ಬೆಂಗಳೂರು: ಸ್ಟೂಡೆಂಟ್, ಬಿಸಿನೆಸ್ ಸೇರಿದಂತೆ ವಿವಿಧ ವೀಸಾದಡಿ ಭಾರತಕ್ಕೆ ಬರುವ ವಿದೇಶಿಯರು ಡ್ರಗ್ಸ್ ಸೇರಿದಂತೆ ವಿವಿಧ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗುವವರ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ. ಜೊತೆಗೆ ಸೈಬರ್ ಕ್ರೈಂ, ಗಡುವು ಮೀರಿ ಅಕ್ರಮ ವಾಸ ಸೇರಿ ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗುತ್ತಿದ್ದಾರೆ.
ಕಳೆದ 11 ತಿಂಗಳಲ್ಲಿ 3398 ಕೇಸ್ಗಳಲ್ಲಿ 4480 ಆರೋಪಿಗಳನ್ನು ಬಂಧಿಸಲಾಗಿದೆ. ಟೂರಿಸ್ಟ್, ಮೆಡಿಕಲ್ ವಿಸಾ, ಸ್ಟೂಡೆಂಟ್ ವಿಸಾದಡಿ ಭಾರತಕ್ಕೆ ಬರುವ ವಿದೇಶಿಯರು ವಿಸಾ ಅವಧಿ ಮುಗಿದರೂ ಅಕ್ರಮವಾಗಿ ನೆಲೆಯೂರಿರುವ 601 ಮಂದಿ ಪೈಕಿ 467 ಅಕ್ರಮವಾಗಿ ಅಫ್ರಿಕಾದವರೇ ಹೆಚ್ಚಾಗಿದ್ದಾರೆ.
ಈ ಪೈಕಿ ನೈಜೀರಿಯಾ 120 ಮಂದಿ ಅಕ್ರಮವಾಗಿ ನೆಲೆಯೂರಿದರೆ ಕಾಂಗೋ 91, ಸುಡಾನ್ 77 ಯೆಮನ್ 59, ಉಗಾಂಡ 25 ಮಂದಿ ಸೇರಿದಂತೆ ವಿವಿಧ ದೇಶಗಳ ಪ್ರಜೆಗಳು ಕಾನೂನುಬಾಹಿರವಾಗಿ ವಾಸ್ತವ್ಯ ಹೂಡಿದ್ದವರ ಮೇಲೆ ಕಾನೂನು ಕ್ರಮ ಕೈಗೊಳ್ಳಲಾಗಿದೆ. ಕಳೆದ ಮೂರು ವರ್ಷಗಳಲ್ಲಿ ವಿವಿಧ ಅಪರಾಧ ಪ್ರಕರಣಗಳಲ್ಲಿ 571 ವಿದೇಶಿಯರನ್ನು ಬಂಧಿಸಲಾಗಿದೆ.
ಡ್ರಗ್ಸ್ ಕೇಸ್ಗಳಲ್ಲಿ ಹೆಚ್ಚು ವಿದೇಶಿಯರ ಬಂಧ‌ನ: ಪೂರ್ವ ಆಫ್ರಿಕಾದ ಕೆಲ ದೇಶಗಳಲ್ಲಿ ಗಾಂಜಾ ಸೇರಿದಂತೆ ವಿವಿಧ ರೀತಿಯ ಮಾದಕ ವಸ್ತು ಸೇವನೆ ಹಾಗೂ ಮಾರಾಟ ಸಾಮಾನ್ಯವಾಗಿದೆ. ಡ್ರಗ್ಸ್ ಚಟ ಅಂಟಿಸಿಕೊಂಡೇ ವಿವಿಧ ಕಾರಣಗಳಿಗಾಗಿ ಬರುವ ಭಾರತಕ್ಕೆ ಎಡತಾಕುವ ವಿದೇಶಿಯರು ಇಲ್ಲಿನ ಕಾನೂನಿಗೆ ತಲೆಬಾಗದೆ ಡ್ರಗ್ಸ್ ಜಾಲದಲ್ಲಿ ತೊಡಗಿಸಿಕೊಳ್ಳುವವರ ಪ್ರಮಾಣ ಅಧಿಕವಾಗಿದೆ.
