ಸಾಲ ಮರುಪಾವತಿಸದ್ದಕ್ಕೆ ಕಾರ್ ಶೋರೂಂಗೆ ಬೆಂಕಿ: ಖದೀಮರ ಕೃತ್ಯ ಸಿಸಿಟಿವಿಯಲ್ಲಿ ಸೆರೆ

ಸಾಲವನ್ನ ಮರುಪಾವತಿಸಿಲ್ಲವೆಂದು ಕುಪಿತಗೊಂಡ ಯುವಕರಿಬ್ಬರು ಕಾರ್​ ಶೋರೂಂಗೆ ಬೆಂಕಿ ಹಚ್ಚಿರುವ ಆರೋಪ ಪ್ರಕರಣ ಸಿಲಿಕಾನ್​ ಸಿಟಿಯಲ್ಲಿ ನಡೆದಿದೆ.

ಬೆಂಗಳೂರು: ಸಾಲವನ್ನ ಮರುಪಾವತಿಸಿಲ್ಲವೆಂದು ರೊಚ್ಚಿಗೆದ್ದ ಯುವಕರಿಬ್ಬರು ಕಾರ್ ಶೋರೂಂಗೆ ಬೆಂಕಿ ಹಚ್ಚಿರುವ ಆರೋಪ ಪ್ರಕರಣ ತಿಲಕ್​ನಗರದ ಬೈರಸಂದ್ರ ಬಳಿ‌ ನಡೆದಿದೆ.

ಶೋ ರೂಂ ಮಾಲೀಕ ಮೊಹಮ್ಮದ್ ಅಜಾದ್ ಎಂಬುವರು ಆರೋಪಿಗಳಾದ ಅಮ್ರಾನ್ ಹಾಗೂ ಇರ್ಫಾನ್ ಬಳಿ 5 ಲಕ್ಷ ರೂ. ಹಣ ಪಡೆದಿದ್ದ ಹಿನ್ನೆಲೆ ಹಣ ವಾಪಸ್​ ನೀಡುವಂತೆ ಸತಾಯಿಸುತ್ತಿದ್ರಂತೆ. ಆದಕ್ಕೆ ಮೊಹಮ್ಮದ್ ಅಜಾದ್ ಸಮಯಾವಾಕಾಶ ಕೇಳಿದ್ದರು. ಇದಕ್ಕೊಪ್ಪದ ಆರೋಪಿಗಳು ಇದೇ ತಿಂಗಳ 7ನೇ ತಾರೀಖು ಶೋರೂಂಗೆ ಪೆಟ್ರೋಲ್ ಹಾಕಿ ಬೆಂಕಿ ಹಚ್ಚಿ ಎಸ್ಕೇಪ್ ಆಗಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಬೆಂಕಿ ಹಚ್ಚಿದ ಪರಿಣಾಮ ಮಾರುತಿ ಬ್ರಿಜಾ, ಬ್ರಿಯೋ, ಇನೋವಾ ಸೇರಿದಂತೆ ಕೆಲ ಕಾರುಗಳು ಸುಟ್ಟು ಕರಕಲಾಗಿ ಬರೋಬ್ಬರಿ 20 ಲಕ್ಷ ರೂಪಾಯಿ ಬೆಲೆ ಬಾಳುವ ಕಾರುಗಳು ಬೆಂಕಿಗಾಹುತಿಯಾಗಿವೆ.

ಇದರಿಂದ ಕಂಗಾಲದ ಮಾಲೀಕ, ತಿಲಕ್​ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಈ ಹಿನ್ನೆಲೆ ಪೊಲೀಸರು ಶೋರೂಂ ಸಿಸಿಟಿವಿ ಹಾಗೂ ಅಕ್ಕ ಪಕ್ಕದ ಸಿಸಿಟಿವಿ ಪರಿಶೀಲಿಸಿ ನಡೆಸಿದ ವೇಳೆ ಅಮ್ರಾನ್ ಹಾಗೂ ಇರ್ಫಾನ್​ ಆರೋಪಿಗಳೆಂದು ತಿಳಿದುಬಂದಿದ್ದು, ಅವರಿಬ್ಬರನ್ನ ಬಂಧಿಸಲಾಗಿದೆ.

ಇನ್ನು, ಆರೋಪಿಗಳು ತನಿಖೆ ವೇಳೆ ಸಾಲ ಮರುಪಾವತಿ ಮಾಡದಿರುವ ಕಾರಣ 5 ಲೀಟರ್ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿರುವ ವಿಚಾರ ಬಾಯ್ಬಿಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ಸದ್ಯ ಆರೋಪಿಗಳಿಂದ ಪೊಲೀಸರು ಹೆಚ್ಚಿನ ಮಾಹಿತಿ ಕಲೆಹಾಕ್ತಿದ್ದಾರೆ.