ಬೆಂಗಳೂರು: ಹಸ್ತ ಚಾಲಿತ(ಮ್ಯಾನ್ಯುಯಲ್) ಖಾತೆ ನೀಡಿದ(ಆಸ್ತಿ ದಾಖಲೆಗಳು) ತಕ್ಷಣ ಇ-ಖಾತಾ ಸಹ ನೀಡಬೇಕು. ಇಲ್ಲವಾಗಿದ್ದಲ್ಲಿ ಸರ್ಕಾರ ಜಾರಿಗೆ ತಂದಿರುವ ಇ-ಖಾತಾ ವ್ಯವಸ್ಥೆ ಉದ್ದೇಶ ಈಡೇರಿದಂತಾಗುವುದಿಲ್ಲ ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.
ಇ ಗೌರ್ನೆನ್ಸ್ ಇಲಾಖೆಗೆ ಸೂಚನೆ ನೀಡಿ ಅರ್ಜಿ ಇತ್ಯರ್ಥ:ರೇಣುಕಾ ಮಂಘ್ನಾನಿ ಎಂಬುವರು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸೂರಜ್ ಗೋವಿಂದರಾಜ್ ಅವರಿದ್ದ ನ್ಯಾಯಪೀಠ, ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯ ಪ್ರಧಾನ ಕಾರ್ಯದರ್ಶಿ, ಇ- ಗೌರ್ನೆನ್ಸ್ ಇಲಾಖೆಗೆ ಸೂಚನೆ ನೀಡಿ ಅರ್ಜಿ ಇತ್ಯರ್ಥ ಪಡಿಸಿದೆ. ಅಲ್ಲದೇ ಪ್ರತಿ ಗ್ರಾಪಂ ವ್ಯಾಪ್ತಿ ಪಂಚಾಯತ್ ರಾಜ್ ಮತ್ತು ಗ್ರಾಮೀಣಾಭಿವೃದ್ಧಿ ಇಲಾಖೆ ವೆಬ್ಸೈಟ್ನಲ್ಲಿ ಅರ್ಜಿಗಳ ಸ್ವೀಕಾರ, ಪರಿಶೀಲನೆ ಮತ್ತು ವಿಲೇವಾರಿ ಮಾಡುವ ಸಂಬಂಧ ಸೂಕ್ತ ವ್ಯವಸ್ಥೆ ಜಾರಿಯಾಗುವಂತೆ ಮಾಡಬೇಕು ಎಂದು ನಿರ್ದೇಶನ ನೀಡಿದೆ.
ಅಲ್ಲದೆ, ಇ-ಖಾತಾ ಪಡೆದುಕೊಳ್ಳುವುದಕ್ಕಾಗಿ ಅರ್ಜಿದಾರರ ಹೆಸರು, ಅರ್ಜಿ ಸಲ್ಲಿಸಿರುವ ಆಸ್ತಿಯ ಸಂಪೂರ್ಣ ವಿವರ, ಖಾತೆಗಾಗಿ ಕೋರಿ ಸಲ್ಲಿಸಿರುವ ಅರ್ಜಿಯ ದಿನಾಂಕ, ಇ-ಖಾತೆಯನ್ನು ವಿತರಣೆ ಮಾಡಿದ ದಿನಾಂಕವು ಕಡ್ಡಾಯವಾಗಿ ಪ್ರಸ್ತಾಪವಾಗಿರಬೇಕು ಎಂದು ಸೂಚನೆ ನೀಡಿದೆ.
ವೆಬ್ಸೈಟ್ ಮಾಹಿತಿ ತಿಳಿಸಿ: ಇ -ಖಾತೆಗಾಗಿ ಇ-ಸುಗಮಾ ನಿಯಮಗಳ ಪ್ರಕಾರ ಯಾವುದೇ ಅರ್ಜಿ ಸಲ್ಲಿಕೆ ಮಾಡಿದ್ದಲ್ಲಿ ಮೂವತ್ತು ದಿನಗಳ ಒಳಗಾಗಿ ಇತ್ಯರ್ಥ ಪಡಿಸಿಕೊಳ್ಳಬೇಕು. ಒಂದು ವೇಳೆ ಮೂವತ್ತು ದಿನಗಳಿಗೂ ಹೆಚ್ಚು ವಿಳಂಬವಾಗಿದ್ದಲ್ಲಿ ಅದಕ್ಕೆ ಸೂಕ್ತ ಕಾರಣವನ್ನು ವೆಬ್ಸೈಟ್ ಮೂಲಕ ತಿಳಿಸುವಂತಾಗಬೇಕು ಎಂದು ಪೀಠ ತಿಳಿಸಿದೆ.
