ಬೆಂಗಳೂರು: ಪಿಡಿ ಖಾತೆಗಳಲ್ಲಿ ಖರ್ಚಾಗದೆ ಸಾವಿರಾರು ಕೋಟಿ ರೂ. ಹಣ ಹಾಗೇ ಉಳಿದುಕೊಂಡಿದ್ದು, ಈ ಬಗ್ಗೆ ಸರ್ಕಾರ ಶ್ವೇತ ಪತ್ರ ಹೊರಡಿಸುವಂತೆ ಎಚ್.ಕೆ.ಪಾಟೀಲ್ ಆಗ್ರಹಿಸಿದ್ದಾರೆ.
ವಿಧಾನಸಭೆ ಬಜೆಟ್ ಮೇಲಿನ ಚರ್ಚೆ ವೇಳೆ ಮಾತನಾಡಿದ ಅವರು, ಪಿಡಿ ಖಾತೆಯಲ್ಲಿ 4,421 ಕೋಟಿ ರೂ ನಲ್ಲಿದೆ. ಆ ಖಾತೆಗಳನ್ನು ಪ್ರತಿ ಮಾರ್ಚ್ 31ಕ್ಕೆ ಕ್ಲೋಸ್ ಮಾಡಬೇಕು. ಆದರೆ ಅದರಲ್ಲಿದ್ದ ಹಣವನ್ನು ಸಂಚಿತ ನಿಧಿಗೆ ವರ್ಗಾವಣೆ ಮಾಡಿಲ್ಲ. ಇನ್ನೂ ಪಿಡಿ ಖಾತೆಯಲ್ಲಿ 2,741 ಕೋಟಿ ರೂ. ಹಣ ವೆಚ್ಚವಾಗದೇ ಮೂರು ವರ್ಷಗಳಿಂದ ಹಾಗೇ ಉಳಿದುಕೊಂಡಿದೆ. ಇನ್ನು 10,000 ಸಾವಿರ ಕೋಟಿ ರೂ ಬೇರೆ ಬೇರೆ ಇಲಾಖೆಗಳು, ನಿಗಮಗಳ ಇತರೆ ಖಾತೆಗಳಲ್ಲಿ ಇವೆ. ಹೀಗೆ ಸುಮಾರು 17,000 ಕೋಟಿ ರೂ. ಮೊತ್ತದಷ್ಟು ಅವ್ಯವಹಾರ ಆಗುವ ಸಾಧ್ಯತೆ ಇದೆ ಎಂದು ಸಿಎಜಿ ವರದಿಯಲ್ಲಿ ತಿಳಿಸಲಾಗಿದೆ.
ಬಜೆಟ್ನಲ್ಲಿ ಸರ್ವರಿಗೂ ಸಮಪಾಲು ಸಮಬಾಲು ಹೇಳಿ ಅದರಂತೆ ನಡೆದಿಲ್ಲ, ಎಲ್ಲೋ ಎಡವುತ್ತಿದ್ದೀರಿ. ವ್ಯವಸ್ಥೆಯಲ್ಲಿ ಸಾಮಾಜಿಕ ನ್ಯಾಯ ನೀಡುವಲ್ಲಿ ನಾವೆಲ್ಲರೂ ಕೊಡಲಿ ಪೆಟ್ಟು ಹಾಕಿದ್ದೇವೆ. ಕರ್ನಾಟಕದವರು ಸಾಮಾಜಿಕ ನ್ಯಾಯದ ಹರಿಕಾರರು.ದೇವರಾಜು ಅರಸು ಸಾ ಮಾಜಿಕ ನ್ಯಾಯದ ವಿಚಾರದಲ್ಲಿ ಹಾವನೂರು ವರದಿ ಮೂಲಕ ರಕ್ತ ರಹಿತ ಕ್ರಾಂತಿ ತಂದರು. ಸಾಮಾಜಿಕ ನ್ಯಾಯದ ಕುತ್ತಿಗೆ ಹಿಸುಕುವ ಕೆಲಸ ಆಗುತ್ತಿದೆ. ಮೀಸಲಾತಿ ಲಾಭ ಪಡೆಯುವವರಿಗೆ ಲಾಭ ಸಿಗದ ಹಾಗೆ ಷಡ್ಯಂತ್ರ ಮಾಡಲಾಗುತ್ತಿದೆ ಎಂದು ಕಿಡಿ ಕಾರಿದರು.
