ಬೆಂಗಳೂರು: ತೀವ್ರ ಚರ್ಚೆಗೆ ಎಡೆ ಮಾಡಿಕೊಟ್ಟಿದ್ದ ಜೆ.ಜೆ.ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಕಳೆದ ಏಪ್ರಿಲ್ 5ರಂದು ನಡೆದಿದ್ದ ಚಂದ್ರು ಕೊಲೆ ಪ್ರಕರಣ ಸಂಬಂಧ ಸಿಐಡಿ ತನಿಖೆ ಪೂರ್ಣಗೊಳಿಸಿ 1ನೇ ಎಸಿಎಂಎಂ ನ್ಯಾಯಾಲಯಕ್ಕೆ ಚಾರ್ಜ್ ಶೀಟ್ ಸಲ್ಲಿಸಿದೆ.
ಭಾಷಾ ವಿಚಾರಕ್ಕಾಗಿ ಚಂದ್ರು ಕೊಲೆಯಾಗಿದ್ದು, ಈ ಸಂಬಂಧ ನಾಲ್ವರು ಆರೋಪಿಗಳಾದ ಶಾಹೀದ್ ಪಾಷಾ, ಶಾಹೀದ್ ಪಾಷಾ ಅಲಿಯಾಸ್ ಗೇಣಾ ಮೊಹಮ್ಮದ್ ನಬೀಲ್ ಹಾಗೂ ಕಾನೂನು ಸಂಘರ್ಷಕ್ಕೆ ಒಳಗಾದವನನ್ನು ಸೇರಿ ನಾಲ್ವರನ್ನು ಬಂಧಿಸಲಾಗಿದೆ. ತನಿಖೆ ವೇಳೆ 49 ಜನರನ್ನು ಸಾಕ್ಷ್ಯಾಧಾರರನ್ನಾಗಿ ಮಾಡಲಾಗಿದ್ದು, ಆರೋಪಿತರ ವಿರುದ್ಧ ಒಟ್ಟು 171 ಪುಟಗಳ ದೋಷಾರೋಪ ಪಟ್ಟಿಯನ್ನು ಪ್ರಕರಣದ ತನಿಖಾಧಿಕಾರಿ ಡಿವೈಎಸ್ಪಿ ನಂದಕುಮಾರ್ ನ್ಯಾಯಾಲಯಕ್ಕೆ ಸಲ್ಲಿಸಿದ್ದಾರೆ.
ಚಾರ್ಜ್ಶೀಟ್ನಲ್ಲಿ ಏನಿದೆ?: ಹಳೆ ಗುಡ್ದದಹಳ್ಳಿ ನಿವಾಸಿ ಸೈಮನ್ ರಾಜ್ ಏಪ್ರಿಲ್ 5ರಂದು ಹುಟ್ಟುಹಬ್ಬದ ಹಿನ್ನೆಲೆ ಮನೆ ಬಳಿ ಸಂಭ್ರಮಾಚರಣೆ ಮಾಡಿ ಸ್ನೇಹಿತ ಚಂದ್ರುನನ್ನೇ ಕರೆದುಕೊಂಡು ಚಿಕನ್ ರೋಲ್ ಕೊಡಿಸಲು ಆ್ಯಕ್ಟಿವಾ ಹೊಂಡಾ ಸ್ಕೂಟರ್ ನೊಂದಿಗೆ ಹಳೆಗುಡ್ಡದಹಳ್ಳಿ 9ನೇ ಅಡ್ಡರಸ್ತೆ ಬಳಿ ಬರುತ್ತಿದ್ದ. ಈ ವೇಳೆ, ಅದೇ ದಾರಿಯಲ್ಲೇ ನಡೆದುಕೊಂಡು ಬರುತ್ತಿದ್ದ ಆರೋಪಿ ಶಾಹೀದ್, ಕ್ಯಾರೇ ಮುಜೆ ಗಾಲಿ ದಿಯಾ ಎಂದು ಸೈಮನ್ ತಾಯಿ ವಿರುದ್ಧ ಅವಾಚ್ಯ ಶಬ್ಧಗಳಿಂದ ನಿಂದಿಸಿದ್ದ. ಆದರೂ ನಿನ್ನನ್ನು ಬೈದಿಲ್ಲ ಹೋಗು ಎಂದು ಹೇಳಿ ಕಳುಹಿಸಿದ್ದ.
