ಬೆಂಗಳೂರು: ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಅಕ್ರಮವಾಗಿ ಒಂಭತ್ತು ಕಾರ್ನರ್ ಸೈಟ್ನ್ನು ಹಂಚಿಕೆ ಮಾಡಿದೆ. ಇದರಿಂದ ಸರ್ಕಾರದ ಬೊಕ್ಕಸಕ್ಕೆ ಕೋಟ್ಯಾಂತರ ರೂಪಾಯಿ ನಷ್ಟ ಆಗಿದೆ ಎಂದು ಮಾಜಿ ಸಚಿವ ಕೆ.ಜೆ. ಜಾರ್ಜ್ ಮುಖ್ಯಮಂತ್ರಿ ಯಡಿಯೂರಪ್ಪ ಅವರಿಗೆ ಪತ್ರ ಬರೆದಿದ್ದಾರೆ.
ಸರ್ವಜ್ಞನಗರ ವಿಧಾನಸಭಾ ಕ್ಷೇತ್ರದ ಬಾಣಸವಾಡಿ ಗ್ರಾಮದ ಸುತ್ತಮುತ್ತ ರಘುರೆಡ್ಡಿ ಬಿನ್ ರಾಮಯ್ಯ ರೆಡ್ಡಿ ಎಂಬುವವರಿಗೆ ಸೇರಿದ ಸರ್ವೆ ನಂಬರ್ 120, 121ರಲ್ಲಿ ಒ.ಎಂ.ಬಿ.ಆರ್ ಬಡಾವಣೆಯಲ್ಲಿ 6*40 ಅಡಿ ವಿಸ್ತೀರ್ಣದ ಒಂಭತ್ತು ಮೂಲೆ ನಿವೇಶನ ಹಂಚಿಕೆಯಾಗಿದೆ. ಕಾನೂನುಬಾಹಿರವಾಗಿ ಹಾಗೂ ಅಕ್ರಮವಾಗಿ ಅಧಿಕಾರಿಗಳು, ಅಭಿಯಂತರು ಶಾಮೀಲಾಗಿ ಈ ಅಕ್ರಮ ಎಸಗಿದ್ದಾರೆ. ಗರಿಷ್ಠ ಬೆಲೆಯ ನಿವೇಶನ ಕನಿಷ್ಠ ಬೆಲೆಗೆ ಹಂಚಿಕೆ ಮಾಡಲಾಗಿದೆ. ಹೀಗಾಗಿ ಹಂಚಿಕೆಯಾಗಿರುವ ನಿವೇಶನಗಳನ್ನು ರದ್ದುಪಡಿಸಿ ಎಂದು ಕೆ.ಜೆ.ಜಾರ್ಜ್ ಪತ್ರ ಬರೆದಿದ್ದಾರೆ. ಅಲ್ಲದೆ ಈ ನಿವೇಶನಗಳನ್ನು ಸಾರ್ವಜನಿಕ ಸೌಲಭ್ಯ ಉಪಯೋಗಕ್ಕೆ ಮೀಸಲಿಡಬೇಕೆಂದು ಮನವಿ ಮಾಡಿದ್ದಾರೆ.
ಈ ಮೂಲಕ ಬಿಡಿಎಯ ಹಳೆಯ ಅಕ್ರಮವೊಂದು ಮತ್ತೆ ಬಯಲಿಗೆ ಬಂದಂತಾಗಿದೆ. ಈ ಕುರಿತು ಸಿಎಂ, ಬಿಡಿಎ ಆಯುಕ್ತರನ್ನು ಪ್ರಶ್ನಿಸಿದ್ದು, ಬಿಡಿಎ ತನಿಖೆಗೆ ಮುಂದಾಗಿದೆ.ಈ ಬಗ್ಗೆ ಮಾತನಾಡಿದ ಬಿಡಿಎ ಕಾರ್ಯದರ್ಶಿ ವಾಸಂತಿ ಅಮರ್, ನಿನ್ನೆಯಷ್ಟೆ ಈ ಪತ್ರ ನಮ್ಮ ಕೈ ತಲುಪಿದೆ. ಈ ಪ್ರಕರಣ ಏನಾಗಿದೆ ಅಂತ ಇನ್ನು ಪರಿಶೀಲಿಸಬೇಕಿದೆ. ಈ ಒಂಭತ್ತು ಸೈಟ್ಗಳ ವಿವರ ಪರಿಶೀಲಿಸಲಾಗುವುದು ಎಂದಿದ್ದಾರೆ.
