ಬೆಂಗಳೂರು: ನಗರದ ಮಾಣಿಕ್ ಷಾ ಪರೇಡ್ ಮೈದಾನದಲ್ಲಿ ಸರಳವಾಗಿ ಕೋವಿಡ್ ಮಾರ್ಗಸೂಚಿಯಂತೆ 75 ನೇ ಸ್ವಾತಂತ್ರ್ಯ ದಿನಾಚರಣೆಯನ್ನು ಸರಳವಾಗಿ ಆಚರಿಸಲಾಯಿತು. ನೂತನ ಸಿಎಂ ಬಸವರಾಜ್ ಬೊಮ್ಮಾಯಿಯವರು ಚೊಚ್ಚಲ ದ್ವಜಾರೋಹಣ ಮಾಡಿದರು.
ಸೀಮಿತ ಪರೇಡ್ ತಂಡ ಪರೇಡ್‌ನಲ್ಲಿ ಭಾಗವಹಿಸಿತ್ತು. ಆದರೆ ಪ್ರತಿ ವರ್ಷದಂತೆ ಪರೇಡ್ ತಂಡಗಳ ಪಥಸಂಚಲನ ಇರಲಿಲ್ಲ. ವಿದ್ಯಾರ್ಥಿಗಳ ಪರೇಡ್ಗೆ ಅವಕಾಶವಿರಲಿಲ್ಲ. ಶಾಲಾ ವಿದ್ಯಾರ್ಥಿಗಳ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೆರುಗೂ ಇರಲಿಲ್ಲ. ಇನ್ನು ಯೋಧರ ಸಾಹಸ ಪ್ರದರ್ಶನಗಳಿಗೂ ಈ ಬಾರಿ ಅವಕಾಶ ಇರಲಿಲ್ಲ.
ಹಾವೇರಿ ಜಿಲ್ಲೆಯ ಸವಣೂರು ಮೂಲದ ಡಿಸಿಪಿ (ಉಪಪೊಲೀಸ್ ಆಯುಕ್ತರು) ಚನ್ನಬಸಪ್ಪ ಪರಪ್ಪ ಹೊಸಮನಿ ಅವರು ಇಂದಿನ ಪರೇಡ್ ನೇತೃತ್ವ ವಹಿಸಿದ್ದರು. ಪರೇಡ್ ವೀಕ್ಷಣೆ ಬಳಿಕ ರಾಜ್ಯವನ್ನು ಉದ್ದೇಶಿಸಿ ಮಾತನಾಡಿದ ಸಿಎಂ, ಮೇಕೆದಾಟು ಯೋಜನೆ, 75 ಸ್ಲಂ, 75 ಕೆರೆ ಅಭಿವೃದ್ಧಿ ಬಗ್ಗೆ ರಾಜ್ಯದ ಜನರಿಗೆ ಭರವಸೆ ನೀಡಿದರು.
ಬಳಿಕ ರೈತಗೀತೆ, ನಾಡಗೀತೆ ಹಾಗೂ ರಾಷ್ಟ್ರಗೀತೆಯೊಂದಿಗೆ ಸ್ವಾತಂತ್ರ್ಯ ದಿನಾಚರಣೆ ಕಾರ್ಯಕ್ರಮವನ್ನು ಸಮಾಪ್ತಿಗೊಳಿಸಲಾಯಿತು.
