'ಮಾದಕ ಜಾಲ' ಭೇದಿಸಲು ಸಿಸಿಬಿಗೆ ಐಎಸ್​ಡಿ ಸಾಥ್​: ಕಿರುತೆರೆ ನಟ-ನಟಿಯರ ವಿಚಾರಣೆ

ಡ್ರಗ್​ ಜಾಲ ನಂಟಿನ ಆರೋಪದಲ್ಲಿ ಸಿಸಿಬಿ ಅಧಿಕಾರಿಗಳು ಒಬ್ಬೊಬ್ಬರೇ ಸ್ಯಾಂಡಲ್​ವುಡ್​ ನಟ-ನಟಿಯರನ್ನು ವಿಚಾರಣೆ ನಡೆಸುತ್ತಿದ್ದರೆ, ಇತ್ತ ಐಎಸ್​ಡಿ ಕಿರುತೆರೆ ನಟ-ನಟಿಯರ ವಿಚಾರಣೆ ನಡೆಸುತ್ತಿದೆ.

ಬೆಂಗಳೂರು: ಸಿಸಿಬಿ ಜೊತೆ ಆಂತರಿಕ ಭದ್ರತಾ ವಿಭಾಗ( ಐಎಸ್​ಡಿ) ಕೂಡ ಡ್ರಗ್ಸ್​​ ದಂಧೆ ಪ್ರಕರಣದ ತನಿಖೆಗಿಳಿದಿದ್ದು, ಕಿರುತೆರೆ ನಟ-ನಟಿಯರನ್ನು ವಿಚಾರಣೆ ಮಾಡುತ್ತಿದೆ.

ಡ್ರಗ್ಸ್​ ದಂಧೆ ಪ್ರಕರಣದಲ್ಲಿ ಮೊದಲ ಆರೋಪಿ ಪೆಡ್ಲರ್​ ಅನಿಕಾಳನ್ನು ಬಂಧಿಸಿದ ಸಿಸಿಬಿ, ಸ್ಯಾಂಡಲ್​ವುಡ್​ ನಟ-ನಟಿಯರಿಗೆ ಮಾದಕ ಜಾಲದ ನಂಟಿದೆ ಎಂದು ಸುಳಿವು ಕೊಟ್ಟಾಗಲೇ, ಇತ್ತ ಐಎಸ್​ಡಿಯು ಕಿರುತೆರೆ ನಟ-ನಟಿಯರ ಮಾದಕ ನಂಟಿನ ಕುರಿತು ಮಾಹಿತಿ ಕಲೆ ಹಾಕಲು ಪ್ರಾರಂಭಿಸಿತ್ತು.

ಎಫ್​ಐಆರ್​ ಪ್ರತಿ

ಶಾಂತಿ ನಗರದ ಐಎಸ್​ಡಿ ಪೊಲೀಸ್ ಠಾಣೆಯಲ್ಲಿ ಸೆ. 12 ರಂದು ಕೇರಳ ಮೂಲದ ಇಬ್ಬರು ಡ್ರಗ್ಸ್​​ ಪೆಡ್ಲರ್​ಗಳನ್ನು ಬಂಧಿಸಿ, ಎಫ್​ಐಆರ್ ದಾಖಲಿಸಲಾಗಿತ್ತು. ಕೇರಳ ಮೂಲದ ಪೆಡ್ಲರ್​​ಗಳಾದ ಡ್ಯಾನಿಯಲ್ ಮತ್ತು ಗೋಕುಲ್ ಕೃಷ್ಣ ಎಂಬ ಇಬ್ಬರನ್ನು ಬಂಧಿಸಿ ವಿಚಾರಣೆ ನಡೆಸಿದಾಗ, ಸೀರಿಯಲ್ ನಟ-ನಟಿಯರಿಗೆ ಡ್ರಗ್ಸ್​​ ಪೂರೈಸುತ್ತಿದ್ದ ವಿಚಾರ ಬಾಯಿ ಬಿಟ್ಟಿದ್ದರು. ಹೀಗಾಗಿ ಬಂಧಿತ ಆರೋಪಿಗಳ ಜೊತೆ ನಂಟಿರುವ ಕಿರುತೆರೆ ನಟ-ನಟಿಯರನ್ನು ಐಎಸ್​ಡಿ ವಿಚಾರಣೆ ನಡೆಸಿದೆ.

ಇಬ್ಬರು ಪೆಡ್ಲರ್​ಗಳಿಗೆ ಬೆಂಗಳೂರು ನಂಟಿರುವುದು ಬಹುತೇಕ ಖಚಿತವಾಗಿದೆ. ಇವರು ಯಾರಿಗೆಲ್ಲ ಮಾದಕ ವಸ್ತುಗಳನ್ನು ಪೂರೈಸುತ್ತಿದ್ದರು. ಯಾರು ಖರೀದಿ ಮಾಡುತ್ತಿದ್ದರು ಎಂಬ ಮಾಹಿತಿಯನ್ನು ಐಎಸ್​ಡಿ ಕಲೆ ಹಾಕ್ತಿದೆ.