ಡ್ರಗ್ಸ್ ದಂಧೆಯಲ್ಲಿರುವ ಆರೋಪಿಗಳನ್ನು ಪೊಲೀಸರು ಬಂಧಿಸಿ ನೆಲಮಂಗಲದ ಸೋಲೂರಿನಲ್ಲಿರುವ ವಿದೇಶಿಯರ ಗಡಿಪಾರು ಕೇಂದ್ರಕ್ಕೆ ಬಿಟ್ಟು ಎಫ್ಆರ್ಆರ್ಓ ಅಧಿಕಾರಿಗಳ ಮುಖಾಂತರ ಕಾನೂನಾತ್ಮಕವಾಗಿ ದೇಶದಿಂದ ಗಡಿಪಾರು ಮಾಡಿದರೆ, ಮತ್ತೊಂದೆಡೆ ಅಕ್ರಮವಾಗಿ ಇಲ್ಲೇ ಬಿಡಾರ ಹೂಡುವವರ ವಿದೇಶಿಯರ ಸಂಖ್ಯೆಯೂ ಹೆಚ್ಚಾಗುತ್ತಿದೆ.
11 ತಿಂಗಳಲ್ಲಿ 3374 ಕೆ.ಜಿ. ಗಾಂಜಾ ಜಪ್ತಿ: ಒಡಿಶಾ, ತೆಲಂಗಾಣ, ಆಂಧ್ರಪದೇಶ ಸೇರಿದಂತೆ ವಿವಿಧ ರಾಜ್ಯಗಳಿಂದ ಬೆಂಗಳೂರಿಗೆ ಬರುತ್ತಿರುವ ಮಾದಕವಸ್ತುಗಳಲ್ಲಿ ಗಾಂಜಾವೇ ಸಿಂಹಪಾಲಾಗಿದೆ. ಕಳೆದ 11 ತಿಂಗಳಲ್ಲಿ 3374 ಕೆ.ಜಿ. ಗಾಂಜಾ ವಶಪಡಿಸಿಕೊಳ್ಳಲಾಗಿದೆ.
ಕಳೆದ ವರ್ಷ 3604 ಕೆ.ಜಿ ಜಪ್ತಿ ಮಾಡಿಕೊಳ್ಳಲಾಗಿತ್ತು. ಈ ವರ್ಷ 39 ಕೆಜಿ ಎಂಡಿಎಂಎ ಜಪ್ತಿ‌ಮಾಡಿಕೊಂಡರೆ 2021ರಲ್ಲಿ 19 ಕೆ.ಜಿ ವಶಪಡಿಸಿಕೊಳ್ಳಲಾಗಿತ್ತು. ಜಪ್ತಿಯಾದ ಎಂಡಿಎಂ ಕಳೆದ ನಾಲ್ಕು ವರ್ಷಗಳಿಗೆ ಹೋಲಿಸಿದರೆ ಈ ವರ್ಷಕ್ಕೆ ಅಧಿಕ ಪ್ರಮಾಣದಲ್ಲಿ ಎಂಡಿಎಂ ಜಪ್ತಿ ಮಾಡಿಕೊಳ್ಳಲಾಗಿದೆ. ಗಾಂಜಾ, ಎಂಡಿಎಂಎ, ಆ್ಯಷ್ ಆಯಿಲ್‌ ಸೇರಿದಂತೆ ಒಟ್ಟು 77 ಕೋಟಿ ಮೌಲ್ಯದ ಡ್ರಗ್ಸ್ ಜಪ್ತಿ‌ಮಾಡಿಕೊಳ್ಳಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಈಟಿವಿ ಭಾರತ್ಗೆ ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: 5.26 ಕೋಟಿ ಮೌಲ್ಯದ ಡ್ರಗ್ಸ್ ನಾಶಪಡಿಸಿದ ತ್ರಿಪುರ ಪೊಲೀಸರು
