ಪಾಲಿಕೆ ಅಧಿಕಾರಿಗಳಿಂದ ನಗರದ ವಿದ್ಯುತ್ ಚಿತಾಗಾರಗಳ ತಪಾಸಣೆ

ನಗರ ಪಾಲಿಕೆ ಆಡಳಿತಾಧಿಕಾರಿಗಳು ಬಿಬಿಎಂಪಿ ವ್ಯಾಪ್ತಿಯ ಸುಮ್ಮನಹಳ್ಳಿ ಹಾಗೂ ಕೆಂಗೇರಿಯಲ್ಲಿರುವ ವಿದ್ಯುತ್ ಚಿತಾಗಾರಗಳಿಗೆ ಭೇಟಿ ನೀಡಿ ಅಲ್ಲಿನ ವಿವಿಧ ಸೌಲಭ್ಯಗಳ ಕುರಿತು ತಪಾಸಣೆ ನಡೆಸಿದರು. ಅಗತ್ಯ ಸೇವೆಗಳ ಪೂರೈಕೆಗೆ ವ್ಯವಸ್ಥೆ ಮಾಡುವುದಾಗಿ ತಿಳಿಸಿದರು.

ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಬರುವ ಸುಮ್ಮನಹಳ್ಳಿ ಹಾಗೂ ಕೆಂಗೇರಿಯಲ್ಲಿರುವ ವಿದ್ಯುತ್ ಚಿತಾಗಾರಗಳ ಕಾರ್ಯನಿರ್ವಹಣೆ ಕುರಿತು ಪಾಲಿಕೆ ಆಡಳಿತಾಧಿಕಾರಿ ತಪಾಸಣೆ ನಡೆಸಿದರು.

ಬಿಬಿಎಂಪಿ ವ್ಯಾಪ್ತಿಯ ಸುಮ್ಮನಹಳ್ಳಿಯಲ್ಲಿರುವ ವಿದ್ಯುತ್ ಚಿತಾಗಾರಕ್ಕೆ ಭೇಟಿ ನೀಡಿ ತಪಾಸಣೆ ನಡೆಸಿದ ಅವರು, 3 ಎಕರೆ ಪ್ರದೇಶದಲ್ಲಿ ಶವಗಳ ದಹನ ಕಾರ್ಯಕ್ಕೆ 2 ಫರ್ನೆಸ್(ಯಂತ್ರ) ಗಳಿದ್ದು, ಈ ಪ್ರದೇಶದಲ್ಲಿ ಇನ್ನೂ ಸ್ಥಳಾವಕಾಶ ಇರುವುದಿಂದ ಇನ್ನೊಂದು ಫರ್ನೆಸ್‌ಅನ್ನು ನಿರ್ಮಾಣ ಮಾಡಲು ಸೂಚನೆ ನೀಡಿದರು. ಜೊತೆಗೆ ಇಲ್ಲಿ ಬರುವ ಸ್ಥಳೀಯರಿಗೆ ಎಲ್ಲಾ ರೀತಿಯ ಸೌಲಭ್ಯಗಳನ್ನು ಕಲ್ಪಿಸಲು ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ವಿದ್ಯುತ್ ಚಿತಾಗಾರದ ಕಾರ್ಯನಿರ್ವಹಣೆ, ಪ್ರತಿನಿತ್ಯ ಎಷ್ಟು ಶವಗಳನ್ನು ದಹನ ಮಾಡಲಾಗುತ್ತಿದೆ ಹಾಗೂ ಏನೇನು ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ ಎಂದು ಅಧಿಕಾರಿಯನ್ನು ಕೇಳಿದರು. ಅದಕ್ಕೆ ಪ್ರತಿಕ್ರಿಯಿಸಿದ ಮುಖ್ಯ ಅಭಿಯಂತರರು, ಸುಮ್ಮನಹಳ್ಳಿ ವಿದ್ಯುತ್ ಚಿತಾಗಾರಕ್ಕೆ ಸಾಮಾನ್ಯ ಹಾಗೂ ಕೋವಿಡ್ ಸೇರಿ ಪ್ರತಿನಿತ್ಯ 20 ರಿಂದ 25 ಶವಗಳು ಬರುತ್ತಿತ್ತು. ಇತ್ತೀಚಿಗೆ 10 ರಿಂದ 12 ಶವಗಳು ಬರುತ್ತಿವೆ. ಶವಗಳನ್ನು ದಹನ ಮಾಡಲು 2 ಫರ್ನೆಸ್ ಗಳಿದ್ದು, ಒಂದು ಶವ ದಹನ ಮಾಡಲು 2 ಗಂಟೆ ಸಮಯಾವಕಾಶ ಬೇಕಿದೆ. ಶವಗಳನ್ನು ತಂದವರಿಗೆ ಶವಗಳನ್ನಿರಿಸಿ ಪೂಜೆ/ವಿಧಿ-ವಿಧಾನ ಮಾಡಲು ಸ್ಥಳಾವಕಾಶವಿದೆ. ಕೈ-ಕಾಲು ತೊಳೆಯಲು ನೀರಿನ ವ್ಯವಸ್ಥೆ ಮಾಡಲಾಗಿದೆ. ಕೋವಿಡ್ ಬಂದ ಬಳಿಕ ಹೆಚ್ಚು ಶವಗಳನ್ನು ಸುಡಲಾಗುತ್ತಿದ್ದು, ಸೆಪ್ಟೆಂಬರ್ ತಿಂಗಳಲ್ಲಿ 506, ಅಕ್ಟೋಬರ್ ನಲ್ಲಿ 380, ನವೆಂಬರ್ 9 ರವರೆಗೆ 85 ಶವಗಳನ್ನು ದಹನ ಮಾಡಲಾಗಿದೆ. ಅಲ್ಲದೆ ವಿದ್ಯುತ್ ಚಿತಾಗಾರದಲ್ಲಿ 1 ಕೋಟಿ ರೂಪಾಯಿ ವೆಚ್ಚದಲ್ಲಿ ಆರ್​ಸಿಸಿ ಡ್ರೆನ್, ಕೂರಲು ಕುರ್ಚಿ ವ್ಯವಸ್ಥೆ, ಚಿತಾಗಾರದ ಗ್ರಿಲ್, ಬೋರ್ ವೆಲ್, ಸ್ನಾನದ ಕೊಠಡಿ, ಶೌಚಾಲಯ ಹಾಗೂ ಇನ್ನಿತರೆ ಸೌಲಭ್ಯಗಳನ್ನು ಪುನರ್‌ ನವೀಕರಣಗೊಳಿಸಲಾಗುತ್ತಿದೆ ಎಂದು ತಿಳಿಸಿದರು.

