ಬೆಂಗಳೂರು: ಡ್ರಗ್ಸ್ ಪ್ರಕರಣದಲ್ಲಿ ಮಾಜಿ ಸಚಿವ ರುದ್ರಪ್ಪ ಲಮಾಣಿ ಪುತ್ರ ದರ್ಶನ್ ಪ್ರಮುಖ ಆರೋಪಿಗೆ ಸಹಾಯ ಮಾಡಿದ ಆರೋಪದಡಿ ಪೊಲೀಸರ ವಶದಲ್ಲಿದ್ದಾನೆ. ಪ್ರಮುಖ ಆರೋಪಿ ಹೇಮಂತ್ಗಾಗಿ ಪೊಲೀಸರು ಒಂದೆಡೆ ಹುಡುಕಾಟ ನಡೆಸುತ್ತಿದ್ದರೆ, ಮತ್ತೊಂದೆಡೆ ಆರೋಪಿಗೆ ಎಲ್ಲೆಲ್ಲಿ ಆಶ್ರಯ ನೀಡಲಾಗಿದೆಯೆಂಬ ಮಾಹಿತಿಯನ್ನು ಮಾಜಿ ಸಚಿವನ ಪುತ್ರ ದರ್ಶನ್ನಿಂದ ಪಡೆಯುತ್ತಿದ್ದಾರೆ.
ಚಾಮರಾಜಪೇಟೆಯ ವಿದೇಶಿ ಅಂಚೆ ಕಚೇರಿಯಲ್ಲಿ ಡ್ರಗ್ಸ್ ಪಾರ್ಸೆಲ್ ಪಡೆಯಲು ಬಂದ ಸುಜಯ್ನನ್ನು ಪೊಲೀಸರು ಮೊದಲು ಬಂಧಿಸಿದ್ದರು. ಇದೇ ವೇಳೆ ಆರೋಪಿ ಹೇಮಂತ್ ಪರಾರಿ ಆಗಿ ಕೊಡಗಿಗೆ ಹೋಗಿದ್ದ. ಅಲ್ಲಿಂದ ಮೊದಲು ಮಾಜಿ ಸಚಿವನ ಪುತ್ರ ದರ್ಶನ್ಗೆ ಕರೆ ಮಾಡಿದ್ದಾನೆ. ಈ ವೇಳೆ ದರ್ಶನ್, ಹಾವೇರಿಗೆ ಬಾ, ನಿನಗೆ ತೊಂದರೆಯಾಗದಂತೆ ನೋಡಿಕೊಳ್ಳತ್ತೇನೆಂದು ಆರೋಪಿ ಹೇಮಂತ್ಗೆ ಭರವಸೆ ನೀಡಿದ್ದಾನೆ. ನಂತರ ಹೇಮಂತ್ಗೆ ರಾಣೆಬೆನ್ನೂರಿನ ವಸತಿ ಗೃಹದಲ್ಲಿ ಆಶ್ರಯ ನೀಡಿದ್ದನು. ಈ ಎಲ್ಲಾ ಮಾಹಿತಿ ಪಡೆದು ಪೊಲೀಸರು ದರ್ಶನ್ ಲಮಾಣಿಯನ್ನು ಬಂಧಿಸಿದ್ದಾರೆ ಎನ್ನಲಾಗ್ತಿದೆ. ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ರಾಣೆಬೆನ್ನೂರಿನ ವಸತಿ ಗೃಹದಿಂದ ಹೇಮಂತ್ ಪರಾರಿ ಆಗಿದ್ದಾನೆ. ಸದ್ಯ ಆರೋಪಿ ಹೇಮಂತ್ಗಾಗಿ ಪೊಲೀಸರು ತೀವ್ರ ಶೋಧ ಕಾರ್ಯ ನಡೆಸುತ್ತಿದ್ದಾರೆ.
ಪೊಲೀಸರು ಡ್ರಗ್ಸ್ ಪ್ರಕರಣ ಸಂಬಂಧ ಇಷ್ಟೆಲ್ಲಾ ಕಷ್ಟ ಪಡುತ್ತಿದ್ದರೆ, ಇತ್ತ ಡಾರ್ಕ್ ವೆಬ್ ಮೂಲಕ ಬರುತ್ತಿದ್ದ ಡ್ರಗ್ಸ್ ಸ್ವೀಕರಿಸಲು ಲೊಕೇಶನ್ ಕುರಿತು ಸಹಾಯ ಮಾಡುತ್ತಿದ್ದ ಹೆಡ್ ಕಾನ್ಸ್‌ಟೇಬಲ್ ಓರ್ವನನ್ನು ಕೆಲಸದಿಂದ ಅಮಾನತು ಮಾಡಲಾಗಿದೆ. ಸದಾಶಿವನಗರ ಹೆಡ್ ಕಾನ್ಸ್‌ಟೇಬಲ್ ಪ್ರಭಾಕರ್ ಪೋಸ್ಟ್ ಮೂಲಕ ಬರುತ್ತಿದ್ದ ಡ್ರಗ್ಸ್ ಅನ್ನು ಪೊಲೀಸರು, ಜನರು ಇಲ್ಲದ ಪ್ರದೇಶಗಳನ್ನ ಗುರುತಿಸಿ ಮಾಹಿತಿ ತಿಳಿಸುತ್ತಿದ್ದ. ನಂತರ ಆರೋಪಿ ಹೇಮಂತ್ ಟೀಂ ಪೋಸ್ಟ್ ಮೂಲಕ ಬಂದ ಡ್ರಗ್ಸ್ ಖರೀದಿಸುತ್ತಿದ್ದರು ಎನ್ನುವ ವಿಚಾರ ತಿಳಿದುಬಂದಿದೆ.