ಖಾತೆ ಎನ್ನುವುದು ಶೀರ್ಷಿಕೆಯ ದಾಖಲೆಯಲ್ಲದಿದ್ದರೂ, ಆಸ್ತಿಯ ಅನುಭೋಗದ ಉದ್ದೇಶದಿಂದ ಇದು ಅತ್ಯಗತ್ಯವಾಗಿದೆ. ಅಂತಹ ಅನುಭೋಗವನ್ನು ವಿಳಂಬ ಮಾಡುವಂತಾಗಬಾರದು ಎಂದು ಹೈಕೋರ್ಟ್ ನ್ಯಾಯಪೀಠ ಅಭಿಪ್ರಾಯ ಪಟ್ಟಿದೆ.
ಇದನ್ನೂಓದಿ:ಜನಪ್ರತಿನಿಧಿಗಳ ಸ್ವಯಂಚಾಲಿತ ಅನರ್ಹತೆ ಪ್ರಶ್ನಿಸಿ ಸುಪ್ರೀಂಗೆ ಅರ್ಜಿ: ಈ ಅರ್ಜಿಯಲ್ಲಿನ ಉಲ್ಲೇಖಗಳೇನು?
ಮೂರು ವರ್ಷ ಕಳೆದರೂ ಇ ಖಾತೆ ವಿತರಣೆ ವಿಳಂಬ: ಸುಮಾರು ಮೂರು ವರ್ಷ ಕಳೆದರೂ ಇ-ಖಾತೆ ವಿತರಣೆ ಮಾಡದ ಕ್ರಮಕ್ಕೆ ಅಚ್ಚರಿ ವ್ಯಕ್ತಪಡಿಸಿರುವ ನ್ಯಾಯಪೀಠ, ಅವರ ಪರಿಹಾರ ಕೋರಿ ಹೈಕೋರ್ಟ್ ಮೆಟ್ಟಿಲೇರುವಂತಾಗಿದೆ ಎಂದು ಆದೇಶದಲ್ಲಿ ತಿಳಿಸಿದೆ.
ಅಲ್ಲದೆ, ಮುಂದಿನ ಮೂರು ವಾರಗಳಲ್ಲಿ ಅರ್ಜಿದಾರರಿಗೆ ಇ-ಖಾತೆ ಮಂಜೂರು ಮಾಡಬೇಕು ಎಂದು ದೊಡ್ಡಜಾಲ ಗ್ರಾಪಂಗೆ ಸೂಚನೆ ನೀಡಿ ಅರ್ಜಿಯನ್ನು ಇತ್ಯರ್ಥ ಪಡಿಸಿದೆ. ಅಲ್ಲದೆ, ಆದೇಶದ ಅನುಪಾಲನಾ ವರದಿಯನ್ನು ಏಪ್ರಿಲ್ 6 ರಂದು ಸಲ್ಲಿಸುವಂತೆ ಸೂಚನೆ ನೀಡಿದೆ.
ಪ್ರಕರಣದ ಹಿನ್ನೆಲೆ ಏನು ? ರೇಣುಕಾ ಮಂಘ್ನಾನಿ ಎಂಬುವರಿಗೆ ಬೆಂಗಳೂರು ನಗರ ಜಿಲ್ಲೆಯ ದೊಡ್ಡಜಾಲ ಗ್ರಾಪಂ ಅಧಿಕಾರಿಗಳು ಹಸ್ತಪ್ರತಿ ಖಾತೆ ವಿತರಣೆ ಮಾಡಿದ್ದರು. ಆದರೆ, ಇ-ಖಾತಾ ವಿತರಣೆ ಮಾಡಿರಲಿಲ್ಲ. ಇ-ಖಾತೆ ವಿತರಣೆ ಮಾಡುವಂತೆ ಕೋರಿ 2019ರ ಫೆಬ್ರವರಿ 16 ರಂದು ಅರ್ಜಿ ಸಲ್ಲಿಸಿದ್ದರು. ಆದರೂ ಇ- ಖಾತಾ ವಿತರಣೆ ಮಾಡದ ಕ್ರಮ ಪ್ರಶ್ನಿಸಿ ಹೈಕೋಟ್ದಲ್ಲಿ ಅರ್ಜಿ ಸಲ್ಲಿಸಿದ್ದರು.
ಇದನ್ನೂಓದಿ:36 ಉಪಗ್ರಹಗಳ ಉಡಾವಣೆಗೆ ಸಿದ್ಧವಾಗುತ್ತಿವೆ ಒನ್‌ವೆಬ್‌ ಮತ್ತು ಇಸ್ರೋ: ಐತಿಹಾಸಿಕ ಮಿಷನ್ಗೆ ಕ್ಷಣಗಣನೆ