ಪ್ರಾಣಿ ಚಿತಾಗಾರ ತಪಾಸಣೆ:

ಇದೇ ವೇಳೆ ವಿದ್ಯುತ್ ಚಿತಾಗಾರದ ಪಕ್ಕದಲ್ಲಿರುವ ಪ್ರಾಣಿ ಚಿತಾಗಾರವನ್ನು ತಪಾಸಣೆ ಮಾಡಿದರು. ಪ್ರಾಣಿ ಚಿತಾಗಾರದಲ್ಲಿ ಕುರಿ, ಮೇಕೆ, ನಾಯಿ, ಕುದುರೆ, ಹಸು, ಎಮ್ಮೆ ಸೇರಿದಂತೆ ಇನ್ನಿತರೆ ಪ್ರಾಣಿಗಳನ್ನು ದಹನ ಮಾಡುವ ವ್ಯವಸ್ಥೆ ಇದೆ. ಸದರಿ ಸ್ಥಳದಲ್ಲಿಯೇ ಹೊಸದಾಗಿ ಟ್ರಾನ್ಸ್ ಫರ್ ಸ್ಟೇಷನ್ ಸ್ಥಾಪಿಸಿದ್ದು, ಪರಿಶೀಲನೆ ನಂತರ ತ್ವರಿತವಾಗಿ ಟ್ರಾನ್ಸ್ ಫರ್ ಸ್ಟೇಷನ್ ಪ್ರಾರಂಭಿಸಲು ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ಕೆಂಗೇರಿ ವಿದ್ಯುತ್ ಚಿತಾಗಾರ ತಪಾಸಣೆ:

ಕೊನೆಯದಾಗಿ ಅಧಿಕಾರಿಗಳು ಕೆಂಗೇರಿ ವಿದ್ಯುತ್ ಚಿತಾಗಾರಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಎರಡು ಎಕರೆ ಪ್ರದೇಶದಲ್ಲಿ ಕೆಂಗೇರಿ ವಿದ್ಯುತ್ ಚಿತಾಗಾರವಿದ್ದು, ನಿರೀಕ್ಷಣಾ ಕೊಠಡಿ, ಶೌಚಾಲಯ ಸೇರಿದಂತೆ ಎಲ್ಲಾ ರೀತಿಯ ವ್ಯವಸ್ಥೆ ಇದೆ. ಆದರೆ ಹೆಚ್ಚು ಶವಗಳನ್ನು ದಹನ ಮಾಡುವ ವೇಳೆ ಹೊಗೆ ಬರುತ್ತಿದೆ ಎಂದು ಸ್ಥಳೀಯರು ದೂರುತ್ತಿದ್ದಾರೆ ಎಂದು ಅಧಿಕಾರಿ ತಿಳಿಸಿದರು. ಅದಕ್ಕೆ ಆಡಳಿತಾಧಿಕಾರಿ ಪ್ರತಿಕ್ರಿಯಿಸಿ, ಕೂಡಲೆ ಸಮಸ್ಯೆ ಬಗೆಹರಿಸುವಂತೆ ಸೂಚಿಸಿದರು.

ಇದೇ ವೇಳೆ ಕೋವಿಡ್ ಪರೀಕ್ಷೆ ಮಾಡುವ ತಂಡದ ಜೊತೆ ಮಾತನಾಡಿದ ಆಡಳಿತಾಧಿಕಾರಿ, ಪ್ರತಿನಿತ್ಯ ಎಷ್ಟು ಪರೀಕ್ಷೆಗಳನ್ನು ಮಾಡಲಾಗುತ್ತಿದೆ ಎಂದು ಕೇಳಿದರು. ಅದಕ್ಕೆ ಸಿಬ್ಬಂದಿಯೊಬ್ಬರು ಪ್ರತಿಕ್ರಿಯಿಸಿ, ದಿನಕ್ಕೆ 20 ರಿಂದ 30 ಆರ್​ಟಿಪಿಸಿಆರ್ ಪರೀಕ್ಷೆ ಮಾಡಲಾಗುತ್ತಿದೆ ಎಂದರು.

ಈ ವೇಳೆ ಮುಖ್ಯ ಅಭಿಯಂತರರಾದ ವಿಜಯ್ ಕುಮಾರ್ ಹಾಗೂ ಇನ್ನಿತರ ಅಧಿಕಾರಿಗಳು ಉಪಸ್ಥಿತರಿದ್ದರು.