ವೀಕೆಂಡ್ ಬಂದ್ರೆ ಸಾಕು, ಬಾರ್, ಪಬ್, ರೆಸ್ಟೋರೆಂಟ್ಗಳೆಲ್ಲ ಜನರಿಂದ ತುಂಬಿ ಹೋಗುತ್ತಿದ್ದವು. ಆದರೆ ಒಂದೆಡೆ ಕೊರೊನಾ ಭೀತಿ.. ಮತ್ತೊಂದೆಡೆ ಸರ್ಕಾರ ಹೇರಿದ ನಿಯಮಗಳಿಂದಾಗಿ ಜನರಿಲ್ಲದೆ ಬಣಗುಡುತ್ತಿವೆ. ಇದರಿಂದಾಗಿ ಅವುಗಳ ಮಾಲೀಕರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕುವಂತಾಗಿದೆ.
ಕೊರೊನಾ ಮೊದ ಮೊದಲು ಸರ್ಕಾರ ಕಟ್ಟುನಿಟ್ಟಿನ ನಿಯಮಾವಳಿಗಳನ್ನು ವಿಧಿಸಿತು. ಲಾಕ್ಡೌನ್ನಿಂದಾಗಿ ಬಾರ್, ರೆಸ್ಟೋರೆಂಟ್ಗಳಿಗೆ ಬೀಗ ಜಡಿದ ಪರಿಣಾಮ ಮಾಲೀಕರು ಮಾತ್ರವಲ್ಲದೇ ಕೆಲಸ ಮಾಡುತ್ತಿದ್ದ ಕಾರ್ಮಿಕರ ಜೀವನ ಸಹ ದುಸ್ತರವಾಗಿದೆ. ಬಳಿಕ ಸರ್ಕಾರ ಅನ್ಲಾಕ್ ಪ್ರಕ್ರಿಯೆ ಆರಂಭಿಸಿದ ನಂತರ ನಿರೀಕ್ಷಿತ ಪ್ರಮಾಣದಲ್ಲಿ ಗ್ರಾಹಕರು ರೆಸ್ಟೋರೆಂಟ್ಗಳತ್ತ ಮುಖ ಮಾಡದಿರುವುದರಿಂದ ಬ್ಯುಸಿನೆಸ್ ಕೂಡ ಆಟಕ್ಕುಂಟು ಲೆಕ್ಕಕ್ಕೆ ಇಲ್ಲದಂತಾಗಿದೆ.
ಈ ಮೊದಲು ಬೆಳಗ್ಗೆಯಿಂದ ತಡರಾತ್ರಿಯವರೆಗೂ ರೆಸ್ಟೋರೆಂಟ್ಗಳು ಗಿಜಿಗುಡುತ್ತಿದ್ದವು. ಆದರೀಗ, ಗ್ರಾಹಕರಿಲ್ಲದೇ ಬಣಗುಡುತ್ತಿವೆ. ನಾನ್‌ವೆಜ್ ಹಾಗೂ ವೆಜಿಟೇರಿಯನ್ ಖಾದ್ಯ ತಿನಿಸುಗಳನ್ನ ಬಿಸಿಬಿಸಿಯಾಗಿ ತಯಾರಿಸಿಕೊಟ್ಟರು ಕೂಡ ಗ್ರಾಹಕರು ಮಾತ್ರ ಬೆರಳೆಣಿಕೆಯಷ್ಟು ಬರುತ್ತಾರೆ. ಆನ್ಲೈನ್ ಮಾರುಕಟ್ಟೆಯಲ್ಲೂ ಶೇ.20-30ರಷ್ಟು ವ್ಯಾಪಾರವಾಗುತ್ತಿದೆ. ಅದರಲ್ಲೂ ಮಟನ್ ಹಾಗೂ ಚಿಕನ್ ಬಿರಿಯಾನಿಗೆ ಹೆಚ್ಚಿನ ಬೇಡಿಕೆ ಇದೆ. ಅದು ಬಿಟ್ಟರೆ ಸಸ್ಯಾಹಾರಕ್ಕೆ ಡಿಮ್ಯಾಂಡ್ ಕಡಿಮೆ. ಇದರಿಂದಾಗಿ ರೆಸ್ಟೋರೆಂಟ್ಗಳನ್ನು ತೆರೆಯಲು ಸರ್ಕಾರ ಅನುಮತಿಸಿದರೂ ಗ್ರಾಹಕರಿಲ್ಲದೇ ವ್ಯಾಪಾರ ಕುಗ್ಗಿದೆ.
ಬಾರ್, ಪಬ್ಗಳಂತೂ ವೀಕೆಂಡ್ಗಳಲ್ಲಿ ಮೋಜು ಮಸ್ತಿಗೆಂದು ಬರುವ ಜನರಿಂದ ಕಿಕ್ಕಿರಿಯುತ್ತಿದ್ದವು. ಆದರೆ, ಕೊರೊನಾ ಭೀತಿ ಮತ್ತು ಸರ್ಕಾರದ ನಿರ್ಬಂಧಗಳಿಂದ ಗ್ರಾಹಕರಿಲ್ಲದೇ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿವೆ. ಕೊರೊನಾ ಪರಿಣಾಮ ಆರ್ಥಿಕ ಸಂಕಷ್ಟದಿಂದ ಬಾರ್ ಮತ್ತು ರೆಸ್ಟೋರೆಂಟ್ಗಳ ಮಾಲೀಕರು ಹಾಗೂ ಕಾರ್ಮಿಕರ ಬದುಕು ಸಂಕಷ್ಟಕ್ಕೆ ಸಿಲುಕಿದೆ. ಸರ್ಕಾರದ ನೆರವನ್ನು ಎದುರು ನೋಡ್ತಿದ್ದಾರೆ ಮಾಲೀಕರು.
