ವೇಶ್ಯಾವಾಟಿಕೆ ದಂಧೆ‌‌‌ ಮುಖಾಂತರ ಟೆಕ್ಕಿಗೆ ಸೈಬರ್ ಖದೀಮರ ವಂಚನೆ

ಸಿಲಿಕಾನ್ ​ಸಿಟಿಯಲ್ಲಿ ದಿನೇ ದಿನೆ ಸೈಬರ್​ ಕ್ರೈಂ ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಇದೀಗ ಟೆಕ್ಕಿಗೆ ಕೆಲಸ ಕೊಡಿಸುವ ನೆಪದಲ್ಲಿ ವೇಶ್ಯಾವಾಟಿಕೆ ದಂಧೆಗೆ ಟೆಕ್ಕಿ ಆಹ್ವಾನಿಸಿ ಬಳಿಕ ವಂಚಿಸಿರುವ ಘಟನೆ ನಡೆದಿದೆ.

ಬೆಂಗಳೂರು: ಸೈಬರ್​ ಖದೀಮರ ಗ್ಯಾಂಗ್​ ಕೆಲಸ ಕೊಡಿಸುವ ನೆಪದಲ್ಲಿ ವೇಶ್ಯಾವಾಟಿಕೆ ದಂಧೆಗೆ ಟೆಕ್ಕಿಯನ್ನು ಆಹ್ವಾನಿಸಿ ಬಳಿಕ ವಂಚಿಸಿರುವ ಘಟನೆ ನಗರದಲ್ಲಿ ನಡೆಸಿದೆ.

ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಟೆಕ್ಕಿ ಲಾಕ್​ಡೌನ್​ನಿಂದ ಕೆಲಸ ಕಳೆದುಕೊಳ್ಳುತ್ತೇನೆ ಎಂಬ ಭಯದಿಂದ ಆನ್​​ಲೈನ್​ ಮೂಲಕ ಉದ್ಯೋಗ ಹುಡುಕಲು ಆರಂಭಿಸಿದ್ದಾನೆ. ಈ ವೇಳೆ, ವೆಬ್​ಸೈಟ್​ವೊಂದಕ್ಕೆ ಲಾಗಿನ್ ಆಗಿ ಮೊಬೈಲ್ ನಂಬರ್​ ನಮೂದಿಸಿದ್ದಾನೆ. ಬಳಿಕ ವೆಬ್​ಸೈಟ್​ನಲ್ಲಿದ್ದ ನಂಬರ್​ಗೆ ಕರೆ ಮಾಡಿ ಮಾತನಾಡಿದ್ದಾನೆ. ಈ ವೇಳೆ, ಟೆಕ್ಕಿ ಜೊತೆ ಮಾತನಾಡಿದ ಸೈಬರ್ ಖದೀಮರು, ಅಪರಿಚಿತ ಮಹಿಳೆಯ ಜೊತೆ ಲೈಂಗಿಕ ಕ್ರಿಯೆಯಲ್ಲಿ ತೊಡಗುವ ಕೆಲಸ ಇದೆ. ಈ ಕೆಲಸಕ್ಕೆ ಒಪ್ಪಿದರೆ ಕೈ ತುಂಬಾ ಹಣ ಕೊಡುವುದಾಗಿ ತಿಳಿಸಿದ್ದಾರೆ.

ಇನ್ನು ಈ ಕೆಲಸಕ್ಕೆ 1,009 ರೂ. ರಿಜಿಸ್ಟರ್​​ ಶುಲ್ಕ ಪಾವತಿಸಬೇಕು. ಬಳಿಕ ಕಂಪನಿಯ ಸದಸ್ಯತ್ವಕ್ಕಾಗಿ 12,500 ರೂ., ಸ್ಟೇಟಸ್ ಕನ್ಫರ್ಮೇಶನ್​ 70 ಸಾವಿರ ಸೇರಿ 83, 500 ಹಣ ಆನ್​ಲೈನ್ ಮೂಲಕ ಪಾವತಿಸಬೇಕು ಎಂದು ಖದೀಮರು ತಿಳಿಸಿದ್ದು, ಟೆಕ್ಕಿ ಅವರ ಮಾತಿನಂತೆ ಹಣವನ್ನು ಪಾವತಿಸಿದ್ದಾನೆ. ಹಣ ಸಿಕ್ಕ ಬಳಿಕ ಖದೀಮರು ತಮ್ಮ ಮೊಬೈಲ್​ ಸ್ವಿಚ್​ ಆಫ್​ ಮಾಡಿದ್ದಾರೆ.

ಸದ್ಯ ವಂಚನೆಗೊಳಗಾದ ಟೆಕ್ಕಿ‌ ಸೈಬರ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದು, ಸೈಬರ್​ ಖದೀಮರ ಪತ್ತೆಗೆ ಬಲೆ ಬೀಸಿದ್ದಾರೆ.