ಸಮೀಪದ ಬೇಕರಿ ಬಳಿಯಿರುವಾಗ ಶಾಹೀದ್ ಮತ್ತೇ ಬೈಗುಳ ಮುಂದುವರಿಸಿದ್ದ. ಇದರಿಂದ ಕೋಪಗೊಂಡ ಇವರಿಬ್ಬರೂ ಆರೋಪಿಯನ್ನ ತಳ್ಳಿದ್ದಾರೆ. ಅಕ್ರೋಶಗೊಂಡ ಶಾಹೀದ್ ಯಾರ್ ಕರೀತೀಯ ಕರಿ ನೋಡ್ತೇನೆ ಎಂದು ಧಮಕಿ ಹಾಕಿದ್ದಾನೆ. ಸೈಮನ್ ಸಹ ನೀನು ಸಹ ಯಾರನ್ನು ಬೇಕಾದರೂ ಕರಿ ಎಂದು ಹೇಳಿದ್ದಕ್ಕೆ ಕನ್ನಡ ನಹೀ ಆತಾ ಉರ್ದು ಮೇ ಬೋಲೊ ಎಂದು ಜಗಳ ಆಡಿ ಹಲ್ಲೆಗೆ ಮುಂದಾಗಿದ್ದಾರೆ.
ಈ ವೇಳೆ, ಹಲ್ಲೆ ತಡೆಯಲು ಬಂದ ಚಂದ್ರುನನ್ನ ಗುರಿಯಾಗಿಸಿ ಚಾಕುವಿನಿಂದ ತಿವಿಯಲು ಶಾಹೀದ್ ಮುಂದಾಗಿದ್ದಾನೆ. ಎಚ್ಚೆತ್ತ ಚಂದ್ರು ಚಾಕು ತಿವಿಯುವ ಆರೋಪಿಯ ಕೈ ಹಿಡಿದುಕೊಂಡಿದ್ದಾನೆ. ಅಷ್ಟರಲ್ಲಾಗಲೇ ಆರೋಪಿ ಸಮೀಪದಲ್ಲೇ ಇದ್ದ ಸಹಚರರನ್ನು ಸ್ಥಳಕ್ಕೆ ಕರೆಯಿಸಿಕೊಂಡಿದ್ದ. ಎರಡನೇ ಆರೋಪಿ ಶಾಹೀದ್ ಲಾಂಗ್ ನಿಂದ ಹಲ್ಲೆ ನಡೆಸಿದರೆ ಮೊದಲ ಆರೋಪಿ ಚಂದ್ರುವಿನ ತೊಡೆಗೆ ಚಾಕುವಿನಿಂದ ತಿವಿದು ಹತ್ಯೆ ಮಾಡಿ ನಂತರ ಮೈಸೂರು ರಸ್ತೆಯ ಲಾಡ್ಜ್ ವೊಂದರಲ್ಲಿ ಅವಿತುಕೊಂಡಿದ್ದ ಎಂದು ಚಾರ್ಜ್ ಶೀಟ್ ನಲ್ಲಿ ಉಲ್ಲೇಖಿಸಲಾಗಿದೆ.
ಚಂದ್ರು ಕೊಲೆ ಪ್ರಕರಣ ಸಂಬಂಧ ಗೃಹ ಸಚಿವ ಆರಗ ಜ್ಞಾನೇಂದ್ರ ಮಾತನಾಡಿ. ಉರ್ದು ಮಾತನಾಡದಿದ್ದಕ್ಕೆ ಚಂದ್ರುನನ್ನ ಚುಚ್ಚಿ- ಚುಚ್ಚಿ ಆರೋಪಿಗಳು ಕೊಲೆ ಮಾಡಿದ್ದರು ಎಂದು ಮಾಧ್ಯಮಗಳ ಮುಂದೆ ಹೇಳಿಕೆ ನೀಡಿದ್ದರು. ಮತ್ತೊಂದೆಡೆ ಹಿಂದಿನ ಪೊಲೀಸ್ ಕಮಿಷನರ್ ಕಮಲ್ ಪಂತ್ ಬೈಕ್ ಟಚ್ ಆಗಿದ್ದಕ್ಕೆ ಚಂದ್ರು ಕೊಲೆಯಾಗಿದೆಯೇ ಹೊರತು ಭಾಷೆ ವಿಚಾರಕ್ಕೆ ಆಗಿಲ್ಲ ಎಂದಿದ್ದರು. ಇದು ಸರ್ಕಾರ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು. ಈಗ ಸತ್ಯಾಂಶ ಹೊರಬಿದ್ದಿದೆ.
ಹೆಚ್ಚಿನ ಓದಿಗೆ: ಚಂದ್ರು ಹತ್ಯೆ ಪ್ರಕರಣವನ್ನು ಸಿಐಡಿಗೆ ವರ್ಗಾಯಿಸಲು ಕಮಲ್ ಪಂತ್ ಪತ್ರ, ಅಧೀಕೃತ ಆದೇಶ ಬಾಕಿ
ಚಂದ್ರು ಕೊಲೆ ಕೇಸ್ : ಮೃತ ಸ್ನೇಹಿತ ಸೈಮನ್ ಒಂದ್‌ ಹೇಳಿದ್ರೆ, ಕಮಿಷನರ್ ಪಂತ್ ಇನ್ನೊಂದ್‌ ಮಾತು..
