಯಣ್ನನ್ನು ಕರೆದುಕೊಂಡು ಹೋಗಿದ್ದಾರೆ. ಆ ದಿನವೇ ನಾರಾಯಣ್ ಕೆಲವು ಮಾಧ‍್ಯಮದವರಿಗೆ ಮೊಬೈಲ್ ಮೂಲಕ ಸಂಪರ್ಕಿಸಿ, ಸುಳ್ಳು ಪ್ರಕರಣಗಳಲ್ಲಿ ನನ್ನನ್ನು ಸಿಕ್ಕಿ ಹಾಕಿಸುವ ಪ್ರಯತ್ನ ನಡೆಸಿದ್ದಾರೆ ಎಂದು ಆರೋಪಿಸಿದ್ದರು.
ಈ ವಿಷಯ ಕುರಿತಂತೆ ಎಸಿಪಿ ಅವರನ್ನು ಮಾಹಿತಿ ಕೇಳಿದಾಗ ಪರಪ್ಪನ ಅಗ್ರಹಾರ ಠಾಣೆಯಲ್ಲಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಾರೆಂಟ್ ಬಾಕಿಯಿದ್ದು, ವಿಚಾರಣೆಗೆ ಡಿಸಿಪಿ ಕರೆಸಿದ್ದಾರೆ ಎಂದು ಮಾಹಿತಿ ನೀಡಿದ್ದರು. ಜು.27ರ ರಾತ್ರಿ ಠಾಣೆಯಲ್ಲಿದ್ದ ಜೆಸಿಬಿ ನಾರಾಯಣ್ನನ್ನು ದರೋಡೆಗೆ ಸಂಚು ರೂಪಿಸಿದ್ದಾನೆ ಎಂದು ಪ್ರಕರಣ ದಾಖಲಿಸಿ ಜು.28ರಂದು ರಾತ್ರಿ 8 ಗಂಟೆಗೆ ಜೈಲಿಗೆ ಕಳುಹಿಸಿರುವುದು ಪೊಲೀಸರ ಕ್ರಮದ ಬಗ್ಗೆ ಅನುಮಾನ ಮೂಡಿದೆ ಎಂದು ರಮೇಶ ಆರೋಪಿಸಿದರು.
5 ವರ್ಷಗಳಿಂದ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿಲ್ಲ ಎಂದು ಪೊಲೀಸ್ ಮೂಲಗಳೇ ತಿಳಿಸಿವೆ. ಕೂಡಲೇ ಪೊಲೀಸ್ರು ಬಿಡುಗಡೆಗೊಳಿಸಬೇಕು ಎಂದು ಒತ್ತಾಯಿಸಿದರು.
